00:00:00 IGIHE NETWORK KN KINYARWANDA EN ENGLISH FR FRANCAIS

Abakinnyi 172 bitabiriye Shampiyona y’Igihugu ya Kung-Fu Wushu

Yanditswe na Eric Tony Ukurikiyimfura
Kuya 22 Ugushyingo 2021 saa 07:26
Yasuwe :
0 0

Abakinnyi 172 baturutse mu makipe 21 ni bo bitabiriye Shampiyona y’Igihugu ya Kung-Fu Wushu yabaye ku Cyumweru, tariki ya 21 Ugushyingo 2021, muri Petit Stade i Remera.

Iyi Shampiyona yaherukaga kuba mu 2019, yabaye hubarizwa ingamba zo kwirinda COVID-19 zirimo no kuba abakinnyi barapimwe COVID-19.

Mu bakinnyi 172 bo mu makipe 21 bayitabiriye, harimo abakobwa 31 n’abahungu 141, bose barushanyijwe mu byiciro birimo kurwana (Sanda) no kwiyerekana (Taulu).

Mu cyiciro cyo kurwana no gukirana (Sanda) harushanyijwe abakinnyi bari hagati y’imyaka 18 na 35, aho abatsinze (bahawe imidali ya Zahabu) barimo Hitimana Eugène, Nkurunziza Eric, Mugisha Emmanuel, Gihozo Maurice, Iradukunda Jérémie na Nshimiyimana Alex.

Mu cyiciro cyo kwiyerekana (Taulu) hitabiriye abana bari hagati y’imyaka 10 na 15 n’abafite kuva ku myaka 16 kuzamura. Abegukanye imidali ya Zahabu ni Niyomwungeri Jimmy, Ndayishimiye Djamal, Niyonsaba Evode, Ibyikora Egide na Mutuyimana Emmanuel mu bahungu naho mu bakobwa ni Uwimpuhwe Emertha na Umurerwa Fanny.

Perezida w’Ishyirahamwe Nyarwanda rya Kung-Fu Wushu, Uwiragiye Marc, yavuze ko nubwo icyorezo cya COVID-19 kigihari, ariko ubwitabire bwabaye muri iri rushanwa butanga icyizere cyo gusubukura amarushanwa uko bisanzwe.

Ati “Icyizere kirahari kuko niba uyu munsi dufite abakinnyi bangana gutya babashije kwitabira kandi bavuye imihanda yose ni ibintu biza kuduha ishusho y’intangiriro kandi intangiriro tubona ko ari nziza nyuma y’igihe abantu bari bamaze muri COVID-19 badakora siporo uko bisanzwe.”

Yakomeje avuga ko kuba iyi Shampiyona yarateguwe mu gihe hashize iminsi mike u Rwanda n’u Bushinwa byizihije imyaka 50 y’ubucuti ari “amahirwe adasanzwe”.

Ati “Umukino dukina ukomoka mu Bushinwa kandi noneho tukawukina turi Abanyarwanda, bivuze ko muri wa muco abantu basangiye ni intambwe ikomeye cyane kuko ni ikintu dufite kiduhuza.”

Umujyanama wungirije muri Ambasade y’u Bushinwa mu Rwanda, Xing Yuchun, yavuze ko urwego Abanyarwanda bagezeho mu mukino wa Kung-Fu Wushu rushimishije nubwo utarugereranya n’urw’Abashinwa.

Ati “Ugereranyije urwego rw’umukino hano mu Rwanda n’urwo mu Bushinwa, ruri hasi, ntabwo rushimishije, ariko urugereranyije n’abandi banyamahanga bakina Kung-Fu Wushu, nakubwira ko nyuzwe n’uko bimeze kuko hari abahungu b’abakobwa bakiri bato, bafite imyaka 10, bagaragaza ko bashaka kumenya uyu mukino kandi bagaragaza ko bazavamo abahanga cyane mu gihe kiri imbere.”

Yongeyeho ko bazakomeza gushyigikira uyu mukino mu buryo bwose kuko ari kimwe mu bikorwa bihuza ibihugu byombi nk’uko bimeze ku mukino wa Table Tennis.

Uretse Shampiyona iba mu Ugushyingo cyangwa mu Ukuboza, Ishyirahamwe rya Kung-Fu Wushu risanzwe ritegura amarushanwa arimo iryo Kwibuka Abatutsi bazize Jenoside mu 1994 riba muri Kamena buri mwaka n’irindi rya ‘Junior Championship’ rihuza abana bato bari hagati y’imyaka ine na 16, riba muri Kanama.

Abakinnyi bari hagati y'imyaka 18 na 35 ni bo bahatanye mu cyiciro cyo kurwana
Abakiri bato berekanye ubuhanga bafite muri Kung-Fu Wushu
Uwiragiye Marc uyobora Ishyirahamwe rya Kung-Fu Wushu aganira n'Umujyanama wungirije muri Ambasade y’u Bushinwa mu Rwanda, Xing Yuchun
Abasifuzi bareba uko abakinnyi biyerekana
Xing Yuchun yavuze ko urwego umukino wa Kung-Fu Wushu uriho mu Rwanda utanga icyizere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .