Ubwo Amavubi yaherukaga gutsinda Togo ku wa Kabiri, akabona itike yo gukina ¼ cya Shampiyona Nyafurika iri kubera muri Cameroun, benshi mu batuye Umujyi wa Kigali uri muri gahunda ya Guma mu Rugo, biraye mu mihanda bishimira iyo ntsinzi mu buryo budasanzwe.

Inzego zitandukanye zirimo Polisi y’Igihugu, Ubuyozi bw’Umujyi wa Kigali n’Ikigo cy’Igihugu cy’Ubuzima (RBC), zagaragaje impungenge ko muri uko kwishimira intsinzi y’Amavubi hashobora kuba (cyangwa harabayeho) gukwirakwiza icyorezo cya COVID-19 dore ko abantu benshi bahuriye hamwe kandi bakirengagiza amabwiriza arimo guhana intera no kwambara udupfukamunwa.

Kuri iki Cyumweru n’ubundi Abanyarwanda benshi bari bategererezanyije amashyushyu, biteguye ko mu gihe Amavubi yatsindira kujya muri ½ bagomba kwishimira iyi ntsinzi. Hari n’abari bateguye amasume [essui-mains] bakenyera mu rwego rwo kwigana umwe mu bafana b’Amavubi wagaragaye yishimira intsinzi yo kuri Togo akenyeye isume, ibi byatumye aba ikimenyabose.

Gusa, byari bitandukanye, inzego z’umutekano zirimo Polisi, Inkeragutabara ndetse n’Urubyiruko rw’abakorerabushake rwari rwatangatanze ahantu hose ngo rukumire abantu bashoboraga kurenga ku mabwiriza yo kwirinda Coronavirus bitwaje gufana ikipe y’Igihugu.

Mu bice bitandukanye by’Umujyi wa Kigali birimo Nyamirambo, ku Kimisagara, ku Gisozi n’ahandi IGIHE yageze, umutuzo wari wose, abantu barebera umupira mu rugo ndetse ahenshi nta n’umwe wacaracaraga hanze uretse abashinzwe umutekano.

Gusa mu bice by’i Nyamirambo ahazwi nko kuri Mirongo ine, hari abantu bake bafashwe barenze ku mabwiriza ya Guma mu Rugo, IGIHE yasanze bari kwigishwa, basobanurirwa ingaruka z’icyorezo cya Coronavirus.

Uyu mukino wa CHAN 2020 warangiye u Rwanda rutsinzwe na Guinea igitego 1-0, rusezererwa mu cyiciro nk’icyo rwari rwagarukiyemo mu 2016 ubwo rwari rwakiriye iri rushanwa.

Guinea yakomeje muri ½ izahura na Mali ku wa Gatatu mu gihe undi mukino uzahuza Maroc ifite irushanwa riheruka na Cameroun yakiriye iry’uyu mwaka.

Abakorerabushake bari mu bafashije inzego z'umutekano gutuma abantu batongera kujya mu mihanda

Umwe mu Nkeragutabara ari kumwe n'abakorerabushake mu gikorwa cyo gucunga umutekano mu gihe habaga umukino w'Amavubi

Uyu yahisemo guhagarara ahagana ku muhanda kugira ngo arebe uko hanze byifashe

Abakorerabushake bari henshi mu bice bitandukanye by'Umujyi wa Kigali

Ishimwe Saleh ukinira Kiyovu Sports areba umukino w'u Rwanda na Guinea

Serumogo Ally (iburyo) na we yari ashyigikiye Amavubi yahamagawemo nubwo atashyizwe ku rutonde rwagiye muri Cameroun

Ishimwe Saleh na Serumogo bagaragaza ko batishimiye kuvunika kwa Kalisa Rachid wavuye mu kibuga mu gice cya mbere

I Nyamirambo, hari abafatiwe kurenga ku mabwiriza yo kwirinda COVID-19 arimo gutaha kare

Abafashwe barenze ku mabwiriza yo kwirinda COVID-19 babanza kwigishwa

Hamwe na hamwe nta muntu wacaracaraga

Ushinzwe umutekano ari mu kazi, ariko anakurikirana umukino w'u Rwanda na Guinea kuri radiyo

Amafoto: Muhizi Serge