Zanaco FC yasezereye APR FC, yatunguye na Young Africans ya Haruna Niyonzima

Yanditswe na Manzi Rema Jules
Kuya 18 Werurwe 2017 saa 08:26
Yasuwe :
0 0

Zanaco FC yo muri Zambia iheruka gusezerera APR FC mu mikino ya CAF Champions League yongeye no gutungura Young Africans yo muri Tanzania, ikinamo Umunyarwanda Haruna Niyonzima, yahabwaga amahirwe yo kujya mu matsinda, iyisezerera ku gitego yayitsindiye hanze nyuma yo kunganya ubusa ku busa.

Zanaco FC yari yahuye na APR FC yo mu Rwanda mu cyiciro cya mbere cy’amajonjora ya CAF Champions League zinganya ubusa ku busa i Lusaka igeze i Kigali ihatsindira 1-0 ihita inayisezerera.

Iyi kipe yagombaga guhangana na Young Africans ya Kapiteni w’Amavubi, Haruna Niyonzima mbere yo kugera mu matsinda, mu mukino wahuje impande zombi mu cyumweru gishize wabereye i Dar es Salaam muri Tanzania yanganyije igitego kimwe kuri kimwe.

Young umwaka ushize yari yageze mu matsinda, yerekeje i Lusaka gukina umukino wo kwishyura ifite icyizere ko yakwihagararaho igatsinda ariko ntibyayihiriye kuko abasore b’umutoza Numba Mumamba bayihagaritse, iminota 90 irangira itabashije kwinjiza igitego nubwo nayo ntacyo yinjijwe. Ibi byatumye ihita isezererwa ku gitego yatsindiwe iwayo.

Young Africans, Atlabara, Kampala CCA, CF Mounana kimwe n’andi makipe azasezererwa muri iki cyiciro niyo azahura n’ayakomeje muri CAF Confederation Cup arimo na Rayon Sports ihagarariye u Rwanda atsinze akazahita nayo yerekeza mu matsinda y’iri rushanwa.

Zanaco FC yasezereye Young Africans nyuma yo kunganya nayo ubusa ku busa mu mukino wabereye i Lusaka
Haruna Niyonzima (wambaye umuhondo) ntiyabashije gufasha ikipe ye gukomeza mu matsinda ya CAF Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza