00:00:00 IGIHE NETWORK KN KINYARWANDA EN ENGLISH FR FRANCAIS

Zinédine Zidane yatandukanye na Real Madrid ku nshuro ya kabiri

Yanditswe na Habimana Sadi
Kuya 27 Gicurasi 2021 saa 04:39
Yasuwe :
0 0

Uwari Umutoza Mukuru wa Real Madrid, Zinédine Zidane, yatandukanye n’iyi kipe yanditsemo amateka yo guhesha ibikombe bitatu bya Uefa Champions League.

Inkuru yo gutandukana kwa Real Madrid na Zidane wayitozaga yamenyekanye mu gitondo cyo kuri uyu wa Kane, tariki ya 27 Gicurasi 2021.

Ni icyemezo uyu Mufaransa w’imyaka 48 yafashe nyuma y’uko iyi kipe yatozaga yananiwe kwegukana na kimwe mu bikombe yakinnyemo birimo icy’Umwami [Copa del Rey] yasezerewe na Club Deportivo Alcoyano, icya Shampiyona [La Liga] cyegukanywe na mukeba Atletico Madrid n’icya Champions League yakuwemo na Chelsea muri 1/2.

Ni ku nshuro ya mbere kuva mu myaka 11 ishize, Real Madrid yasoje umwaka nta gikombe na kimwe itwaye.

Ibinyamakuru byo ku Mugabane w’u Burayi byari byatangiye kunuganuga ibyo gutandukana kwa Zidane na Real Madrid mbere y’uko Shampiyona irangira.

Uyu mutoza yatandukanye na Real Madrid nyuma yo gutakaza igikombe cya shampiyona muri Espagne, cyegukanywe na Atlético Madrid.

Amasezerano ya Zidane yagombaga kuzarangira muri Kamena 2022 ariko yayasheshe tariki ya 22 Gicurasi 2021, hanyuma ubuyobozi bubyemeza uyu munsi tariki ya 27 Gicurasi 2021.

Zinédine Zidane ufatwa nk‘inyenyeri muri Real Madrid, yayihesheje ibikombe bitatu bya Uefa Champions League (2016-2018) ahita asezera. Yongeye kugaruka muri iyi Kipe y’i Bwami muri Werurwe 2019.

Mu gihe Zidane yamaze muri Real Madrid mu nshuro zombi yahanyuze yatwaranye nayo ibikombe bya 11 harimo bitatu bya Uefa Champions Legue, bibiri bya shampiyona, bibiri bya Super Coupe ya Espagne, bibiri bya Super Coupe ya UEFA n’ibikombe bibiri by’Isi yegukanye ku rwego rw’ama-clubs.

Uyu mugabo wubashywe mu Mujyi wa Madrid, yasezeye nyuma yo gutoza Real Madrid imikino 263. Mu myaka ibiri yari ayimazemo yatwaranye nayo igikombe cya shampiyona cy’umwaka ushize wa 2019/2020.

Zidane aravugwa ko ashobora kwerekeza mu makipe arimo PSG y‘iwabo mu Bufaransa na Juventus yo mu Butaliyani yanabereye umukinnyi.

Mu batoza bavugwa mu bashobora gusimbura Zidane harimo Raúl Gonzalez wakiniye Real Madrid na Maximiliano Allegri watoje amakipe arimo Juventus yo mu Butaliyani.

Zinédine Zidane yamaze gutandukana na real Madrid yari agifitiye amasezerano yo kugeza muri 2022
Maximiliano Allegri ari mu batoza bari guhabwa amahirwe yo gusimbura Zidane muri Real Madrid

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .