Umunyezamu wa Police FC yasutse amarira nyuma yo gusezererwa na Kiyovu Sports (Amafoto)

Yanditswe na Ntare Julius
Kuya 1 Nyakanga 2019 saa 11:17
Yasuwe :
0 0

Ni yo mahirwe rukumbi Police FC yari ibonye yo gusohokera igihugu muri irushanwa rya CAF Confederations Cup nyuma y’imyaka ine ibigezeho ubwo yegukana Igikombe cy’Amahoro mu 2015.

Ntabwo byakunze ko iyi kipe y’abashinzwe umutekano isubira muri aya mateka kuko yasezerewe na Kiyovu Sports muri ½ cy’Igikombe cy’Amahoro.

Wari umukino Police yatangiye neza irusha cyane Kiyovu Sports ndetse inasoza igice cya mbere ku ntsinzi y’ibitego 3-1. Byagaragariraga buri wese ko abasore ba Nshimiyimana Maurice ‘Maso’ baje bafite intego yo gukatisha itike yo gukina umukino wa nyuma uzaba tariki 4 Nyakanga nubwo bari batsinzwe ibitego 2-0 mu mukino ubanza.

Police FC yatsinze umukino ku bitego bitego 4-2 isezererwa kubera ibitego byo hanze byatsinzwe kuri iki Cyumweru na Kiyovu Sports.

Ibi byashenguye cyane abakinnyi ba Police FC barimo myugariro wayo wo hagati wahoze akinira APR FC, Nsabimana Aimable, waje guhumurizwa n’umunyezamu wa Kiyovu Sports, Nzeyurwanda Djihad biba iby’ubusa amusiga yicaye mu kibuga.

Myugariro wo ku ruhande rw’ibumoso, Muvandimwe Jean Marie Vianney, ndetse na rutahizamu w’iyi kipe Ndayishimiye Antoine Dominique bicaye umwanya munini mu kibuga batari kumva ibibabayeho dore ko ari bamwe mu bakinnyi ba Police FC bitanze bidasanzwe muri uyu mukino.

Myugariro Hakizimana Issa yicaye mu kibuga arambije n’agahinda kenshi nyuma y’uko asezerewe mu mukino yari yatanzemo ingufu nyinshi mu gihe umutoza wa Kiyovu Sports, Kirasa Alain, yaje guhumuriza kapiteni w’iyi kipe Ngendahimana Eric byagaragaraga ko yari yagowe no kwakira uburyo basezerewe mu Gikombe cy’Amahoro.

Aha niho umunyezamu wa Police FC, Bwanakweli Emmanuel yaje mu itsinda ry’abakinnyi bababaye cyane ndetse asindagizwa n’umutoza w’abanyezamu b’iyi kipe Maniraguha Jean Claude, aza kwakirwa n’umutoza ushinzwe kongerera ingufu abakinnyi Police FC n’ikipe y’igihugu ‘Amavubi’, Niyintunze Jean Paul.

Ntacyo byatanze kubera agahinda kenshi. Muhinda Brian na we yaje gushyiraho ake, ngo abashe gucubya agahinda k’uyu musore wagiye akuramo imipira yari yabazwemo ibitego muri uyu mukino.

Nyuma yo kugera ku mukino wa nyuma, Kiyovu Sports izahura na AS Kigali mu mukino uzakinwa ku wa Kane tariki ya 4 Nyakanga, aho ikipe izegukana igikombe izahagararira u Rwanda mu mikino ya CAF Confederations Cup y’umwaka utaha.

Umunyezamu Nzeyurwanda Djihad niwe waje guhumuriza Nsabimana Aimable nyuma y'uko Umusifuzi Ruzindana Nsoro ahushye mu ifirimbi ko umukino urangiye
Mu gihe Kalisa Rashid ukina hagati muri Kiyovu Sports yashimiraga Imana ko ibahaye intsinzi Nsabimana Aimabe we yari yashenguwe n'agahinda nyuma yo gusezererwa
Iyabivuze Osee wa Police FC yibaza ibimaze kumubaho
Hakizimana Issac yashenguwe no gusezererwa mu mukino batahanyemo intsinzi
Rutahizamu Ndayishimiye Antoine Dominique (wambaye nimero 14) ndetse na myugariro w'ibumoso Muvandimwe JMV (wambaye nomero 12) bababajwe n'umukino batsinze bikarangira basezerewe
Muvandimwe yaguye mu kantu mu gihe Kapiteni w'iyi kipe Ngendahimana Eric (inyuma) we yacitse intege nyuma yo gusezererwa na Kiyovu Sports
Itsinda ry'abakinnyi ba Police Hakizimana Isaac (15), Ndayisaba Hamidu (20), Ngendahimana Eric (20), Hakizimana Kevin (25), Peter Otema (17), Ndayishimiye Dominique (14 ndetse na Muvandimwe JMV (12) bashenguwe no gusererwa muri 1/2 cy'Igikombe cy'amahoro
Kapiteni Ngendahimana Eric yitegereza mu maso Umutoza wa Kiyovu Sports Alain Kirasa wari umuhereje ikiganza nk'ikimenyetso cy'ubworoherane buranga umupira w'amaguru
Nibwo Umunyezamu Bwanakweli Emmanuel yaje arira afashwe ukuboko n'Umutoza w'abanyezmu Maniraguha Jean Claude
Yahumurijwe n'Umutoza ushinzwe kumwongerera ingufu Niyintunze Jean Paul
Hagati y'Umutoza we ndetse na Muhinda Brian, Bwanakweli ntabwo yabashije kwihangana
Hagati y'abatoza be bombi bageragezaga kumubwira amagambo amuhumuriza ngo amugabanyirize amarangamutima yamurushaga imbaraga
Umutoza we yamusigiye Muhinda Brian
Kari agahinda kuri Bwanakweli nyuma yo kwitanga akaza gusezererwa
Niyintunze yagiye amusigira Muhinda Brian ukina hagati muri Police FC
Bwanakweli yashenguwe n'ubwitange yagize birangira basezerewe
Yaba Nsabimana Aimable, Ndayishimiye Dominique ndetse na Hakizimana Isaac mu maso habo hari hijimye ubwo basohokaga mu kibuga
Nta byishimo byagaragaraga ku maso ya Ndayishimiye Celestin ubwo yasohokaga mu kibuga
Mpozembizi Mohamed na Uwimbabazi Jean Paul basohotse bababaye nyuma yo kubura amahirwe yo gukina umukino wa nyuma w'Igikombe cy'amahoro
Mu gihe Police FC yari iri mu gahinda, ku rundi ruhande byari ibirori kuri Kiyovu Sports

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza