Bwa mbere mu Rwanda hagiye kubera isiganwa rya Moto zica mu bigeragezo

Yanditswe na Manzi Rema Jules
Kuya 13 Nzeri 2018 saa 12:50
Yasuwe :
0 0

Ku nshuro ya mbere mu Rwanda hateguwe isiganwa ridasanzwe rya moto zica mu mazi, zikaguruka ibiti n’amabuye, rizabera mu Karere ka Bugesera kuri uyu wa Gatandatu tariki 15 Nzeri.

Iri siganwa ryateguwe n’Ishyirahamwe ry’umukino wo gusiganwa mu modoka (RAC) ku bufatanye n’Akarere ka Bugesera na Tuuza Inn Hotel, ari na yo yubatsemo ikibuga rizaberamo.

Nk’uko IGIHE yabitangarijwe na Nyiridandi Fabrice Yoto, ukuriye itsinda ry’abari kuritegura, yavuze ko ritandukanye cyane na moto zari zimenyerewe mu Rwanda ziguruka cyangwa izikora imyiyereko ahabaye amasiganwa y’imodoka.

Yagize ati “Iri ni isiganwa rigiye kuba ku nshuro ya mbere, ritandukanye n’ayo twari dusanzwe dukora y’abakinnyi ba hano imbere mu gihugu ndetse na ziriya moto zimenyerewe zisusurutsa abantu mu masiganwa y’imodoka.”

“Iri riri mu rwego rwa shampiyona ya za moto yatangiriye muri Uganda muri Weurwe icyo gihe inegukanwa n’Umunyarwanda Hendrik Nikel. Ubu hagezweho u Rwanda, rikazitabirwa n’ikipe yo mu Rwanda n’indi yo muri Uganda.”

Ikipe yo mu Rwanda izaba igizwe n’abakinnyi 10 harimo bane bazakina mu cyiciro cy’abana, na ho iyo muri Uganda izaba igizwe n’abakinnyi barindwi bakuru na batatu bazakina mu bana.

Yoto yavuze ko bubatse ikibuga cya moto kigizwe n’ikirometero kimwe na metero 800 muri Tuuza Inn ariko bitewe n’uburyo kiba gikoze, ari isiganwa rizaryohera abazarireba kuko abakinnyi bazaba baca mu mitego idasanzwe.

Yagize ati “Ntabwo abantu basiganwa mu muhanda usanzwe. Ikibuga kiba kirimo amazi menshi, hatambitsemo ibiti n’ibindi bigeragezo byinshi ku buryo riryohera cyane abantu barireba.”

Kwinjira aho isiganwa rizaba ribera nta cyo bisaba kwishyura ndetse abashaka gusohoka mu mpera z’icyumweru bazaba bashobora kubona ibyo bifuza byose hafi yabo kuko Tuuza Inn yabiteguye.

Ikibuga abakinnyi bakiniramo ni gutya kiba cyubatse
Iri siganwa ni ubwa mbere rigiye kuba mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza