00:00:00 IGIHE NETWORK KN KINYARWANDA EN ENGLISH FR FRANCAIS

Yeguye cyangwa yegujwe? Imyaka itatu n’iminsi 14 ya Rtd Brig Gen Sekamana ku buyobozi bwa FERWAFA

Yanditswe na Eric Tony Ukurikiyimfura
Kuya 15 Mata 2021 saa 11:33
Yasuwe :
0 0

Nyuma y’imyaka itatu ku buyobozi bw’Ishyirahamwe ry’Umupira w’Amaguru mu Rwanda, FERWAFA, (Rtd) Brig Gen Sekamana Jean Damascène yeguye ku wa Gatatu tariki ya 14 Mata 2021 kuko atagishobora kubangikanya imirimo ye n’ibyo akora bimubeshejeho nk’umuntu uri mu kiruhuko cy’izabukuru.

Ku wa 31 Werurwe 2018 ni bwo Rtd Brig Gen Sekamana yatowe asimbuye Nzamwita Vincent De Gaulle wari umaze imyaka ine ayobora FERWAFA.

Yatowe atsinze Rurangirwa Louis ku majwi 45 kuri 7 mu bantu 53 batoye. Ijwi rimwe niryo ryabaye imfabusa.

Rtd Brig. Gen. Sekamana wabaye Umuyobozi wa Kiyovu Sports mu 1997, akananyura mu buyobozi bw’amakipe atandukanye y’uturere yabaga akoreramo akazi, yavuze ko mu kigereranyo yakoze ku mupira w’amaguru n’izindi nzego z’igihugu kuva mu 1994 nyuma ya Jenoside yakorewe Abatutsi, yagaragaje ko arirwo rwego rudatera imbere akaba ari nayo mpamvu yiyemeje kuzamo kugira ngo atange umusanzu we.

IGIHE yasubije amaso inyuma ireba bimwe mu byaranze ubuyobozi bwe mu myaka itatu ishize:

Kuva ku munsi wa mbere, yateguje ko ashobora kwegura

Mu ijambo yavuze akimara kwicara ku ntebe yo kuyobora Ferwafa, Gen Sekamana Jean Damascène yasezeranyije abakunzi ba ruhago n’abanyamuryango ba Ferwafa ko mu gihe azabona ko inshingano yihaye zimunaniye kubera imikorere ye mibi azafata icyemezo.

Yongeyeho ati “Ubwo rero wubakira ku bihari ukongeraho bike ufite ukagaragaza icyo wabashije gukora. Buriya ikibazo cyabaho ni uko wananirwa unanijwe n’imikorere mibi yawe. Ninanizwa n’imikorere mibi nzegura rwose mvemo ariko ninkora bikagaragara ko hari ibyo ntagezeho ku mpamvu zitanturutseho, icyo gihe tuzafatanya n’abandi gushaka igisubizo.”

Kunanizwa byaba ari byo bitumye Brig Gen Sekamana agenda

Nubwo impande zombi ziterura ngo zivuge, nta cyakuraho ko habayeho ndetse hakunda kubaho kugongana, kutumvikana hagati ya FERWAFA na Minisiteri ya Siporo bishingiye cyane ku Ikipe y’Igihugu.

FERWAFA yemeje ko Mashami Vincent adatanga umusaruro bityo atazongererwa amasezerano mu 2020 no mu 2021, ariko kuri izo nshuro zombi, Minisiteri ya Siporo ihemba uyu mutoza, yemeje ko ari we ukomeza guhabwa akazi.

Bamwe mu baganiriye na IGIHE bavuze ko gusezera kwa Sekamana bishobora kuba bifite aho bihuriye n’Ikipe y’Ikipe y’Igihugu binyuze muri Minisiteri ya Siporo.

Umwe yagize ati "Dutsinda Perezida ntaho yajya, ariko niba dutsindwa kandi Minisiteri ariyo ishyiraho umutoza, urumva aho ikibazo kiri kandi umusaruro muke ukabarwa kuri FERWAFA."

Bivugwa ko uburyo Sekamana yemeye ibyo yabwiwe na Minisiteri ko "Mashami yongererwa amasezerano" kandi Komite Nyobozi yari yemeje ko hashakwa undi mutoza, byafashwe nko "guhemukira abanyamuryango."

Ntaca ku ruhande kandi yagiraga ukuri

Mu gihe abayobozi benshi muri siporo bakunda kumvikana baca ku ruhande ibitagenda mu mashyirahamwe cyangwa inzego bayobora, kuri Sekamana ntibyari uko.

Ubwo yabaga ari kuganira n’abanyamakuru imbonankubone, ntiyatinyaga kuvuga aho ibintu byose bipfira ndetse n’ikibuga kugira ngo bikosoke.

Muri Gashyantare uyu mwaka, ubwo yari abajijwe n’Umunyamakuru wa Televiziyo Rwanda niba FERWAFA yaba itumvikana na Minisiteri ya Siporo, Rtd Brig Gen Sekamana yagize ati “Nta kibazo gihari […] Ikibazo ahubwo iyo abantu bateguye gukora ibintu hari igihe hazamo za kidobya zituma abantu babyitirira abandi. Iyo habaye ikibazo turicara tukaganira, n’abatekinisiye turicara tukaganira.”

Icyo gihe, Minisitiri wa Siporo, Munyangaju Aurore Mimosa, yavuze ko “Nta kibazo gihari”. Yakomeje agira ati “Dushobora kuba [ingingo runaka] tutayumva kimwe dutangiye ariko tukarangiza inama twabishyize ku murongo.”

Yabaye Umuyobozi wa FERWAFA amaze imyaka 20 ataba mu mupira

Kuri bamwe bakumva bitangaje, ariko ku basanzwe mu mupira bazi ko nta gishya kirimo kuko siporo mu Rwanda ifite uko ibayeho, hari abafite ubushobozi bwo kwemeza uyobora urwego runaka ndetse n’abarurimo bakayoboka. Aha ni ho bamwe bakubwira bat “Abamuzanye ubwo ni bo bamusabye kwegura.”

Kwiyamamaza kwe icyo gihe byabaye bitunguranye dore ko yari amaze imyaka 20 atagera ku kibuga kuva avuye ku buyobozi bwa Kiyovu Sports mu 1998, ariko kuri iyi nshuro akaba yari yatanzwe n’ikipe ya Intare FC.

Icyo gihe yavuze ko ari mu batumye De Gaulle akuramo kandidatire aho yagize ati “Sinategereje ko bigera kure ariko nanjye nari mu bamusabye ko ayivanamo ndamubwira nti ‘umupira uriho urapfa reka turebe icyo twakora. Ushobora kuba unakora neza ariko abantu batakwiyumvamo, bishobora gutuma n’ibyo ukora neza byangirika’.”

Yavuze ko kandi yari yarihaye ikiruhuko cy’imyaka 20 atagera ku bibuga kubera akazi ariko kubera ibisa n’akavuyo yawubonagamo, yisubiyeho. Yanavuze ko naramuka adatowe n’ubundi azisubirira mu kiruhuko cye nta bikorwa by’umupira azigera agaragaramo.

Gusa kugenda kwe bikurikiye iyegura ry’uwari Perezida wa Komite Olempike y’u Rwanda, Amb. Munyabagisha Valens, byabaye tariki ya 5 Mata.

Ibi kandi bireberwa mu ndorerwamo y’amatora ya Federasiyo ya Volleyball yahagaritswe mu mpera za Werurwe habura iminsi itatu ngo abe, kimwe n’ibindi bijyanye na byo bizajya ahabona.

Bamwe mu bayobozi b’amakipe ntibamwiyumvagamo

Nubwo bamutoye ku bwiganze bw’amajwi menshi mu 2018, ariko abanyamuryango benshi ba FERWAFA ntibamwibonagamo.

Byashoboka ko yatowe kuko nta yandi mahitamo yari ahari nyuma y’uko yari aje mu mwanya wa Nzamwita Vincent De Gaulle waraje benshi muri bo muri hoteli mbere y’uko amatora yimurwa akava mu Ukuboza 2017, agashyirwa muri Werurwe ya 2018.

Ikipe yamamaje De Gaulle ni yo yashyigikiye Rtd Brig Gen Sekamana, ariko nyuma yo kugera ku buyobozi akabereka ko aje kuyobora, guteka no gukoresha igitsure bamwe bafataga nk’igitugu, benshi muri bo ntibamwiyumvisemo kuko bamufataga nk’ukorera “ku nyungu z’abandi aho gukorera ku nyungu z’abanyamuryango bamutoye” ndetse ngo babona “nta gaciro” abaha.

Mu nama za FERWAFA wasangaga hari itandukaniro n’uwamubanjirije, nta mwanya uhari wo gutakaza ku bintu bisa n’ibyemejwe.

Abandi batishimiye ubuyobozi bwe ni abafite amakipe y’abagore kugeza n’uyu munsi bacyishyuza amafaranga y’inkunga bagenewe na FIFA muri Kamena 2020 nyamara abitse kuri konti za FERWAFA ivuga ko izayabaha nibasubukura amarushanwa, bo bakavuga ko yakabagobotse muri ibi bihe bya COVID-19 kuko ari cyo bayaherewe.

Kumanurwa mu Cyiciro cya Kabiri kw’amakipe ya Gicumbi FC na Heroes ubwo hasozwaga Shampiyona ya 2019/20 imburagihe, guhanwa kwa Rayon Sports yanze kwitabira irushanwa ry’Intwari rya 2020 ndetse na Munyakazi Sadate wayiyoboraga agahanwa no gusezererwa kw’Amagaju FC mu mikino ya play-offs z’Icyiciro cya Kabiri kuko yarwaje COVID-19 na byo biri mu byatumye bamwe batamwiyumvamo.

FERWAFA yatandukanye na AZAM yishyuraga menshi haza BRALIRWA yishyura make

Ubwo Gen Sekamana yageraga ku buyobozi, yasanze Shampiyona y’u Rwanda yerekanwa na Azam TV yayiguze guhera mu 2015, aho yari yashoyemo akabakaba miliyoni $2.35 mu gihe cy’imyaka itanu.

Mu mwaka wa mbere, Azam TV yatanze ibihumbi 350$ mu gihe mu yindi myaka, uyu muterankunga yatangaga ibihumbi 500$ buri mwaka.

Nyuma y’umwaka umwe ku buyobozi, FERWAFA yahise isesa amasezerano na Azam TV, Shampiyona imara imyaka ibiri nta muterankunga ifite.

Gusa kuri ubu, amakipe yamwenyura ko agiye hamaze gusinywa amasezerano ya Bralirwa yemeye gutanga miliyoni 640 Frw mu gihe cy’imyaka ine mu gihe Ikigo cy’Igihugu cy’Itangazamakuru (RBA) cyerekana imikino, cyitezweho miliyoni 20- 40 Frw ku mwaka.

Muri uyu mwaka wa mbere, Bralirwa izatanga miliyoni 180 Frw, ukurikiyeho miliyoni 160 Frw.

Nubwo habonetse uyu muterankunga mushya ntihabura kwibazwa uburyo FERWAFA yahenzwe muri ubu bufatanye ku buryo yabona miliyoni 640 Frw mu myaka ine, nyamara ikipe nka Rayon Sports ihabwa na SKOL asaga miliyoni 600 Frw mu myaka itatu.

FERWAFA yatangiye gukorana na Bralirwa mu mwaka w’imikino wa 2004/05 biza guhagarara kugeza mu 2009 ubwo yasinyaga imyaka itatu yageze mu 2012 kuri miliyoni 335 Frw.

Mu 2012/13, Bralirwa yongereye amasezerano kuri miliyoni 160 Frw mu gihe shampiyona yitwaga Primus National Football League naho mu 2013-2014, yatanze miliyoni 170 Frw shampiyona yitwa Turbo King National Football League.

Aha, ikipe yatwaye shampiyona yahabwaga miliyoni 10 Frw mu gihe mbere y’uko umwaka w’imikino utangira, buri imwe yagenerwaga miliyoni 2 Frw none kuri iyi nshuro, yose hamwe azaba miliyoni 4 Frw ku ikipe imwe.

Amavubi yazamuye urwego

Biragoye kumenya ufite uruhare runini mu kwitwara neza kw’Amavubi mu mikino iheruka hagati Minisiteri ya Siporo iyobowe na Minisitiri Munyangaju Aurore Mimosa cyangwa Rtd Brig Sekamana Jean Damascène na FERWAFA.

Gusa icy’ingenzi ni uko nta wakwirengagiza ibyishimo byabonetse mu Ikipe y’Igihugu mu myaka itatu ishize birimo kubona itike ya CHAN 2020 u Rwanda rusezereye Ethiopia, gusezerera Seychelles mu ijonjora ryo gushaka itike y’Igikombe cy’Isi, kugera muri ¼ cya CHAN 2020 no gutsinda Mozambique byatumye u Rwanda rugera ku mukino usoza iyo mu itsinda rushobora kujya mu Gikombe cya Afurika kizaba mu mwaka utaha nubwo inzozi zitabaye impamo.

Ku rundi ruhande ariko hari ibitaragenze neza byinshi birimo kudahuza kw’inzego zombi (Minisiteri na FERWAFA) mu itegurwa ry’Amakipe y’Igihugu mu byiciro bitandukanye n’imyambaro Amavubi yaserukanye muri CHAN 2020 yavugishije benshi icyo gihe FERWAFA igategekwa gusaba imbabazi.

Yagaruye Amakipe y’Igihugu y’Abakiri bato

Mu myaka itatu ishize nibwo hongeye gushyirwaho ikipe z’Igihugu mu bato nyuma y’imyaka ine zititabira amarushanwa mpuzamahanga, aho Amavubi U-17 yitabiriye amajonjora ya CAN 2019 mu ngimbi.

Mu 2019, ikipe y’Igihugu y’Abatarengeje imyaka 15 yatoranyijwe mu bana bitabiriye amarushanwa y’abato yateguwe Ijabo Rwanda agaterwa inkunga na FERWAFA, yegukanye umwanya wa gatatu muri CECAFA yabereye muri Eythrèe mu gihe mu mwaka ushize wa 2020, u Rwanda rwakiriye CECAFA y’Abatarengeje imyaka 17 yabereye i Rubavu nubwo rutarenze amatsinda.

Ikindi cyo kwishimira ni uko kuri ubu hari igenamigambi ry’igihe gito riri gukoreshwa mu gihe hashize imyaka ibiri hatunganywa gahunda y’igihe kirekire ubuyobozi bwa FERWAFA buvuga ko izamara imyaka 15.

Kwaduka kw’icyorezo cya COVID-19 byatumye amarushanwa yari yateguwe mu bakiri bato haba mu bahungu n’abakobwa adakorwa ndetse bikaba byari guhuzwa na Gahunda y’Umupira w’Amaguru mu Mashuri izaterwa inkunga na FIFA.

Hoteli ya FERWAFA n’ibibuga

Mu mishinga migari FERWAFA yari yarihaye ufatiye ku yatangijwe ku gihe cya Nzamwita Vincent De Gaulle na Gen Sekamana harimo kubaka hoteli y’inyenyeri enye n’ibibuga bitandukanye.

Iyi hoteli yari kuba igizwe n’ibyumba bigera kuri 88, yatangiye kubakwa muri Kanama 2015, aho yagombaga kurangira mu mpera za 2016, ariko kugeza uyu munsi imirimo yo kuyubaka yarahagaze ndetse ntibizwi igihe izasubukurirwa.

Hoteli ya FERWAFA yagombaga kuzura itwaye miliyari 3.81 Frw, yari kuva ku baterankunga babiri b’ingenzi.

Binyuze muri gahunda ya FIFA Forward 1, Ishyirahamwe ry’Umupira w’Amaguru ku Isi ryari ryageneye FERWAFA miliyoni 2$ yo gushyigikira uyu mushinga wa hoteli.

Binyuze kandi mu bwumvikane n’umubano wari hagati ya FRMF ya Maroc na FERWAFA, bemeye ko amafaranga yabo yo muri FIFA, angana na miliyoni 2.25$, azahabwa FERWAFA ikayakoresha mu kuzuza umushinga wayo wo kubaka hoteli.

Nyuma y’uko amafaranga ya Maroc atinze kuboneka bigaharika imirimo y’abari bashinzwe kubaka iyi hoteli (China Civil Engineering Construction Company (CCECC Rwanda Ltd)) n’abashinzwe igenzura, FERWAFA yishyuye agera kuri miliyari 1.15 Frw .

Kuri ubu, FERWAFA yabwiye abanyamuryango ko CCECC Rwanda Ltd ari yo izakomeza kubaka iyi hoteli nubwo bitaramenyekana igihe imirimo izasubukurirwa.

FERWAFA ifite kandi imishinga yo kubaka ibibuga umunani bigezweho, ku ikubitiro hakaba hariyemejwe kubaka icya Gicumbi, Rutsiro na Rusizi muri uyu mwaka wa 2021.

(Rtd) Brig. Gen. Sekamana Jean Damascène yeguye habura amezi agera ku munani ngo manda ye irangire.

Habyarimana ’Matiku’ Marcel usanzwe uri Visi Perezida ni we uyobora FERWAFA kugeza iyi manda irangiye nk’uko amategeko Shingiro ya FERWAFA abigena mu ngingo yayo ya 31, agace ka 8.

Rtd Brig Gen Sekamana Jean Damascène wari umaze imyaka itatu ayobora FERWAFA, yeguye ku wa 14 Mata 2021 ku mpamvu yise ize bwite
Ku buyobozi bwe, FERWAFA yatandukanye na Azam TV, muri uyu mwaka isinyana na Bralirwa
Habyarimana 'Matiku' Marcel usanzwe ari Visi Perezida, ni we ugiye kuyobora amezi umunani yari asigaye kuri manda ya Rtd Brig Gen Sekamana
Rtd Brig Gen Sekamana yiyamamazanyije n'ikipe yari yatoranyijwe na Nzamwita Vincent De Gaulle

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .