00:00:00 IGIHE NETWORK KN KINYARWANDA EN ENGLISH FR FRANCAIS

Tottenham yirukanye uwari umutoza wayo

Yanditswe na Eric Tony Ukurikiyimfura
Kuya 1 Ugushyingo 2021 saa 03:29
Yasuwe :
0 0

Tottenham Hotspur yo mu Cyiciro cya Mbere mu Bwongereza, yirukanye umutoza Nuno Espirito Santo nyuma y’amezi ane gusa imuhaye akazi bitewe n’umusaruro mubi no kutishimirwa n’abafana.

Tottenham yatsinzwe imikino itanu muri irindwi ya Premier League iheruka gukina, irimo uwa Manchester United yatsinzwe ku bitego 3-0 ku wa Gatandatu, tariki ya 30 Ukwakira 2021.

Kuba iri ku mwanya wa munani, irushwa amanota 10 na Chelsea ya mbere, biri mu byatumye yirukana umutoza Nuno Espirito Santo kuri uyu wa Mbere, tariki ya 1 Ugushyingo 2021.

Umuyobozi ushinzwe umupira w’amaguru muri Tottenhm, Fabio Paratici, yagize ati “Tubabajwe no gufata iki cyemezo kuko nzi uburyo Nuno n’abo bakoranaga bifuzaga gukora neza muri iyi kipe.”

Yakomeje agira ati “Nuno ni umugabo mwiza kandi azahora ahawe ikaze hano. Turamushimira n’abo bakoranaga kandi turabifuriza ibyiza ahazaza.”

Nuno, Umunya-Portugal w’imyaka 47, yagizwe umutoza wa Tottenham ku masezerano y’imyaka ibiri muri Kamena uyu mwaka mu gihe yari amaze imyaka ine atoza Wolves.

Yari yatangiye neza muri Tottenham, atsinda imikino itatu ibanza ya Premier League, aho yatowe nk’umutoza w’ukwezi kwa Kanama.

Gusa, nyuma yaho yatsinzwe n’amakipe ya Chelsea, Arsenal, West Ham, Crystal Palace na Vitesse Arnhem muri (Europa Conference League) nubwo yatsinze Aston Villa na Newcastle mu Ukwakira.

Nuno Espirito Santo avuye muri Tottenham atsinze imikino umunani, anganyije inshuro ebyiri mu gihe yatakaje imikino irindwi mu marushanwa yose.

Bimwe mu byatumye asezererwa ni uruhurirane rw’umusaruro uvanze, uburyo ikipe yakinaga n’abafana bashyiraga igitutu ku buyobozi.

Tottenham yatangaje ko umusimbura we azatangazwa mu gihe cya vuba.

Umutaliyani Antonio Conte w’imyaka 52, kuri ubu udafite akazi nyuma yo kuva muri Inter Milan ayihesheje igikombe cya mbere cya Serie A mu myaka 11 muri Gicurasi, ari mu bahabwa amahirwe yo kwerekeza i Londres.

Conte yatwaye Premier League na FA Cup ubwo yatozaga Chelsea, ariko yirukanwa muri Nyakanga 2018 nyuma yo kugira umwaka wa kabiri mubi i Londres.

Uyu mugabo watoje Juventus hagati ya 2011 na 2014, akayihesha ibikombe bitatu bya Serie A mbere yo gutoza Ikipe y’Igihugu y’u Butaliyani hagati ya 2014 na 2016, ari mu bari batekerejweho na Tottenham ubwo yari imaze kwirukana José Mourinho muri Mata.

Nubwo impande zombi zitumvikanye icyo gihe kubera ibyo uyu Mutaliyani yasabaga, kuri ubu bivugwa ko yifuza kugaruka mu butoza kandi nta mahirwe menshi afite yo gusimbura Ole Gunnar Solskjaer mu gihe yakwirukanwa muri Manchester United.

Nuno Espirito Santo yirukanywe na Tottenham nyuma y'amezi ane ahawe akazi
Umutaliyani Antonio Conte ari mu bahabwa amahirwe menshi yo gusimbura Nuno Espirito Santo muri Tottenham

.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .