Ikipe y’i Nyagatare yahize andi mu kurwanisha inkota mu mikino yo Kwibuka (Amafoto)

Yanditswe na Eric Tony Ukurikiyimfura
Kuya 1 Nyakanga 2019 saa 09:09
Yasuwe :
0 0

Ikipe ya Nyagatare y’umukino wa Chanbara yahize andi bari bahanganye mu irushanwa ryo Kwibuka ku nshuro ya 25 abatutsi bazize Jenoside mu 1994, yegukana igikombe cy’iri rushanwa ryateguwe bwa mbere muri uyu mukino wo kurwanisha inkota.

Iri rushanwa ry’umunsi umwe ryabaye kuri iki Cyumweru mu cyumba cy’imikino cy’ishuri rya Lycée de Kigali, ryitabiriwe n’abarimo Ambasaderi w’u Buyapani mu Rwanda, Takayuki Miyashita.

Abagera kuri 60 baturutse mu makipe atandatu arimo Nyagatare Sports Chanbara Club, Bishamon Sports Chanbara Club, Samurai Sports Chanbara Club, Susanoo Sports Chanbara Club, United Sports Chanbara Club na Katana Sports Chanbara Club ni bo bitabiriye aya marushanwa y’uyu mukino wo kurwanisha inkota.

Iri rushanwa ryabaye mu byiciro bibiri birimo kurwanisha inkota ya sentimetro 60 nta kindi kintu ufite (Free Kodachi) ndetse no kurwanisha inkota ufite ingabo (Tate Kodachi), aho abahize abandi bahawe imidali n’ibikombe.

Ambasaderi Miyashita washimishijwe n’iri rushanwa ry’umukino watangijwe mu Rwanda mu 2013, yasabye abawukina kwirinda icyo aricyo cyose gishobora kubatandukanya kuko imikino ibereyeho guhuza abantu.

Yavuze kandi ko u Buyapani buzakomeza gushyikira uyu mukino hamwe n’iyindi irimo Karate na Taekwondo.

Ati "Chanbara ni umukino ufite inkomoko mu Buyapani kandi mu gihe gito umaze biragaragara ko ukunzwe kandi turifuza ko ukomeza gutera imbere. Dufite imikino myinshi irimo Karate na Chanbara kandi tuzakomeza kuyifasha.”

Umunyamabanga Mukuru wa Sports Chanbara mu Rwanda, Rugigana Jean Claude yashimiye Minisiteri y’Umuco na Siporo mu Rwanda na Komite Olempike y’u Rwanda yabafashije gutegura aya marushanwa yo Kwibuka, abaye ku nshuro ya mbere.

Ati ”Ni ubwa mbere duteguye iri rushanwa ryo Kwibuka, tunashimira MINISPOC na Komite Olempike badufashije kubigeraho nk’ishyirahamwe rishya ryatangiye mu 2013. Ni inshingano zacu kwifatanya n’abanyarwanda kwibuka Abatutsi bishwe muri Jenoside kandi irushanwa ryagenze neza.”

Umukino wa Chanbara ukinwa bakoresheje inkota gusa aho utandukanira n’uwa Fencing, ni uko uyu abawukina bisanzura bakoresha ubumenyi bwabo n’imbaraga kandi nta kibazo cyo kuvunika bahura na cyo.

Uyu mukino watangirijwe mu Buyapani mu mwaka w’1971, na Sensei Tetsundo Tanabe unawuyobora ku rwego mpuzamahanga. Uyu yashakaga ahanini kwigisha abantu uburyo bakwirinda, bashimangira umuco wo kurwana kw’abayapani kuzwi nka Samurai.

Mu Rwanda, wafunguwe ku mugaragaro mu 2017 nyuma yo gutangira gukinwa mu 2013 utangijwe na Sensei Tsutomu Takahashi. Abagera kuri 300 nibo babarizwa muri Sports Chanbara Federation y’u Rwanda.

Uko abakinnyi n’amakipe barushanyijwe:

Ibyiciro by’abantu ku giti cyabo

I. Abahungu U10 – Free Kodachi

  1. Ndayishimiye Patrick
  2. Ishimwe Diane
  3. Uwiragiye Pacifique
  4. Intwari Saleh

II. Abakobwa U16 – Free Kodachi

  1. IshimweJean Aimée
  2. Ishimwe Kevin
  3. Tuyishime Valantin
  4. Gisubizo Salim

III. Abahungu U18 – Free Kodachi

  1. Adhav Jogan
  2. Rukundo Steven
  3. Rutagengwa Emile
  4. Iradukunda Obed

IV. Abakobwa U18 – Free Kodachi

  1. Umutoniwase Jessica
  2. Imanishimwe Christine

V. Abakobwa bakuru – Free Kodachi

  1. Isimbi Florence
  2. Munezero Ange

VI. Abagabo bakuru – Free Kodachi

  1. Rafiki Emmanuel
  2. Ruzindana Jean Marie Vianney
  3. Mfuranzima Eloi
  4. Kwizera Eric

VI. Amakipe – Tate Kodachi

  1. Nyagatare Sports Chanbara Club
  2. Bishamon Sports Chanbara Club
  3. Samurai Sports Chanbara Club
  4. Susanoo Sports Chanbara Club
Irushanwa ryo kwibuka muri Sports Chanbara ryabaye kuri iki Cyumweru
Uyu mukino ukinwa hakoreshejwe inkota, aho izifashishijwe muri iri rushanwa zari zifite centimetero 60
Irushanwa ribaye ku nshuro ya mbere muri Chanbara, ryitabiriwe na Ambasaderi w'u Buyapani mu Rwanda, Takayuki Miyashita
Ambasaderi Miyashita ubwo hafatwaga umwanya wo Kwibuka abazize Jenoside
Abaherekeje Ambasaderi Miyashita bafata umunota wo kwibuka Abatutsi bishwe muri Jenoside
Iri rushanwa ryabaye no mu cyiciro cy'abakiri bato bari munsi y'imyaka 10
Umutoza w'ikipe y'igihugu ya Karate Nkuranyabahizi Noël ni umwe mu bakina uyu mukino wo kurwanisha inkota
Umunyamabanga Mukuru wa Sports Chanbara, Rugigana Jean Claude yashimiye abakinnyi n'amakipe yitabiriye irushanwa ryo Kwibuka ribaye ku nshuro ya mbere
Ambasaderi Miyashita yasabye abakina Chanbara kwirinda ushobora kubatanya kuko imikino ibereyeho guhuza abantu
Visi Perezida wa kabiri wa Komite Olempike y'u Rwanda, Bizimana Festus na we yashimiye Sports Chanbara yateguye iri rushanwa ryo Kwibuka
Abakinnyi ba mbere bahawe ibikombe muri iri rushanwa ryo Kwibuka
Abakinnyi bitabiriye irushanwa ryo Kwibuka muri Sports Chanbara bafashe ifoto hamwe n'abashyitsi bari baryitabiriye

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza