00:00:00 IGIHE NETWORK KN KINYARWANDA EN ENGLISH FR FRANCAIS

Ubusinzi, gushondana n’ubushobozi bw’abatoza mu bizonze Amavubi

Yanditswe na IGIHE
Kuya 17 Ugushyingo 2021 saa 07:04
Yasuwe :
0 0

Kubaza umusaruro Amavubi uyu munsi bishobora kuba nko kubariza amata ku kimasa, ariko ikibazo nyamukuru si icyo, ahubwo ni uko hakomeje kubaho gushondana hagati y’abakinnyi, kunanirwa kuyobora urwambariro kw’abatoza n’ubusinzi mu Ikipe y’Igihugu.

Niyonzima Olivier ‘Seif’ ni we ukomeje kugarukwaho cyane nyuma y’uko Ishyirahamwe ry’Umupira w’Amaguru mu Rwanda (FERWAFA) ryamuhagaritse igihe kitazwi mu Ikipe y’Igihugu kubera imyitwarire idahwitse.

Iyo myitwarire Seif yazize ntiyigeze itangazwa nk’uko FERWAFA ikunze kenshi kubigenza kubera gushaka guhisha byinshi bibera mu Ikipe y’Igihugu nyamara ishyamba atari ryeru.

Reka twirengagize ibyabaye mu myaka yashize, ahubwo dufate ibyo muri aya mezi atatu gusa yakinwemo imikino itandatu yo gushaka itike y’Igikombe cy’Isi cya 2022.

Gushwana na Sugira byaba ari byo byatumye Rafael York ava mu Amavubi?

Mu Ukwakira uyu mwaka ni bwo Rafael York usanzwe ukina muri Suède, yatangiye gukinira Ikipe y’Igihugu, ahereye ku mikino ibiri u Rwanda rwatsinzwemo na Uganda igitego 1-0 i Kigali n’i Kampala.

York yakinnye iyi mikino yombi yambaye nimero 16 ubusanzwe ikunda kwambarwa na Sugira Ernest guhera mu myaka irindwi ishize ubwo yahamagarwaga mu Ikipe y’Igihugu.

Nyuma y’uko bombi bahuriye mu Amavubi yiteguraga guhura na Mali, ntibumvikanye k’ugomba kwambara nimero 16 bombi bifuzaga.

Uwahaye amakuru IGIHE yavuze ko bashwaniye uyu mwambaro mu nama ya mbere y’umukino yabaye ku wa 11 Ugushyingo, ariko bikarangira bemeranyijwe ko York ari we uyambara nk’uko byagenze.

York ngo yasabye Sugira ko yambara iyi nimero ku mukino wa Mali na Kenya nyuma akazayimusubiza ndetse icyo gihe byarangiye bumvikanye.

Ubwo Ikipe y’Igihugu yari igeze muri Kenya nyuma yo gushaka gutsindirwa i Kigali na Mali, York yahise asaba kujya muri Suède, ariko impamvu y’ukuri yatumye uyu mukinnyi agenda kugeza n’uyu munsi ntiramenyekana.

Mu gitondo cyo ku Cyumweru, tariki ya 14 Ugushyingo, hakwirakwiye ubutumwa bivugwa ko bwanditswe na Rafael York ariko we atigeze ashyira ku mbuga nkoranyambaga ze, buvuga ko “yavuye mu mwiherero w’Amavubi kubera ko yapfushije inshuti ye ya hafi.”

Nubwo na FERWAFA ari iyo mpamvu yatanze nyuma, umutoza Mashami Vincent yavuze ko ubwo umukinnyi yavaga i Nairobi yababwiye ko ari ukubera impamvu ze bwite atigeze atangaza.

Bivugwa ko uyu mukinnyi nta byago yagize ahubwo atishimiye uburyo yisanze mu Amavubi, aho uretse kutishimirwa na bagenzi be kubera kwimana Sugira Ernest nimero 16, ngo yabajije niba nta bandi ba rutahizamu Ikipe y’Igihugu ifite, na byo bigafatwa nabi.

Hari amakuru avuga ko kandi uyu mukinnyi yaba ari gutekereza uburyo yahagarika gukinira Amavubi agashaka ikindi gihugu dore ko atararenza imikino itatu mu Ikipe y’u Rwanda.

Ubusinzi mu Amavubi bumaze gufata intera

Nufungura Bibiliya ukajya muri Zaburi 104: 35 bazakubirwa ko “na divayi inezeza imitima y’abantu” ariko nugera k’Umubwiriza 3:3 bazakubwira ko “Ikintu cyose gifite igihe cyagenewe” naho Abefeso 5:18 hakagira hati “Kandi ntimugasinde inzoga zirimo ubukubaganyi, ahubwo mwuzure umwuka”.

Mu gihe bamwe bavuye i Nyamirambo babuze ayo bacira n’ayo bamira kubera kunanirwa kwiyumvisha uburyo u Rwanda rushobora kuba rugiye gusoza imikino y’amatsinda yo gushaka itike y’Igikombe cy’Isi, abandi bahisemo kujya gushakira ibyishimo ahandi.

Amakuru IGIHE yabwiwe n’umwe mu bari mu Amavubi ni uko nyuma y’umukino wa Mali wabaye ku wa Kane, tariki ya 11 Ugushyingo 2021, abarimo umutoza Mashami Vincent, Kapiteni Niyonzima Haruna, Hakizimana Muhadjiri na Bizimana Djihad wari wabonye ikarita itukura, bose bataraye hamwe n’abandi kuri hoteli ahubwo bagarutse ku munsi ukurikiyeho.

Amavubi yagiye muri Kenya ku wa Gatanu, Niyonzima Haruna asigara ku kibuga cy’indege, aho FERWAFA yatangaje ko ari ukubera “impamvu z’umuryango” bikavugwa ko yagize ibyago byo gupfusha umwe mu bana yareraga.

Nyuma y’umukino w’Amavubi na Kenya, Niyonzima Olivier ‘Seif’ watsinze igitego kimwe u Rwanda rwabonye rutsinzwe 2-1, yagiye muri kamwe mu tubyiniro tw’i Nairobi ari kumwe n’umwe mu banyamakuru bari baherekeje Ikipe y’Igihugu.

Niyonzima yagiye mu gihe we na bagenzi be bari babujijwe kuva kuri hoteli kuko Ikipe y’Igihugu yagombaga kugaruka i Kigali mu gitondo cyo kuri uyu wa Kabiri, tariki ya 16 Ugushyingo ndetse ubwo abandi bahaguruka i Nairobi ntiyari kumwe na bo.

Hejuru y’ibi hiyongera kuba kimwe mu byatumye York atiyumvwamo na bagenzi be harimo ko yarabwiye abatoza b’Amavubi ko imyitwarire ya bagenzi be irimo gutumiza rwihishwa inzoga mu byumba byabo itatuma hari umukino batsinda ndetse ngo ni yo mpamvu bafashe uruhande rwa Sugira ku kibazo cya nimero 16.

Amahitamo ya Mashami ashobora gutuma abakinnyi bamwe bazinukwa Amavubi

Kuva muri Kanama 2021, icyari kigoye gusobanukirwa ni uburyo abakinnyi bamwe bahamagarwa mu Ikipe y’Igihugu nyamara hari n’abari badafite aho bitoreza.

Guhamagarwa kwa Kwizera Olivier wingingiwe kwisubiraho, ariko bikarangira ntawe uzi uburyo yasohotse mu Ikipe y’Igihugu na byo bigaragaza uburyo Ikipe y’Igihugu ishaka kubakira ku binyoma no guhisha amabi ayiberamo.

Kwizera yasezerewe mbere y’uko u Rwanda rujya gukina na Mali azira kugeza mu masaha y’igicuku ari kuganira n’umwe mu bakobwa mu buryo bw’imbonankubone kuri Instagram, ariko ntacyo inzego zibishinzwe zigeze zibivugaho.

Bamwe mu bakinnyi bari mu Ikipe y’Igihugu uyu munsi bamaze kuyirambirwa biturutse ku buryo badakinishwa, ku isonga hakaza abakuwe i Burayi barimo Ngwabije Bryan Clovis ukina mu Bufaransa n’umunyezamu Buhake Twizere Clément ukina muri Norvège.

I Agadir muri Maroc, Ngwabije Bryan Clovis yasimbujwe ku munota wa 29 ubwo u Rwanda rwari rumaze kwinjizwa igitego na Mali, ntiyongera kugirirwa icyizere mu gihe Buhake nta munota n’umwe yahawe mu mikino itandatu kandi hose barahamagawe.

Gukinisha Nsanzimfura Keddy akamukura mu kibuga ku munota wa 24 ubwo u Rwanda rwakinaga na Kenya mu gihe yari yabanje hanze abakinnyi barimo Sugira Ernest na Hakizimana Muhadjiri na byo biri mu byibajijweho ku mitoreze y’uyu mutoza.

Uburyo Mashami yakuye mu kibuga Rafael York mu gice cya mbere ku mukino wa Uganda i Kigali ntibyashimishije uyu mukinnyi ku giti cye ndetse na bamwe mu bari kuri Stade ya Kigali icyo gihe bavugirije induru umutoza.

Kapiteni w’Amavubi, Niyonzima Haruna, we ubwe aherutse kuvuga ko arambiwe amagambo abantu birirwa bamuvugaho kandi ntacyo atahaye igihugu, ahubwo ari hafi gusezera.

Uretse uyu mukinnyi, hari amakuru avuga ko Kagere Meddie ari we wisabiye kudahamagarwa mu Ikipe y’Igihugu ndetse ari gutekereza uburyo yasezera nubwo Mashami we yavuze ko banze kumuhamagara ngo abanze yitekerezo.

Bivugwa kandi ko Rwatubyaye Abdul yanze ubutumire bw’Amavubi kugira ngo azakine umukino wa gicuti ikipe ye ya FC Shkupi yahuyemo na Beskitas ku wa Kane w’icyumweru gishize i Istanbul muri Turikiya.

APR FC ntiyatanze abakinnyi bayo barimo Manishimwe Djabel, Ruboneka Jean Bosco na Kwitonda Alain ‘Bacca’ ivuga ko barwaye nyamara yo yarabakoresheje mu mikino ya gicuti yakinwe tariki ya 11 Ugushyingo ndetse na tariki ya 14 Ugushyingo 2021.

Bamwe mu bakinnyi bakuru mu Ikipe y’Igihugu ngo ntibumva uburyo bahora bibasirwa nyamara ntako baba batitanze kandi nta kidasanzwe bakura mu Ikipe y’Igihugu.

Urwego rw’abatoza ntiruvugwaho rumwe

Ikipe y’Igihugu yasoje ijonjora rya kabiri ryo gushaka itike y’Igikombe cy’Isi cya 2022 iri ku mwanya wa nyuma mu Itsinda E n’inota rimwe rukumbi mu mikino itandatu yakinnye.

Umusaruro mubi w’Amavubi wavuzwe na mbere y’uko Mashami Vincent yongererwa amasezerano ku nshuro ya gatatu mu ntangiriro z’uyu mwaka nubwo yafashije Ikipe y’Igihugu kugera muri ¼ cya CHAN 2020.

Uretse uyu mutoza mukuru, hibazwa kandi ku bushobozi bw’abamwungirije barimo Kirasa Alain na Habimana Sosthène badasanzwe bari mu batoza bakomeye imbere mu Rwanda.

Ubwo Umunyamabanga Uhoraho muri Minisiteri ya Siporo, Shema Maboko Didier, aheruka kubazwa ku bijyanye n’umusaruro w’Amavubi mu Ukwakira, yavuze ko ikibazo kitakarebewe mu ndorerwamo y’umutoza gusa, ahubwo mu ikipe yose muri rusange.

Ati “Ikibazo cy’Ikipe y’Igihugu iyo kigiye kuba ikibazo cy’umuntu twaba dutekereza tudashyizemo imitekerereze y’abantu bazi siporo. Kuba umusaruro ubura ntawe bishimishije kandi ntabwo dutegura ikipe ngo ijye gutsindwa.”

“Tureba uko ikipe yitegura, nitujya gutunga urutoki ngo ni umutoza, turaba tutarebye uko ikipe ihagaze muri rusange. Umusaruro tuwufate twese nk’uw’ikipe, ibigiye gukorwa bizakorwa ku ikipe yose. Turi kubirebera mu ishusho rusange tutarebye umutoza.”

Biteganyijwe ko mu mpera z’uyu mwaka ari bwo hazakinwa amajonjora yo gushaka itike ya CHAN 2022 izabera muri Algérie mu gihe amajonjora yo gushaka itike y’Igikombe cya Afurika cya 2023 kizabera muri Côte d’Ivoire azatangira muri Kamena umwaka utaha.

Amavubi afite umusaruro mubi akomeje kuvugwamo byinshi birimo ubusinzi
Urwego rw'abatoza b'Amavubi ntiruvugwaho rumwe
Rafael York yavuye mu mwiherero w'Amavubi mbere y'uko u Rwanda ruhura na Kenya
Haruna Niyonzima utaragiye muri Kenya bivugwa ko yagize ibyago ni umwe mu batekereza gusezera mu Ikipe y'Igihugu
Ngwabije Brian Clovis ntarongera gukinishwa mu Amavubi nyuma yo gutsindanwa igitego ku mukino wa Mali wabereye i Agadir
Niyonzima Olivier 'Seif' yasizwe na bagenzi be muri Kenya nyuma yo kurara mu kabyiniro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .