UEFA Champions League igizwe n’amakipe 36 izaba iteye gute?

Yanditswe na Eric Tony Ukurikiyimfura
Kuya 7 Gashyantare 2021 saa 01:57
Yasuwe :
0 0

Ku wa Gatanu, abafatanyabikorwa b’Impuzamashyirahamwe y’Umupira w’Amaguru ku mugabane w’Uburayi (UEFA) baganiriye ku buryo hakwagurwa irushanwa rya UEFA Champions League, ahakinwaga imikino 125 ikaba 225.

Muri iki cyumweru, Ibiro Ntaramakuru bya PA Media byatangaje ko hari hateganyijwe inama rusange idasanzwe yiga uko hashyirwaho uburyo bushya bwo gukinamo amarushanwa arimo Champions League, Europa League na UEFA Conference League guhera mu 2024.

Bivugwa ko urwego ruyobora umupira w’amaguru i Burayi, UEFA, rwasabye kwagura irushanwa rya Champions League, rikajya ryitabirwa n’amakipe 36 mu matsinda guhera mu 2024 mu rwego rwo guca intege umugambi w’abashaka gushinga irushanwa rishya rya European Super League. Ibi bivuze ko haziyongeramo indi myanya ine.

PA Media yatangaje ko u Bufaransa buzongererwa umwanya umwe mu makipe yabuhagarariraga, akava kuri atatu akaba ane. Undi mwanya umwe uzajya uhabwa ikipe yitwaye neza mu irushanwa riheruka, ariko itaratsindiye kongera kurikina binyuze mu marushanwa y’iwabo mu gihe indi bibiri isigaye izajya igenwa hagendewe ku manota y’uburyo amakipe ahagaze ku rwego rw’Uburayi.

Ibi bivuze ko Premier League y’u Bwongereza yahagararirwa n’amakipe agera kuri atandatu muri iri rushanwa rikuru i Burayi.

Hatangajwe ko amakipe y’Icyiciro cya Mbere mu Bwongereza yaganirijwe kuri ubu buryo bushya bw’irushanwa mu nama y’abafatanyabikorwa yabaye ku wa 4 Gashyantare, ariko nta tora ryabayeho.

Ibiro Ntaramakuru bya PA byavuze ko uburyo busanzwe bw’amakipe 32 mu matsinda ya Champions League, buzasimburwa n’ubw’amakipe 36, irushanwa rikinwe mu buryo bwiswe “Swiss System.”

Amakipe umunani ya mbere muri iri rushanwa yahita abona itike yo gukina 1/8, andi 16 akurikiyeho agakina kamarampaka ahataniye imyanya umunani isigaye.

Imikino iziyongera ive kuri itandatu igere ku 10 ndetse bivugwa ko bizatuma hari amarushanwa mato yo mu bihugu bimwe akurwaho.

Perezida wa UEFA, Aleksander Čeferin, aherutse kuvuga ko “byaba byiza kuri buri umwe” iryo rushanwa ritabaye.

Ntibizwi niba za shampiyona mu bihugu bitandukanye zaragaragaje uko zibyumva cyangwa zigasaba igihe gihagije cyo kubisuzuma.

Ubu buryo ngo bwatekerejwe mu rwego rwo guca intege umushinga w’irushanwa rya European Super League ryakwitabirwa n’amakipe 20 gusa akomeye i Burayi.

Inkuru bijyanye: Umushinga wa European Super League watesheje umutwe FIFA na UEFA uteye gute?

UEFA yatangiye gutekereza uburyo UEFA Champions League yakwitabirwa n'amakipe 36 mu matsinda guhera mu 2024

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .