Tuyisenge Jacques yahize gutsindira Everton mu Bwongereza

Yanditswe na Ngabo Roben
Kuya 30 Ukwakira 2018 saa 06:45
Yasuwe :
0 0

Rutahizamu w’Amavubi, Tuyisenge Jacques, yahize gutsinda igitego mu mukino ushobora guhindura ubuzima bwe, aho Gor Mahia FC yo muri Kenya akinira izaba ihanganye na Everton yo mu Bwongereza.

Gor Mahia yo muri Kenya yabonye itike yo gukina na Everton kuri stade yayo ‘Goodison Park’ iri mu Mujyi wa Liverpool, nyuma yo kwegukana igikombe cyateguwe n’umuterankunga w’izi kipe zombi ‘SportPesa’.

Ni ku nshuro ya kabiri amakipe yombi agiye gukina kuko ubwa mbere bakinnye kuwa 13 Nyakanga 2017, umukino urangira Everton itsinze ibitego 2-1.

Ibitego bya Everton byatsinzwe na Dominic Calvert-Lewin na Wayne Mark Rooney naho Jacques Tuyisenge atsindira Gor Mahia.

Mu kiganiro na IGIHE, Tuyisenge yahize kongera guhindukiza umunyezamu wa Everton, Jordan Lee Pickford usanzwe urindira ikipe y’igihugu y’u Bwongereza, mu mukino uzabahuza kuwa kabiri tariki 6 Ugushyingo 2018.

Ati “Byagenze neza ndabatsinda ubwo duheruka guhura kandi n’ubu nditeguye. Nakomeje gukora cyane kandi imbaraga mfite nyinshi kurusha uko nari meze duhura umwaka ushize.”

Yakomeje agira ati “Uyu ni umukino uhindura ubuzima bw’abantu. Namaze kuvugana n’abatoza n’abashakira abakinnyi amakipe ku mugabane w’u Burayi batandukanye bifuza kureba uko nitwara muri uyu mukino.

Tuyisenge yemeza ko ari ishema rikomeye kubona umunyarwanda akina umukino muri stade yakira imikino ya shampiyona y’u Bwongereza buri cyumweru kandi afite icyizere cyo kuhakura ikipe nziza imusinyisha.

Bivugwa ko mu makipe y’i Burayi yamaze kubwira uyu rutahizamu w’imyaka 27 ko amwifuza harimo KF Tirana yo muri Albania ashobora kwerekezamo muri Mutarama 2019.

Tuyisenge ari mu bakinnyi bakunzwe kurusha abandi muri Kenya kuko amaze gukinira Gor Mahia FC imikino 97 kuva ayigezemo muri Gashyantare 2016, yayitsindiye ibitego 47, anayihesha ibikombe bibiri bya shampiyona.

Tuyisenge yahize kongera gutsinda Everton
Gor Mahia FC yabonye itike yo gukina na Everton nyuma yo gutwara igikombe cya SportPesa muri Afurika
Umukino uzakinirwa i Goodison Park mu Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza