Umutoza wa Kwizera Olivier muri Afurika y’Epfo yavuze ku myitwarire ye

Yanditswe na Manzi Rema Jules
Kuya 10 Nzeri 2018 saa 12:36
Yasuwe :
0 0

Umubiligi Luc Eymael utoza Kwizera Olivier muri Free State Stars muri Afurika y’Epfo, yagaragaje agahinda yatewe n’amakosa y’uyu mukinnyi ku gitego yatsinzwe na Côte d’Ivoire, amugira inama zo kwisubiraho mu maguru mashya.

Eymael wahoze atoza Rayon Sports yo mu Rwanda yagize uruhare mu igurwa rya Kwizera muri Nyakanga 2017.

Uyu munyezamu ntiyahiriwe n’iminsi ya mbere muri Free State Stars, yamutije muri Mthatha Bucks FC yo mu cyiciro cya kabiri ariko uyu mwaka agarurwa nk’umunyezamu wa yo wa mbere.

Ku mukino w’u Rwanda na Côte d’Ivoire, Kwizera, yakoze ikosa ku munota wa nyuma w’igice cya mbere, aho yashatse gucenga rutahizamu Jonathan Kodjia wa Aston Villa mu Bwongereza agahita amwambura umupira akawohereza mu rushundura.

Ni ikosa ribaye rikurikirana iryo yari yakoze ku mukino w’umunsi wa kane wa shampiyona mu ikipe ye ari na wo wa nyuma yakinnye mbere yo kuza i Kigali, aho ku munota wa 90+5 yitsinze igitego ikipe ye yari imbere n’ibitego 2-1 ikanganya na Cape Town City.

Abicishije kuri Facebook, umutoza Luc Eymael, yavuze ko yababaye nyuma yo kubona amashusho y’ibyo Kwizera yakoze imbere ya Côte d’Ivoire, amubwira ko atikosoye vuba byazamubera bibi cyane.

Yagize ati “Narebye amashusho…mu kuri mwihangane. Birababaje ku muhungu [Kwizera Olivier] ukoze amakosa abiri akomeye mu mikino ibiri ikurikirana…aracyari muto ariko akwiye kwisubiraho vuba…bitari ibyo…”

Abajijwe n’umwe mu bamukurikira kuri uru rubuga niba ari ubwa mbere bimubayeho, Luc yagize ati “yakoze ikosa rikomeye mu mukino uheruka ryatubujije gutsinda...niyo mpamvu navuze ko agomba kwikosora vuba kuko nk’umunyezamu ntiwakomeza gusubiramo amakosa atuma ikipe yawe idatsinda”

Kwizera w’imyaka 23, yakiniye amakipe yo mu Rwanda arimo APR FC na Bugesera FC mbere yo kujya muri Afurika y’Epfo. Yari amaze imyaka hafi ibiri adahamagarwa mu Mavubi.

Kwizera Olivier yasabwe kwisubiraho vuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza