Mario Mandžukić yarijije Abongereza ageza Croatia ku mukino wa nyuma w’Igikombe cy’Isi

Yanditswe na Manzi Rema Jules
Kuya 11 Nyakanga 2018 saa 11:27
Yasuwe :
1 0

Ikipe y’Igihugu ya Croatia yageze ku mukino wa nyuma w’Igikombe cy’Isi aho igomba kwisobanura n’u Bufaransa mu mpera z’iki cyumweru, nyuma yo gutsinda ikipe y’igihugu y’u Bwongereza ibitego 2-1, mu mukino wabereye kuri Luzhniki Stadium.

Myugariro Kieran Trippier ni we wabonye igitego cya mbere ku ruhande rw’u Bwongereza ku munota wa 5 gusa, agitsinze neza ku mupira w’umuterekano. Gusa Ivan Perišić usanzwe akinira Inter Milan yaje kucyishyura ku munota wa 68.

Iminota 90 y’umukino yarangiye amakipe yombi anganya 1-1, hitabazwa iminota 30 y’inyongera, maze Mario Mandžukić ukinira ikipe ya Juventus yo mu Butaliyani, araza nabi Abongereza ubwo yashyiragamo igitego cya kabiri ku munota wa 109.

Croatia yahise ibona itike yo gukina umukino wa nyuma w’igikombe cy’Isi aho izacakirana n’u Bufaransa kuri Luzhniki Stadium mu murwa mukuru Moscow, ku wa 15 Nyakanga 2018.

U Bwongereza bugomba kubanza guhatanira n’u Bubiligi umwanya wa gatatu, umukino uteganyijwe ku wa Gatandatu.

Iyi yari inshuro ya mbere u Bwongereza bugeze mu mikino ya kimwe cya kabiri nyuma ya 1990, ikaba n’iya mbere kuri Croatia nyuma ya 1998. Ni n’inshuro ya mbere Croatia igiye gukina umukino wa nyuma w’Igikombe cy’Isi.

Croatia inakuyeho agahigo kari kamaze imyaka 20, iba ikipe ya mbere ibashije gutsinda umukino wa kimwe cya kabiri mu Gikombe cy’Isi kandi ari yo yabanjwe igitego, nyuma y’u Bufaransa bwabikoze mu 1998 bubikoreye kuri iki gihugu n’ubundi.

Umukino watangiye abafana bibaza uza gutsinda
Ba Kapiteni: Luka Modric wa Croatia na Harry Kane w'u Bwongereza baramukanya mbere y'umukino
Dele Alli yacungirwaga hafi n'abakinnyi ba Croatia, aha yaguye barwanira umupira
Kieran Trippier yafunguye amazamu y'Abongereza, umukino uhita uhindura isura
Danijel Subašić wari mu izamu rya Croatia yirambuye ngo arebe ko umupira yawugeraho, biba iby'ubusa
Byabaye ibyishimo ku Bongereza, gusa ntibyarambye
Abakinnyi bakomeje kugundagurana, nta we ukeneye guha undi urwaho
Ivan Perisic yaje kwishyura igitego ku munota wa 68 maze ibintu bisubira ibubisi
Umuzamu w'Abongereza Jordan Pickford yashidutse umupira winjiye mu rushundura
Mario Mandzukic yashyizemo igitego cya kabiri cya Croatia
Ibyishimo by'Abongereza ntibyarambye
Modric ntiyanyuzwe n'ibyemezo byose by'umusifuzi
Croatia mu byishimo nyuma yo kugera ku mukino wa nyuma w'Igikombe cy'Isi ku nshuro ya mbere
Mandzukic na Perisic, bombi bahesheje Croatia intsinzi
Ivan Rakitic yashwanye na Dele Alli umusifuzi aritambika
Uyu yabuze uko yifata kubera uburyo Croatia yari ibamereye nabi
Agahinda kabaye kenshi ku bakunzi ba 'Three Lions', ikipe y'igihugu y'u Bwongereza
Uyu mugabo wareberaga umupira muri Hyde Park i London we kwihangana byamunaniye ararira
Abongereza bararanye agahinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza