00:00:00 IGIHE NETWORK KN KINYARWANDA EN ENGLISH FR FRANCAIS

Cricket ishobora kwinjiriza u Rwanda agera kuri miliyoni 900 Frw muri 2021

Yanditswe na Eric Tony Ukurikiyimfura
Kuya 17 Ugushyingo 2021 saa 09:48
Yasuwe :
0 0

Amarushanwa ane mpuzamahanga y’umukino wa Cricket u Rwanda rwakiriye muri uyu mwaka wa 2021, ashobora kurwinjiriza agera kuri miliyoni 900 Frw.

Muri Nyakanga 2021 ni bwo ICC yashyize ahagaragara gahunda y’amarushanwa atanu mpuzamahanga yo ku rwego rwa Afurika yabaye guhera muri Nzeri 2021 mu rwego rwo gushaka itike y’Igikombe cy’Isi.

Amarushanwa ane muri aya atanu, yabereye mu Rwanda, aho irya nyuma ritangira kuri uyu wa Gatatu, tariki ya 17 Ugushyingo 2021.

Byiringiro Emmanuel ushinzwe ibikorwa by’Ishyirahamwe Nyarwanda ry’umukino wa Cricket, yavuze ko nubwo batarakora imibare yose igaragaza ibyo u Rwanda rwabonye muri aya marushanwa, ariko rushobora kwinjiza agera kuri miliyoni 900 Frw.

Ati “Mu bijyanye n’amafaranga, turacyabibara cyane cyane ko hari abantu benshi baza, nk’ubu hari ibihugu byaje n’abafana babo, Nigeria ishobora kuba yazanye nk’abantu 50, amatike y’indege abantu baziyeho. Iyo turebye, ngereranyije, dushobora kwinjiza miliyoni 900 Frw.”

Irushanwa rya mbere ryabereye mu Rwanda ni iry’abahungu batarengeje imyaka 19 “ ICC U-19 Men’s Cricket World Cup Africa Qualifier” kuva tariki ya 28 Nzeri kugeza ku wa 7 Ukwakira 2021.

Iri rushanwa byari biteganyijwe ko rizabera muri Nigeria kuva tariki 25 Nzeri kugeza kugeza ku wa 1 Ukwakira 2021, ariko ICC yahisemo kuryimurira mu Rwanda kubera ikibazo cy’umutekano muke uri muri iki cyo mu Burengerazuba bwa Afurika, ryitabiriwe na Namibia, Nigeria, Tanzania, Uganda n’u Rwanda.

Irushanwa rya kabiri ni iryo gushaka itike y’Igikombe cy’Isi mu Bagabo “ICC Men’s T20 world Cup Sub Regional Africa Qualifier Group A”. Ryabaye hagati ya tariki ya 14 n’iya 23 Ukwakira 2021, ryitabirwa n’ibihugu birindwi ari byo Eswatini, Ghana, Lesotho, Malawi, Seychelles, Uganda n’u Rwanda.

Nyuma yaho, kuva tariki 31 Ukwakira kugeza ku wa 8 Ugushyingo 2021, habaye imikino yo mu itsinda B “ICC Men’s T20 World Cup Sub Regional Africa Qualifier Group B”, yitabiriwe amakipe atandatu ari yo Botswana, Cameroun, Mozambique, Saint Helena, Sierra Leone na Tanzania.

Aya marushanwa yombi yagombaga kubera muri Afurika y’Epfo tariki 25 kugeza 31 Ukwakira 2021, yatanze ibihugu bibiri (kimwe muri buri tsinda) byiyongereye kuri Nigeria na Kenya zitakinnye amajonjora abanza.

Ibyo bihugu uko ari bine (Tanzania, Kenya, Uganda na Nigeria) ni byo bigiye guhurira kuri Stade Mpuzamahanga y’i Gahanga no muri IPRC Kigali mu mikino ya nyuma “ICC Men’s T20 World Cup Africa Qualifier” izatanga ikipe imwe izajya mu Gikombe cy’Isi.

Muri iri rushanwa rizaba hagati ya tariki ya 17 n’iya 20 Ugushyingo 2021, amakipe azahura hagati yayo mu mikino ibanza n’iyo kwishyura, izatsinda imikino myinshi abe ariyo ibona itike.

Mu kiganiro n’abanyamakuru cyabaye ku wa Kabiri, Umuyobozi ushinzwe iterambere ry’umukino wa Cricket muri Afurika, Justine Ligyalingi, yashimiye ubuyobozi bwa RCA, avuga ko urwego bwagaragaje mu gutegura iyi mikino Nyafurika, ubushishozi n’ubuhanga bwakoresheje bibuha amahirwe yo kuzakira andi marushanwa atandukanye.

Yashimiye kandi Leta y’u Rwanda ku mbaraga ishyira mu kurwanya icyorezo cya COVID-19, avuga ko ari yo mpamvu nyamukuru yatumye baha u Rwanda kwakira amarushanwa Nyafurika ane muri uyu mwaka wa 2021.

Igikombe cy’Isi cya Cricket kizabera muri Australia mu mpera z’umwaka utaha wa 2022.

Uganda, Kenya, Tanzania na Nigeria bigiye guhatanira itike y'Igikombe cy'Isi cya Cricket mu irushanwa rizabera mu Rwanda
Byiringiro Emmanuel ushinzwe ibikorwa bya RCA, yavuze ko ikigereranyo cy'ibyo u Rwanda rushobora kwinjiza mu marushanwa ane rumaze kwakira kigera kuri miliyoni 900 Frw
Umuyobozi ushinzwe iterambere ry’umukino wa Cricket muri Afurika, Justine Ligyalingi, yashimiye ubuyobozi bwa RCA uburyo bwateguye neza amarushanwa bwahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .