00:00:00 IGIHE NETWORK KN KINYARWANDA EN ENGLISH FR FRANCAIS

Hoteli ya FERWAFA y’inyenyeri enye izuzura mu mwaka umwe

Yanditswe na Habimana Sadi
Kuya 29 Kamena 2021 saa 05:58
Yasuwe :
0 0

Ubuyobozi bw’Ishyirahamwe ry’Umupira w’Amaguru mu Rwanda, FERWAFA, bwavuze ko hagiye gusubukurwa ibikorwa byo kubaka hoteli yayo y’inyenyeri enye, izatangwaho arenga miliyari 2 Frw kugira ngo yuzure mu gihe cy’umwaka umwe uri imbere.

Mu 2015 ni bwo hatangiye umushinga wo kubaka hoteli ya FERWAFA ubwo uwari Umuyobozi wa FERWAFA, Nzamwita Vincet De Gaulle, yawutangizaga.

Tariki 25 Gashyantare 2017, Perezida w’Ishyirahamwe ry’Umupira w’Amaguru ku Isi, FIFA, Gianni Infantino, yashyize ibuye ry’ifatizo ahagomba kubakwa hoteli ya FERWAFA. Ubu hakaba hashize imyana ine imirimo ihagaze kandi yari igeze kuri 53%.

Nk’uko byari byateganyijwe, iyi hoteli y’inyenyeri enye yagakwiye kuzura itwaye byibura hafi miliyari enye z’amafaranga y’u Rwanda, ikaba izaba ifite ibyumba 88 yakiriramo abantu batandukanye ndetse n’amakipe y’igihugu akaba yahakorera umwiherero.

Visi Perezida wa FERWAFA, Habyarimana Marcel Matiku, aganira n’itangazamakuru ku wa 27 Kamena 2021, yavuze ko mu gihe cy’amezi 10 ari imbere iyi hoteli izaba yuzuye kuko ibisabwa hafi ya byose byamaze kuboneka.

Ati "Mu gihe kitarenze icyumweru twagakwiye kuba dutangiye imirimo. Amasezerano yo kuyubaka ni amezi 10. Amafaranga yose arahari ajyanye n’amasezerano. Nta mbogamizi n’imwe tuzagira cyeretse rwiyemezamirimo agize izindi mpamvu cyangwa hakahabo ikindi kidasanzwe cyatuma tudakomeze nk’uko biteganyijwe. Turizera ko nko mu mwaka hoteli izaba itangiye gukora."

Habyarimana yavuze ko banaganiriye n’Ishyirahamwe ry’Umupira w’Amaguru ku Isi, FIFA, rikabemerera kuba bakoresha inkunga irenga miliyari 2 Frw babonye bahawe n’Ishyirahamwe ry’Umupira w’Amaguru mu Bwami bwa Maroc.

Ati “Iriya nyubako yari imaze hafi imyaka ine yarahagaze. Imirimo yari igeze kuri 53%, twagombaga kubanza kurangiza amasezerano ya mbere yari hagati y’Abashinwa, Federasiyo ndetse na PRISME yakurikiranaga iyo mirimo. Ibyo byarabaye birarangira, barishyurwa.“

“Nyuma hakurikiyeho gahunda yo gusubukura imirimo. Inkunga ya Federasiyo y’Umupira w’Amaguru muri Maroc twarayibonye, miliyoni 2,5$, binyuzwa muri FIFA na bo batwandikira ko iyo nkunga kuri ubwo bufatanye yabonetse ari yo tugomba guheraho.“

Yakomeje avuga ko isoko ryo kubaka iyi hoteli, ryamaze gutangwa [rigasubizwa Sosiyete y’Abashinwa ya China Civil Engineering Construction Company (CCECC Rwanda Ltd)] ndetse ko hari n’amafaranga yamaze guhabwa abatsindiye isoko.

Ati “Isoko ryatanzwe ku Bashinwa ni miliyari 2,6 Frw kugira ngo icyiciro cya mbere cyo kubaka kirangire ku buryo hoteli yatangira gukora, ku buryo dushobora kwakira abantu mu byumba birenze 40 bizaba birimo.’’

Kutabonekera igihe kw’amafaranga bari bemerewe na FIFA na FRMF ya Maroc ni byo byatumye imirimo yo kubaka iyi hoteli ihagarara kuva mu ntangiriro za 2018.

Nyuma y’amatora yo gutoranya igihugu kizakira Igikombe cy’Isi mu 2016, FERWAFA yongeye gusaba Ishyirahamwe ry’Umupira w’Amaguru mu Bwami bwa Maroc ko ryabaha inkunga ryemeye kugira ngo umushinga ugezwe ku rwego FIFA yifuzaga ikabona kurekura amafaranga yayo ndetse ku bufasha bw’uru rwego ruyobora umupira w’amaguru ku Isi, Abarabu bemeye gutanga inkunga yabo.

Inkuru bifitanye isano: FERWAFA yasobanuye idindira rya hotel yayo n’uko amafaranga ya Maroc yashoboraga kwitwa ruswa

Igishushanyo mbonera cya Hoteli ya Ferwafa
Ni hoteli izaba iri mu Murenge wa Remera mu Karere ka Gasabo
Mu 2017 ni bwo Gianni Infantino uyobora FIFA yashyize ibuye ry'ifatizo kuri Hoteli ya Ferwafa
Imirimo yo kubaka hoteli ya FERWAFA yahagaze itarangiye mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .