Gakwaya Jean Claude yegukanye Shampiyona y’u Rwanda yo gusiganwa mu modoka (Amafoto)

Yanditswe na Eric Tony Ukurikiyimfura
Kuya 25 Ugushyingo 2019 saa 11:07
Yasuwe :
0 0

Umunyarwanda Gakwaya Jean Claude yegukanye Shampiyona y’u Rwanda yo gusiganwa mu modoka yasojwe ku wa Gatandatu hakinwa Rallye des Mille Collines na yo yegukanywe n’uyu mugabo utwara Subaru Impreza N11 ubwo yari kumwe na Rutabingwa Fernand.

Ku wa Gatandatu w’icyumweru gishize nibwo hakinwe Rallye des Mille Collines mu mihanda ya Kinyinya, Bumbogo, Nduba na Kimironko. Iri siganwa ryatinze gutangira kubera imvura yaguye, ryakinwe mu gihu cyinshi, aho byasabaga cyane ubushishozi ku barikina.

Rallye des Mille Collines 2019 yegukanwe na Gakwaya Claude aho we na Rutabingwa Fernand bakoresheje iminota 24 n’amasegonda 12, bakurikirwa na Mitraros Elefterios wakinannye na Paolo Paganin, bakoresha iminota 24 n’amasegonda 43.

Jean Jean Giesen na Mujiji Kevin babaye aba gatatu nyuma yo gukoresha iminota 25 n’amasegonda 22, Nshimiyimana Adolphe na Ngabo Olivier bakoresha iminota 27 n’amasegonda 49 ku mwanya wa kane mu gihe Sekamana Furaha na Muhire Bosco bakoresheje iminota 28 n’amasegonda 32 baba aba gatanu.

Nyuma y’amasiganwa atanu yakinwe uyu mwaka, Gakwaya Jean Claude yegukanye Shampiyona n’amanota 89, akurikiwe na Jean Jean Giesen n’amanota 86 mu gihe Mitraros Elefterios yabaye uwa gatatu n’amanota 46.

Umurundi Din Imtiaz watwaye Shampiyona y’u Rwanda mu mwaka ushize, uyu mwaka yabaye uwa kane n’amanota 45, akurikirwa na Nshimiyimana Adolphe, Sekamana Furaha, Remezo Christian na Uwimana Jules wabaye uwa munani.

Mu bafasha abatwaye imodoka (co-pilote), uwitwaye neza kurusha abandi yabaye Mugabo Claude ukinana na Gakwaya Claude, wagize amanota 60, Paolo Paganin aba uwa kabiri n’amanota 46, Jan Demester, Yannick Dewalque na Gahuragiza Jean Marie bakurikiraho mu yindi myanya itatu.

Nyuma yo kwegukana Shampiyona, Gakwaya Jean Claude yavuze ko uyu mwaka yari yiyemeje kwitwara neza ndetse yishimira ko byamuhiriye akabasha gutsinda amasiganwa yahereye kuva kera aharanira kwegukana.

Ati” Nta mukino uba muto, abantu baba bafite impano zitandukanye kandi uba ugomba guhura nabo. Uyu mwaka nifuzaga guha umwanya iri rushanwa kandi mbona byaragiye bimpira kuko hari amarushanwa akomeye uyu mwaka natsinze mu myaka yose nari maze nkina ntarabigezeho kandi narabyifuzaga.”

Perezida w’Ishyirahamwe Nyarwanda ryo gusiganwa mu modoka (RAC), Gakwaya Christian, avuga ko bishimira uko uyu mwaka wagenze muri rusange, ariko imodoka zitabira amasiganwa zikiri nkeya.

Ati” Turangije umwaka wa 2019, ni umwaka navuga ko wagenze neza mu buryo butandukanye, amasiganwa twateganyaga ko azaba, yose yarabaye. Aho navuga bitagenze neza ni umubare w’imodoka dushaka ko wiyongera gusa twishimira ko harimo abakiri bato kandi twizera ko bizakomeza.”

Uyu mwaka RAC yakoresheje amasiganwa atanu, aho Shampiyona yatangiye hakinwa isiganwa rya Nyirangarama Tare Sprint ryegukanywe na Giancarlo Davite muri Werurwe. Hakuriyeho Huye Rally yegukanwe na Gakwaya Jean Claude muri Kamena.

Muri Kanama habaye WIRM Sprint Rally yegukanwe na Giancarlo Davite, hakurikiraho Rwanda Mountain Gorilla Rally yegukanwe na Gakwaya Jean Claude wanatwaye Rallye des Mille Collines yakinwe ku wa Gatandatu.

Rallye des Mille Collines yakiniwe mu gihu cyinshi
Gakwaya Claude na Rutabingwa Fernand ni bo bahagurukaga mbere
Mitraros yari yagarutse muri Rallye des Mille Collines ari mu bahataniye gutwara Shampiyona
Nshimiyimana Adolphe 'Dady' muri Toyota Celica
Kayitankore Lionel wa Dukes Rally Team ntabwo yasoje isiganwa
Fergadiotis Tassos na Bukuru, na bo ntabwo basoje isiganwa
Sekamana Furaha muri Subaru ubwo hakinwaga iri siganwa ryaherutse ayandi muri uyu mwaka
Gakwaya yegukanye Rallye des Mille Collines ndetse aba uwa mbere muri Shampiyona
Abatuye i Bumbogo baryohewe n'iri siganwa ryakinwe mu masaha y'umugoroba
Aba bahisemo kurira hejuru kugira ngo babashe kubona imodoka neza
Subaru Impreza N10 ya Mitraros Elefterios
Umunyamabanga wa RAC, Cyatangabo Ange François mu muhango wo gutanga ibihembo
Fergadiotis Tassos na Bukuru, barashimiwe nubwo batasoje isiganwa
Kayitankore Lionel na Murengezi Brian bashimirwa ko bitabiriye Rallye des Mille Collines
Sekamana Furaha yabaye uwa gatandatu muri uyu mwaka wa 2019
Nshimiyimana Adolphe yabaye uwa gatanu muri Shampiyona, anaba uwa mbere mu bafite imodoka zikururira imbere (2WD)
Jean Jean Giesen na Mujiji Kevin babaye aba gatatu muri Rallye des Mille Collines
Gakwaya Claude na Rutabingwa Fernand bashyikirizwa ibikombe bya Rallye des Mille Collines
Gakwaya Jean Claude yegukanye Shampiyona y’u Rwanda yo gusiganwa mu modoka
Perezida w’Ishyirahamwe ry’Umukino wo gusiganwa mu modoka mu Rwanda ‘RAC’, Gakwaya Christian

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza