00:00:00 IGIHE NETWORK KN KINYARWANDA EN ENGLISH FR FRANCAIS

Abakinnyi batakingiwe COVID-19 ntibemerewe kwitabira Australian Open

Yanditswe na Eric Tony Ukurikiyimfura
Kuya 20 Ugushyingo 2021 saa 01:27
Yasuwe :
0 0

Umuyobozi w’irushanwa rya Tennis rya Australian Open, Craig Tiley, yavuze ko abakinnyi batikingije COVID-19 batazemererwa kuryitabira mu mwaka utaha wa 2022.

Australian Open iheruka kwegukanwa na Novak Djokovic, izongera kuba hagati ya tariki ya 17 n’iya 30 Mutarama 2022.

Hari hashize iminsi havugwa ibitandukanye n’abayobozi ba Australia ku mabwiriza ashobora kuzarangira iri rushanwa mu mwaka utaha.

Umuyobozi w’irushanwa, Craig Tiley, yavuze ko abakinnyi batazaba barakingiwe batazitabira Australian Open izitabirwa n’abafana mu 2022 ndetse na Djokovic yabimenyeshejwe.

Ati “Novak arabizi ko agomba kuba yarikingije kugira ngo abashe gukina. Twifuza kumubona hano.”

Novak Djokovic watwaye iri rushanwa muri Gashyantare uyu mwaka, aherutse kuvuga ko adahobora gutangaza mu ruhame ukuri kwe ku bijyanye no kwikingiza COVID-19.

Imibare iheruka igaragaza ko abakinnyi 80 muri 100 ba mbere muri Tennis y’abagabo bamaze gukingirwa COVID-19 mu gihe Ishyirahamwe rya Tennis y’Abagore (WTA) ritaratangaza imibare yabo.

Komisiyo y’abakinnyi muri WTA yoherereje ibaruwa abakinnyi mu Ukwakira, ivuga ko yabwiwe ko bose bagomba kuzitabira irushanwa i Melbourne.

Ibaruwa yavugaga kandi ko uretse kuba abakinnyi bose bagomba kuba barikingije COVID-19, bagomba kuba bafite ibisubizo byo mu masaha 72 bigaragaza ko batarwaye icyo cyorezo cyibasiye Isi.

Australia ni kimwe mu bihugu byashyizeho amabwiriza akomeye mu bijyanye n’ingendo muri ibi bihe bya COVID-19.

Abakinnyi, abayobozi n’abasifuzi bitabiriye irushanwa rya 2021 ryabaye mu ntangiriro z’uyu mwaka, bose basabwe kujya mu kato k’ibyumweru bibiri ubwo bageraga muri Australia.

Bamwe ntibemerewe kuva muri hoteli ubwo hari ubwandu bwa COVID-19 bwabonekaga mu bo bazanye mu ndege, byatumye imyitozo ikorerwa mu byumba.

Novak Djokovic yabwiwe ko kugira ngo yitabire Australian Open aheruka kwegukana, agomba kuba yarakingiwe COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .