Kwamamaza

Sunrise yizeye igikombe nyuma yo gutsinda Kirehe ku munota wa nyuma

Yanditswe kuya 22-10-2016 saa 20:01' na Jah d'eau DUKUZE


Ikipe ya Sunrise irangije uyu wa Gatandatu iri mu ziyoboye urutonde rwa shampiyona, nyuma y’aho igitego cya Osée Iyabivuze ku munota wa 90, cyatumye itahukana amanota yose uko ari atatu mu mukino w’umunsi wa kabiri wa shampiyona yakiniraga i Kirehe.

Amakipe ya Kirehe na Sunrise, yinjiye muri uyu mukino yombi anganya amanota atatu yari yakuye kuri Musanze na As Kigali mu mikino ibanza ya shampiyona. Kirehe yari mbere y’abafana bayo, ni yo yatangiranye imbaraga kuri uyu munsi, gusa iminota uko yagendaga ijya mbere, ni ko yacikaga intege.

Rurisa Jean Paul wa Sunrise, ni we wabonye amahirwe akomeye yo gutsinda mu gice cya mbere, gusa umupira we uza kugarurwa neza n’umunyezamu wa Kirehe Nsanganira, wari uhagaze neza kuri uyu munsi.

Igice cya kabiri cy’umukino cyaranzwe no kwiharira umupira kwa Sunrise yagiye ibona uburyo butandukanye bwo gutsinda ariko ubwugarizi bwa Kirehe ndetse n’umunyezamu bagakomeza kwihagararaho, cyane ko n’umurindi w’abafana wakomezaga kubatera imbaraga.

Iminota yanyuma y’umukino wo kuri uyu wa Gatandatu yaranzwe ahanini no kuryama k’umunyezamu wa Kirehe Djuma Nsanganira, byagaragaraga ko ashobora kuba yababaye cyane ubwo mu gice cya mbere yagonganaga na rutahizamu wa Sunrise Orotomal Alex. Umutoza Kishi ariko, akaba yahisemo kumugumisha mu kibuga, cyane ko yari umwe mu nkingi ze za mwamba kuri uyu munsi.

Ubwo umukino waganaga ku musozo, Niyonshuti Gadi yaje kurengurira umupira Iyabivuze Osée wari wagiye mu kibuga asimbuye, maze uyu nyuma yo kubyiga ba myugariro ba Kirehe, ahita arangiriza mu nshundura. Umukino wahise urangira ari icyo gitego 1-0.

Gutsinda uyu mukino mu gihe Rayon Sports yanganyirije i Rusizi 0-0 maze Bugesera na Mukura zigatakaza imikino yazo, bivuze ko kuri ubu Sunrise na Etincelles ari zo ziyoboye urutonde rwa shampiyona mbere y’umukino APR FC izaba ihuriramo na Gicumbi kuri iki Cyumweru. Umutoza wa Sunrise Ideh Chidi Andrew, yizeye ko bazakomereza aho bagatwara n’igikombe.

Ati “Turishimye kuba dufite amanota atandatu tukaba tunayoboye shampiyona. Ni ubwa mbere mu mateka ya Sunrise yisanze ku mwanya wa mbere ku rutonde, turizera ko bizakomeza gutya kuko intego yacu ni igikombe”.

Ku ruhande rw’umutoza Sogonya Hamis Kishi, asanga ikipe ye yabuze akantu gato ngo yegukane inota rimwe gusa abwira Abanyakirehe kwitegura kujya bakira no gutsindwa kuko hari n’indi mikino bazatakaza nkuko bigenda muri shampiyona.

Uko imikino ya shampiyona yagenze

  • As Kigali 3-0 Marines
  • Police 2-1 Bugesera
  • Espoir 0-0 Rayon Sports
  • Mukura 0-1 Etincelles
  • Kirehe 0-1 Sunrise

Ku cyumweru tariki ya 23.10.2016

  • Gicumbi vs APR FC
  • Kiyovu vs Amagaju
  • Musanze vs Pepiniere
Abafana ba Kirehe bari bizeye intsinzi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved