Afurika y’Epfo yakoreye amateka k’u Bwongereza ibutwara igikombe cy’Isi cya Rugby (Amafoto)

Yanditswe na Eric Tony Ukurikiyimfura
Kuya 2 Ugushyingo 2019 saa 10:36
Yasuwe :
0 0

Ikipe y’igihugu cya Afurika yakoze amateka yo kwegukana igikombe cy’Isi cy’umukino wa Rugby ku nshuro ya gatatu, ni nyuma yo gutsinda u Bwongereza amanota 32-12 ku mukino wa nyuma wabaye kuri uyu wa Gatandatu i Yokohama mu Buyapani.

Amakipe yombi yaherukaga guhurira ku mukino wa nyuma w’iri rushanwa mu 2007 ubwo u Bwongereza bwatsindwaga na Afurika y’Epfo i Paris.

Kuri iyi nshuro, muri iri rushanwa riba nyuma y’imyaka ine, ibihugu byombi byahuriye mu Mujyi wa Yokohama, mu mukino wari ufite byinshi uvuze.

Ubwo haburaga iminota itanu ngo igice cya mbere cy’iminota 40 kirangire, amakipe yombi yanganyaga amanota 6-6, ariko Handre Pollard atsindira Afurika y’Epfo penaliti ebyiri z’amanota atandatu, bajya kuruhuka ari 12-6.

Mu gihe kugeza ku munota wa 66 harimo ikinyuranyo cy’amanota atandatu (12-18), Afurika y’Epfo yahise itsindirwa amanota atanu na Makazole Mapimpi kuri try byabaye ngombwa ko hifashishwa ikoranabuhanga rya VAR hasuzumwa niba umupira atawuvanye hanze.

Cheslin Kolbe yatsinze andi manota atanu yashimangiye intsinzi ya Afurika y’Epfo kuri try nyuma yo gusiga abakinnyi b’u Bwongereza mu gihe Pollard yatsinze conversion ebyiri (bagiye bahabwa nyuma yo gutsinda try), umukino urangira ari 32-12.

Kapiteni wa Springboks ya Afurika y’Epfpo, Handre Pollard, yatsinze penaliti esheshatu muri uyu mukino ndetse na conversion ebyiri (z’amanota ane) byatumye atsinda amanota 22 muri 32 ikipe ye yatsinze.

Amanota 12 u Bwongereza bwatsinze muri uyu mukino, yose yatsinzwe na kapiteni Owen Farrell kuri penaliti enye.

Afurika y’Epfo yakoze amateka yo kwegukana iki gikombe cy’Isi ku nshuro ya gatatu, izinganya na Nouvelle Zelande yari imaze kucyegukana inshuro nyinshi.

Nouvelle Zelande yegukanye umwanya wa gatatu itsinze Wales amanota 40-17 mu mukino wabaye kuri uyu wa Gatanu.

Abakinnyi bari bitabajwe ku mpande zombi:

U Bwongereza: Daly; Watson, Tuilagi, Farrell, May (Joseph), Ford (Slade), Youngs (Spencer); M Vunipola (Marler), George (Cowan-Dickie), Sinckler (Cole), Itoje, Lawes (Kruis), Curry, Underhill (Wilson), B Vunipola.

Afurika y’Epfo: Le Roux (Steyn); Kolbe, Am, De Allende, Mapimpi; Pollard, De Klerk (Jantjies); Mtawarira (Kitshoff), Mbonambi (Marx), Malherbe (Koch), Etzebeth (Snyman), De Jager (Mostert), Kolisi (Louw), Du Toit, Vermeulen.

Inkuru bijyanye: Bimwe mu by’ingenzi byagufasha gusobanukirwa n’umukino wa Rugby

Kapiteni w'u Bwongereza Owen Farrell ni we watsinze amanota yose bwabonye kuri penaliti
Maro Itoje ashaka uko agera ku mupira
Rugby igaragaramo abakinnyi bafite ibigango
Pollard yatsinze imipira y'imiterekano yavuyemo amanota 22 muri uyu mukino
Mapimpi asiga abakinnyi b' u Bwongereza mu gice cya kabiri
Kolbe atsinda amanota atanu ya try mu minota ya nyuma y'umukino
Byari ibyishimo kuri Afurika y'Epfo ubwo umukino wari urangiye
U Bwongereza bwashakaga igikombe cy'Isi ku nshuro ya kabiri, bwongeye gutungurirwa ku mukino wa nyuma
Afurika y'Epfo yegukanye igikombe cy'Isi cya Rugby ku nshuro ya gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza