U Rwanda rwasinye amasezerano azafasha abasaga ibihumbi 50 gutunga inzu i Kinyinya

Yanditswe na Ishimwe Israel
Kuya 11 Nzeri 2018 saa 08:24
Yasuwe :
0 0

Guverinoma y’u Rwanda yasinyanye amasezerano y’ubufatanye n’Ikigega cya Banki y’Isi cy’Imari gitera Inkunga imishinga y’Ishoramari (IFC) agamije kurufasha mu kubaka inzu ziciriritse i Kinyinya mu Mujyi wa Kigali.

Aya masezerano yashyizweho umukono kuri uyu wa Kabiri, mu muhango wahuriranye n’itangizwa ry’Inama y’Iterambere ry’Ubukungu muri Afurika (DFF) yitabiriwe n’abantu barenga 300.

Uyu mushinga uzashyirwa mu bikorwa ku bufatanye bwa IFC, Ikigo cy’Igihugu cy’Ubwiteganyirize mu Rwanda (RSSB), Banki Itsura Amajyambere y’u Rwanda (BRD) n’Ikigo cy’Abashinwa kizobereye mu Bwubatsi cya Broad Homes Industrial International Co. Ltd.

Biteganyijwe ko uzasozwa huzuye inyubako 10 000 zirimo izo guturamo n’izigenewe ibikorwa by’ubucuruzi muri Kinyinya. Uyu mushinga uzungukiramo abagera ku 50,000 uzatwara asaga miliyoni $200 (akabakaba miliyari 176 Frw).

Visi Perezida ushinzwe Itumanaho n’Imikoranire muri IFC, Karin Finkelston, yavuze ko abikorera bafite uruhare mu kunoza imiturire mu mijyi ya Afurika.

Yagize ati “IFC ishyigikira imishinga igamije kwagura uburyo bw’imiturire no kwegereza abaturage ba Afurika inzu nziza kandi ziciriritse.”

Mu myaka 10 ishize, Ikigega Mpuzamahanga Gitsura Amajyambere (IDA) n’Igitanga Ingwate (MIGA) na IFC byatanze miliyari $100 mu ishoramari ry’abikorera.
Minisitiri w’Imari n’Igenamigambi, Dr Uzziel Ndagijimana, yatangaje ko imiturire ikirimo icyuho kinini ariko hari ingamba zafashwe.

Ati “Muri gahunda ya Guverinoma y’imyaka irindwi harimo iyihariye yo kunoza imiturire muri Kigali no mu mijyi iyunganira. Dufitanye ubufatanye na Banki y’Isi.”

“Hari imishinga ibiri igiye gutangira irimo uwa Kinyinya tumaze no gusinya amasezerano y’ibanze. Turateganya no gushyiraho ikigega cyihariye giteza imbere imiturire mu mijyi, kizatangirana na miliyoni $150 azakoreshwa mu gufasha abifuza inzu.”

Inyigo yakozwe n’Umujyi wa Kigali, Minisitiri y’Ibikorwa remezo n’Umuryango w’Abibumbye mu 2012, yagaragaje ko hazaba hari icyuho cy’inzu 344,000 ku bazikeneye mu 2020.

Imibare igaragaza ko buri mwaka hubakwa iziri hagati ya 800 na 1000 zo gutuzamo abaturage mu gihe ikibazo cy’imiturire cyakemuka hubatswe nibura 31,000.

Mu Ukuboza 2016, Banki y’Isi yemeye gutanga miliyari $75 mu kurandura ubukene bukabije. Afurika yagenewe miliyari $45.

Banki y’Isi iheruka guha u Rwanda miliyoni $95, azashorwa mu bikorwa remezo birimo imihanda ireshya n’ibilometero 81 izubakwa mu mijyi itandatu yunganira Kigali.

Agace ka Kinyinya kagenewe inzu zo guturamo zigezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza