00:00:00 IGIHE NETWORK KN KINYARWANDA EN ENGLISH FR FRANCAIS

Cricket: Ibihugu bine bigiye gushakira itike y’Igikombe cy’Isi mu Rwanda

Yanditswe na Eric Tony Ukurikiyimfura
Kuya 16 Ugushyingo 2021 saa 10:51
Yasuwe :
0 0

Hagati ya tariki ya 17 n’iya 20 Ugushyingo 2021, mu Rwanda hazabera imikino Nyafurika y’amajonjora ya nyuma yo gushaka itike y’Igikombe cy’Isi cya Cricket mu bagabo izahuza ibihugu bine.

Iyi mikino izatanga ikipe imwe izabona itike y’Igikombe cy’Isi cya Cricket mu 2022 izitabirwa na Tanzania, Kenya, Uganda na Nigeria kuri Stade Mpuzamahanga y’i Gahanga no muri IPRC Kigali.

Mu kiganiro n’abanyamakuru cyabaye kuri uyu wa Kabiri, Umuyobozi ushinzwe ibikorwa mu Ishyirahamwe Nyarwanda rya Cricket “RCA”, Byiringiro Emmanuel, yavuze ko imyiteguro y’iri rushanwa ihagaze neza ndetse bafite icyizere ko u Rwanda ruzahabwa no kwakira andi marushanwa.

Ati “Ikintu cya mbere gishimishije ni uko twateguye aya marushanwa, cyane cyane ko abantu benshi batumvaga ko u Rwanda rushobora kubikora, bazi ko rufite ikibuga kimwe, ariko dufite bibiri. Twerekanye ko dufite ubushobozi bwo gutegura amarushanwa kandi dufite icyizere ko bazaduha indi mikino tukayakira.”

Umuyobozi ushinzwe iterambere ry’umukino wa Cricket muri Afurika, Justine Ligyalingi, yashimiye ubuyobozi bwa RCA, avuga ko urwego bagaragaje mu gutegura iyi mikino Nyafurika, ubushishozi n’ubuhanga bakoresheje bibaha amahirwe yo kuzakira andi marushanwa atandukanye.

Yashimiye kandi Leta y’u Rwanda ku mbaraga ishyira mu kurwanya icyorezo cya COVID-19, avuga ko ari yo mpamvu nyamukuru yatumye baha u Rwanda kwakira amarushanwa Nyafurika ane muri uyu mwaka wa 2021.

Uganda na Tanzania zageze muri iki cyiciro binyuze mu marushanwa abiri u Rwanda rwakiriye mu minsi ishize, aho zabaye iza mbere mu Itsinda A na B uko zikurikirana.

Ku munsi wa mbere w’iyi mikino uzakinwa ku Gatatu tariki ya 17 Ugushyingo, Nigeria izakina na Tanzania i Gahanga naho Kenya ihure na Uganda muri IPRC Kigali guhera saa Tatu n’iminota 45. Guhera saa Saba n’iminota 45, Uganda izakina na Nigeria i Gahanga naho Kenya ikine na Tanzania muri IPRC Kigali.

Amakipe yose azahura hagati yayo, akine umukino ubanza n’uwo kwishyura ubundi hazarebwe iyatsinze imikino myinshi kurusha izindi.

Igikombe cy’Isi cya Cricket kizabera muri Australia mu mpera z’umwaka utaha wa 2022.

Uganda, Taniza, Kenya na Nigeria bigiye gushakira itike y'Igikombe cy'Isi cya Cricket i Kigali
Ibihugu byose bizahura hagati yabyo byishakamo kimwe kizabona itike

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .