Usengimana yafashije APR FC gutsinda Bugesera FC ishyiramo amanota atandatu (Amafoto)

Yanditswe na Eric Tony Ukurikiyimfura
Kuya 12 Mutarama 2020 saa 08:05
Yasuwe :
0 0

Ibitego bya Usengimana Danny byafashije APR FC gutsinda Bugesera FC 2-1 mu mukino w’umunsi wa 17 wabereye kuri Stade ya Kigali i Nyamirambo kuri iki Cyumweru.

APR FC yakiriye uyu mukino idafite abakinnyi batanu kubera ibibazo bitandukanye birimo amakarita y’umuhondo kuri Manzi Thierry na Niyomugabo Claude ndetse n’imvune kuri Mugunga Yves na Ntwari Fiacre.

Ikipe y’ingabo yihariye umupira mu minota ibanza y’umukino ariko Manishimwe Djabel na Usengimana Danny babanirwa kubyaza umusaruro uburyo babonye imbere y’ubwugarizi bwa Bugesera FC bwuhazagurikaga.

Ku bwumvikane buke mu bwugarizi bwa APR FC, Shabani Hussein Tchabalala yateye umupira mu izamu, umunyezamu Rwabugiri atabara izamu rye.

APR FC yafunguye amazamu ku munota wa 15 ku gitego cyatsinzwe na Danny Usengimana waherejwe umupira na Bukuru Christophe, aroba umunyezamu Kwizera Janvier nyuma yo gusiga abakinnyi b’inyuma ba Bugesera FC.

Imanishimwe Emmanuel yananiwe gutsindira APR FC ku mupira yateye ku ruhande mu gihe Nshuti Innocent yahawe na Usengimana umupira, ashatse kuwurenza Kwizera Janvier, uyu munyezamu wa Bugesera FC abyitwaramo neza.

Habura iminota itanu ngo igice cya kabiri kirangire, APR FC yabonye igitego cya kabiri cyatsinzwe na Usengimana Danny na bwo yongeye kuroba umunyezamu wa Bugesera FC.

Bugesera FC yasatiriye APR FC inabona igitego cy’impozamarira cyatsinzwe na Shabani Hussein ku munota wa 55 ndetse uyu rutahizamu ukomoka mu Burundi yuzuza ibitego 11.

Rwabugiri yarokoye APR FC ku mupira ukomeye yakuyemo nyuma yo gutereshwa umutwe na Mugisha François Master mu gihe Byiringiro Lague yateye hanze umupira washoboraga kuvamo igitego cya gatatu mu minota ya nyuma.

Gutsinda uyu mukino byafashije APR FC kuyobora Shampiyona n’amanota 41, irusha amanota atandatu Rayon Sports ya kabiri mu gihe Bugesera FC ifite amanota 23 ku mwanya wa gatandatu.

Mu yindi mikino yabaye uyu munsi, Kiyovu Sports yatsinzwe na Espoir FC igitego 1-0, Mukura Victory Sports inyagira Sunrise FC ibitego 4-1 mu gihe Etincelles FC yatsinzwe na Heroes FC igitego 1-0.

Abakinnyi ba Bugesera FC babanje mu kibuga
Abakinnyi ba APR FC babanjemo
Mutsinzi Ange atera umupira imbere mu gihe Nzabanita David yashakaga kuwuhagarika
Myugariro Kouame Kouakou abuza Mutsinzi gutambuka
Manishimwe Djabel atwara umupira Mustapha Francis
Usengimana Danny yafunguye amazamu nyuma yo gusiga abakinnyi ba Bugesera FC
Usengimana aroba umunyezamu Rihungu ku gitego cya mbere
Usengimana Danny yagize ibitego 10 muri uyu mwaka w'imikino
Masudi Djuma ntiyishimiye imikinire y'abakinnyi be n'ibyemezo by'abasifuzi
Umunyezamu Kwizera Janvier Rihungu yitabwaho na Mugwaneza Regis uvura abakinnyi ba Bugesera FC
Kouame Kouakou ahanganiye umupira na Nshuti Innocent
Nshuti Innocent yahushije igitego cyabazwe muri uyu mukino, agorwa n'umunyezamu Kwizera Janvier
Usengimana Danny aroba Kwizera Janvier ku gitego cya kabiri
Umupira waruhukiye mu izamu
Usengimana Danny yishimira igitego cya kabiri
APR FC yashyizemo ikinyuranyo cy'amanota atandatu hagati yayo na Rayon Sports iyigwa mu ntege

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza