00:00:00 IGIHE NETWORK KN KINYARWANDA EN ENGLISH FR FRANCAIS

Umutoza Ole Gunnar Solskjaer yirukanywe muri Manchester United

Yanditswe na IGIHE
Kuya 21 Ugushyingo 2021 saa 01:09
Yasuwe :
0 0

Manchester United yirukanye umutoza Ole Gunnar Solskjaer nyuma y’ibihe bibi iyi kipe imazemo iminsi byatumye igira intsinzi imwe mu mikino irindwi iheruka muri Shampiyona y’u Bwongereza.

Mu butumwa Manchester United yashyize kuri Twitter ku gicamunsi cyo kuri iki Cyumweru, yemeje ko Gunnar Solskjaer atakiri umutoza wayo.

Yagize iti “Manchester United iremeza ko Ole Gunnar Solskjaer yavuye mu nshingano ze nk’umutoza. Warakoze kuri buri kimwe Ole.”

Iyi kipe yatangaje ko ari umwanzuro ukomeye gutandukana na Ole ifata nk’umunyabigwi wayo ariko ko nta kundi byari kugenda hashingiwe ku musaruro mubi ikipe imaze iminsi ibona.

Ole Gunnar Solskjaer yirukanywe kuri iki Cyumweru nyuma y’amasaha make Manchester United itsinzwe na Watford ibitego 4-1 mu mukino w’umunsi wa 12 wa Premier League wabaye ku wa Gatandatu.

Iyi kipe yatangaje ko Michael Carrick wari umutoza wungirije ari we ugiye kuyisigarana by’agateganyo mu gihe hagishakwa umutoza w’agateganyo uzasozanya n’umwaka w’imikino.

Ole Gunnar Solskjaer yari yasinye amasezerano mashya y’imyaka itatu muri Nyakanga, ariko gutsindwa imikino itanu muri irindwi ya Premier League iheruka byatumye yirukanwa.

Kuri ubu, Manchester United iri ku mwanya wa karindwi aho irushwa amanota 12 na Chelsea ya mbere muri Shampiyona y’u Bwongereza.

Abafana bayo benshi bari basabye ko uyu mutoza yakwirukanwa ubwo yari amaze gutsindwa na Liverpool ibitego 5-0 ndetse na Manchester City ibitego 2-0 mu ntangiriro z’uku kwezi, ariko ubuyobozi bubima amatwi.

Ole Gunnar Solskjaer wakiniye Manchester United, yagizwe umutoza wayo mu Ukuboza 2018 ubwo yari asimbuye José Mourinho, aho yabanje gukora nk’uw’agateganyo kugeza muri Werurwe 2019 ubwo yahabwaga akazi.

Mu mwaka wa mbere, ntiyayifashije gusoreza mu makipe ane ya mbere muri Premier League mu gihe mu myaka ibiri yakuriyeho, hombi yasoreje ku mwanya wa kabiri.

Avuye muri Manchester United nta gikombe ayihesheje nubwo yageze ku mukino wa nyuma wa Europa League mu 2021, aho yatsinzwe na Villarreal kuri penaliti.

Umukino wa Watford wari uwa 168 yari atojemo Manchester United aho yatsinzemo 91, atsindwa 40 mu gihe yanganyije imikino 37.

Ni we mutoza wa Manchester United witwaye neza nyuma y’igenda rya Sir Alex Ferguson, aho yari afite impuzandengo ya 54%, iri hejuru y’iya David Moyes, Louis van Gaal na José Mourinho.

Manchester United izasubira mu kibuga ku wa Kabiri ubwo izaba yakiriwe na Villarreal muri Champions League mu gihe izahura na Chelsea mu mpera z’icyumweru gitaha.

Ole Gunnar Solskjaer yirukanywe muri Manchester United nyuma y'imyaka ine ayitoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .