Ishyirahamwe ry’umupira w’amaguru muri Afurika (CAF) ryatangaje ko ubujurire bw’u Rwanda butakiriwe bityo rusezerewe bitajuririrwa mu majonjora y’igikombe cy’Afurika cy’ibihugu kizabera muri Maroc mu 2015.

U Rwanda rwasezerewe muri aya majonjora kuko Dady Birori yakoreshaga amazina abiri atandukanye mu marushanwa ategurwa na CAF, Dady Birori mu Amavubi na Tady Etekiama Agiti muri AS Vita club.

Kuri uyu wa Gatatu tariki ya 27 Kamena 2014, nibwo abayobozi b’Ishyirahamwe ry’umupira w’amaguru mu Rwanda (FERWAFA) bari mu Misiri ku cyiciro cya CAF gusobanura ubu bujrire imbere y’akanama k’ubujurire.

Nyuma y’amasaha asaga abiri yo kumva abanyamategeko ba FERWAFA, Me Ndagijimana Emmanuel, ushinzwe amategeko muri FERWAFA na Me Mulindahabi Olivier, umunyamabanga wa FERWAFA, aka kanama kashimangiye ko :

– Kuba Komiseri w’umukino wahuje Congo Brazzaville n’u Rwanda avuga ko yakiriye ikirego cya Congo tariki ya 22 Nyakanga 2014 umukino warabaye ku ya 20 Nyakanga 2014 byafashwe nko kwibeshya mu myandikire.

Ubusanzwe amategeko agenga igikombe cy’Afurika avuga ko ikirego gitangwa bitarenze amasaha 24.

– Kuba Kapiteni w’u Rwanda [Niyonzima Haruna] atarasinye ku kirego cya Congo nk’uko biteganywa n’ingingo ya 37, igika cya I cy’amategeko agenga amarushanwa y’igikombe cy’Afurika cya 2015 abiteganya, kugira ngo ikirego cyakirwe, byatewe n’uko kapiteni w’u Rwanda yasuzuguye, akanga gusinya nk’uko byagaragajwe muri raporo ya Komiseri w’uyu mukino.

– Birori Daddy ari Umunyarwanda wakoze amakosa yo gukina amarushanwa ya CAF akoresheje irindi zina, Tady Etekiama Agiti.

– U Rwanda rwari ruzi ko uwo mukinnyi akoresha iryo zina mu ikipe ya A.S Vita Club, rusaba Ishyirahamwe ry’umupira w’amaguru mri Repubulika Iharanira Demokarasi ya Congo (FECOFA) gukosora ariko ntibyamenyeshejwe CAF.

Dady Birori yatangiye gukinira u Rwanda mu 2009 yatsinze ibitego 3 bakina na Libya

Aka kanama k’ubujurire ka CAF kemeje ko

– U Rwanda rwatewe mpaga y’ibitego 3-0 ku mukino ubanza wabahuje na Congo Brazzaville tariki ya 20 Nyakanga 2014

Uyu mukino wagaragagayemo Dady Birori warangiye ari ibitego 2-0 bya Congo Brazzaville mu gihe uwo kwishyura u Rwanda rwatsinze ibitego 2-0 rwari rwakomeje kuri penaliti.

– CongoBrazzaville niyo ihawe itike y’amajonjora y’igikombe cy’Afurika cya 2015

Congo Brazzaville izakina imikino yo mu majonjora mu itsinda A ririmo Nigeria, Sudani na Afurika y’Epfo, mu mwanya warimo u Rwanda, umukino ubanza bazasura Nigeria i Calabar tariki ya 6 Nzeli 2014.

– Umukinnyi Birori Daddy azagenerwa ibihano mu nama y’akanama gategura igikombe cy’Afurika cy’ibihugu cya 2015.

– U Rwanda nta bindi bihano ruzafatirwa kuri iyi ngingo

Mu itangazo ryavugaga ko u Rwanda ruhagaritswe muri aya majonjora, CAF yavugaga ko ibindi bihano bishobora kuziyongera bizamenyekana mu nama y’inteko rusange izaba ku itariki ya 17 Nzeri 2014.

CAF yamenyesheje u Rwanda ko iki cyemezo kitajuririrwa muri iri shyirahamwe keretse mu rukiko nkempurampaka rwa siporo (TAS/CAS) ruba mu Busuwisi bitarenze tariki ya 8 Nzeli 2014, iminsi 10 nyuma yo kubona iyi myanzuro.

Tady Etekiama Agiti, izina akoresha muri AS Vita Club

Uko ikirego cya Congo Brazzaville cyari giteye

"Tugendeye ku mpapuro z’umukino wahuje Congo Brazzaville n’u Rwanda, tariki ya 20 Nyakanga i Pointe-Noire, turifuza ibisobanuro birambuye ku mwirondoro wa Dady Birori wambara numero 11 wavukiye i Kinshasa tariki ya 12 Ukuboza 1986 ufite pasiporo nomero PS023413 yatanzwe tariki ya 2 Nzeli 2009.”

Bakomeza bagira bati “ Izina rye nyakuri ni Agiti Taddy Etekiama akinira AS Vita club yo muri DRC aho ibyangombwa bye byerekana ko yavukiye i Kinshasa tariki ya 13 Ukuboza 1990, yambara numero 25 mu mikino ya CAF champions league.”

Dady Birori ninde?

Dady Birori yahawe iri zina ubwo yakinaga muri Mukura VS hagati ya 2007 na 2008 ayivamo ajya muri ATRACO FC. Iyi isenyutse yerekeza muri Kiyovu Sports.

Yaje kuva muri Kiyovu Sports atabimenyesheje ikipe ajya muri Lupopo (DRC) aribwo yasubiraga ku izina Tady Etekiama Agiti nyuma ajya mri AS Vita Club.

Muri CECAFA Kagame cup 2012, AS Vita Club yaratumiwe, Dady Birori agaragara yitwa Etekiama arangiza iyi mikino ari uwa kabiri, atsinze ibitego 6. Ku mukino w’umwanya wa gatatu batsinda APR FC.

Mu rwego rwo kwirinda igitutu cya Kiyovu Sports yavugaga ko atubahirije amasezerano, yakomereje kuri iri zina aba ariryo akoresha mu mikino nyafurika no mu makipe yo muri Congo nubwo yari yakoresheje irya Dady Birori akinira ATRACO FC muri CAF champions league 2009 bakina na El Merreikh.

Ubwo yifuzwaga n’amakipe y’i Burayi yamusabaga gukora igeragezwa, Dady Birori yaretse ibyangombwa byo mu Rwanda yakoreshaga ari mu ikipe y’u Rwanda by’uko yavutse mu 1986 afata ibya DRC aho yavutse mu 1990 kugira ngo agabanye imyaka bimworohere kujya i Burayi.