Umuryango wa Rayon Sports ugiye gukora iperereza ku igurishwa rya Kasirye na Diarra

Yanditswe na Ishimwe Israel
Kuya 27 Nzeri 2016 saa 07:04
Yasuwe :
0 0

Komite y’Umuryango wa Rayon Sports mu nama idasanzwe yaraye ukoranye na Komite y’ikipe ya Rayon Sports wiyemeje guhaguruka ugakora iperereza ku igurishwa rya ba rutahizamu babiri, Ismaila Diarra na Davis Kasirye bahetse iyi kipe umwaka ushize wa shampiyona ndetse bakayihesha igikombe cy’Amahoro.

Davis Kasirye, rutahizamu w’Umugande waje muri Rayon Sports atazwi ariko akayikoramo amateka kimwe na Ismaila Diarra waguzwe mu gace ka kabiri ka shampiyona akayitsindira ibitego 13 n’umunani mu gikombe cy’Amahoro ubu bose bagurishijwe muri Daring Club Motema Pembe y’i Kinshasa.

Tariki ya 26 Nyakanga 2016,nibwo byamenyekanye ko Davis Kasirye yamaze gushyira umukono ku masezerano y’imyaka ibiri yo gukinira iyi kipe yo muri Congo nyuma y’icyumweru, we n’abayobozi ba Rayon Sports barimo Perezida Gacinya Denis n’Umunyamabanga w’iyi kipe, Gakwaya Olivier bari bamazeyo.

Mu igurishwa rye ntibyigeze bimenyekana amafaranga uyu mukinnyi w’imyaka 23 yatanzweho kuko bamwe bavugaga ko yaguzwe ibihumbi 40 by’amadolari ariko ikinyamakuru Kawowo cyo muri Uganda aho avuka kikaba cyaratangaje ko yatanzweho ibihumbi 90 angana na 70 682 594 mu mafaranga y’u Rwanda.

Uretse uyu igiciro cye kitavuzweho rumwe, tariki 20 Kanama 2016 byatangajwe ko rutahizamu ukomoka muri Mali, Ismaila Diarra wafatwaga nk’umwe mu bagenderwaho iyi kipe izifashisha mu marushanwa ya Orange CAF Confederations Cup yagurishijwe muri DCMP n’ubundi ku mafaranga atarigeze amenyekana.

Byateye urujijo uburyo Rayon Sports irekuye umukinnyi wari uherutse kongera amasezerano ariko ku ruhande rw’ubuyobozi bukavuga ko byari biri mu masezerano yasinye ajya kongera umwaka umwe, aho bemeranyijwe ko nabona ikipe hanze bazamureka akagenda nubwo hari andi makuru avuga ko haba hari abayobozi bari babiri inyuma mu nyungu zabo.

Mu nama yahuje Komite y’Umuryango n’iy’ikipe ya Rayon Sports ku mugoroba wo kuri uyu wa Mbere,tariki ya 27 Nzeri, umuryango uhagarariwe na Kimenyi Vedaste ari na wo ureberera ikipe yaba iy’umupira w’amaguru ndetse n’iya Volleyball, ntiwanyuzwe n’ibisobanuro wahawe ku igurishwa ry’aba bakinnyi ndetse wiyemeza kubikoraho iperereza.

Nk’uko byatangajwe n’umwe mu bari muri iyi nama, yagize ati “Icyahereweho ni ubuzima bw’ikipe n’ibyo tugomba gukosora ngo burusheho kuba bwiza. Ikindi ni uko igura n’igurisha ryagenze cyane kuri Kasirye na Diarra havugwamo byinshi tukaba twemeje ko byakozwe nabi, bikorwa n’abatabikwiye,dushyiraho akanama kazagenzura uko byakozwe.”

Uretse aba bagurishijwe, hari n’ikibazo cyatwaye umwanya munini cy’abakinnyi baguzwe bava muri APR FC barimo Rwigema Yves na Rwatubyaye Abdoul ariko ikipe bavuyemo ikaba ivuga ko ari abakinnyi bayo ndetse bayifitiye amasezerano.

Gusa kuri iki, komite y’ikipe yemeje ko yabikoze mu buryo bwemewe n’amategeko ndetse isobanura zimwe mu mpamvu Rwatubyaye ataratangira imyitozo nk’abandi ariko ngo ikibazo cye kikaba kigomba gukemuka mu minsi ya vuba.

Ikindi ngo kuri uyu mukinnyi kugeza ubu bitazwi aho aherereye, ngo nyuma yo gusinya imyaka ibiri muri Rayon Sports, APR FC yashatse ko ayigarukamo biranga.

Rayon Sports itangaza ko ititeguye ibiganiro byose bitari ukubona umukinnyi yaguze kandi imukeneye.

Kuri myugariro w’iyi kipe wagiye muri APR FC, Imanishimwe Emmanuel, bemeje ko ari umukinnyi wa Rayon Sports kuko yari yongereye amasezerano ariko by’umwihariko APR FC ikaba yaramutwaye n’aya mbere atararangira ariko bemeza ko bagiye gutegereza imyanzuro izatangwa na Ferwafa kuri iki kibazo dore ko yamaze gushyikirizwa ikirego.

Umuryango wa Rayon Sports ntiwanyuzwe n'ibisobanuro by'uko Kasirye yagurishijwe
Davis Kasirye(wambaye ingofero) n'abayobozi ba Rayon Sports, ubwo bari mu biganiro na DCMP y'i Kinshasa
Ismaila Diarra(wambaye ubururu n'umweru) nawe yagurishijwe mu buryo butavugwaho rumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244