00:00:00 IGIHE NETWORK KN KINYARWANDA EN ENGLISH FR FRANCAIS

Tottenham yirukanye José Mourinho

Yanditswe na Eric Tony Ukurikiyimfura
Kuya 19 Mata 2021 saa 12:09
Yasuwe :
0 0

Ikipe ya Tottenham yo mu Cyiciro cya Mbere mu Bwongereza, yirukanye uwari umutoza wayo, umunya-Portugal José Mourinho.

Mourinho w’imyaka 58 yahawe akazi na Tottenham mu Ugushyingo 2019, asimbuye Mauricio Pochettino ndetse amasezerano ye yari kurangira ku mpera z’umwaka w’imikino wa 2023.

Gusa, kubura umusaruro mwiza mu marushanwa yo mu Bwongereza n’ay’i Burayi byatumye hafatwa icyemezo cyo kumwirukana habura iminsi itanu ngo Tottenham ikine na Manchester City umukino wa nyuma wa Carabao Cup.

Ibinyamakuru bitandukanye byo mu Bwongereza byatangaje ko Ryan Mason na Chris Powell ari bo bashobora gutoza imikino isigaye muri uyu mwaka w’imikino.

José Mourinho yirukaniwe ko Tottenham iheruka kunganya na Everton ibitego 2-2 ku wa Gatanu, ishobora kutitabira amarushanwa y’i Burayi mu mwaka utaha w’imikino.

Kuri ubu, iyi kipe iri ku mwanya wa karindwi muri Premier League irushwa amanota atanu na Chelsea ya kane mu gihe isigaje imikino itandatu.

Byitezwe ko Tottenham itangira gushaka umutoza mushya uzahabwa akazi mu mpeshyi, ndetse mu mazina agarukwaho cyane harimo Julian Nagelsmann utoza RB Leipzig.

Mu mwaka wa mbere atoza Tottenham, Mourinho wanyuze mu yandi makipe arimo Real Madrid, Chelsea, Inter Milan na Manchester United, yayifashije gukina Europa League nyuma yo kuba iya gatandatu kandi yarayisanze ku mwanya wa 14.

Gusa, nyuma yo kuyihesha gukina UEFA Champions League mu mwaka ushize w’imikino, yasezerewe na RB Lepizig muri 1/8.

Tottenham yirukanye José Mourinho nyuma y'amezi 17 imuhaye akazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .