Sunrise FC yakuye intsinzi y’amateka kuri Rayon Sports, Mukura VS ifata umwanya wa mbere (Amafoto)

Yanditswe na Eric Tony Ukurikiyimfura
Kuya 26 Ukwakira 2019 saa 10:35
Yasuwe :
0 0

Sunrise FC yabonye intsinzi ya mbere kuri Rayon Sports muri Shampiyona, iyitsinda ibitego 2-1 mu mukino w’Umunsi wa Gatanu wa Rwanda Premier League wabereye kuri Stade ya Nyagatare (Gologota), kuri uyu wa Gatandatu.

Ubuyobozi bw’Akarere ka Nyagatare buherutse gutangaza ko iyi Stade yitwa iya Nyagatare ariko abakunzi bayo bemeza ko ubwabo bayifata nka Gologota mu rwego rwo kuhakangira amakipe bagiye guhura.

Nyuma yo kuhatsindira Espoir FC ibitego 4-1 mu cyumweru gushize, Rayon Sports ni yo yari itahiwe, ihatsindirwa ibitego 2-1.

Sunrise FC yarushije Rayon Sports mu buryo bugaragara, yafunguye amazamu ku munota wa 17 w’umukino ku gitego cyatsinzwe na Manjanjaro Suleiman ku mupira wari utakajwe na Iranzi Jean Claude.

Igice cya mbere cyarangiye nta buryo bukomeye Rayon Sports irabona imbere y’izamu rya Sunrise FC maze bituma umutoza wayo, Javier Martinez Espinoza, akora impinduka, Oumar Sidibé asimburwa na Bizimana Yannick.

Sunrise FC yakomeje kotsa igitutu izamu rya Rayon Sports ihusha uburyo bwinshi ku bakinnyi bayo b’imbere barimo Omoviare Babuwa Samson na Wangi Pius.

Rayon Sports yakoze impinduka ya kabiri ku munota wa 58, Ciza Hussein winjiyemo asimbuye Iranzi Jean Claude, ahindura umukino ku buryo bugaragara.

Byasabye gutegereza umunota wa 71, Rayon Sports ibona igitego cyo kwishyura cyatsinzwe na Bizimana Yannick ku mupira yaherejwe na Michael Sarpong, aroba umunyezamu Itangishaka Jean Paul.

Nyuma y’iminota 10, Rayon Sports yashoboraga kubona igitego cya kabiri ku mupira wazamukanywe na Rutanga Eric wahisemo kuwiterera mu izamu, ukurwamo na Itangishaka.

Habura iminota itatu ngo 90 isanzwe y’umukino yuzure, Sunrise FC yabonye igitego cy’intsinzi cyatsinzwe na Wangi Pius ku mupira yahawe na Babuwa Samson n’umutwe nyuma yo gusumba Rutanga Eric.

Mu minota y’inyongera, Rayon Sports yasigaye ari abakinnyi 10 mu kibuga ubwo Michael Sarpong yabwiraga nabi umusifuzi wo hagati Rulisa Patience wamuhaye ikarita itukura nyuma y’uko yari amaze kumwereka iy’umuhondo ariko we akamutuka.

Sunrise FC yashobora gutsinda igitego cya gatatu ku buryo bwabonywe na Wangi Pius mu minota y’inyongera, Mazimpaka André akiza izamu rye ubugira kabiri.

Iyi ni yo ntsinzi ya mbere Sunrise FC ibonye imbere ya Rayon Sports muri Shampiyona nyuma yo kuzamuka mu cyiciro cya mbere mu mwaka w’imikino wa 2014/15.

Gutsinda uyu mukino byafashije Sunrise FC gufata umwanya wa karindwi n’amanota arindwi mu gihe Rayon Sports yageze ku mwanya wa gatanu ifite amanota 10.

Mukura Victory Sports yafashe umwanya wa mbere n’amanota 11 (inganya na Police FC), nyuma yo gutsinda Gasogi United ibitego 2-1 mu mukino wabereye i Huye mu gihe Etincelles FC yafashe umwanya wa kane itsinze Bugesera FC ibitego 2-0.

AS Kigali yabonye intsinzi ya mbere muri Shampiyona y’uyu mwaka, itsinze Marines FC igitego 1-0 cya Nshimiyimana Ibrahim, igeza amanota atandatu ku mwanya wa munani.

Etincelles FC yagize amanota 10 nyuma yo gutsinda Bugesera, ni iyo izakirwa na Rayon Sports ku wa Kabiri mu gihe Sunrise FC izakirwa na Musanze FC ku wa Gatatu.

Abakinnyi bitabajwe ku mpande zombi:

Sunrise FC: Itangishaka Jean Paul, Uwambazimana Léon (c), Niyonshuti Gad, Mushimiyimana Régis, Muhinda Brian, Nzayisenga Jean d’Amour, Wangi Pius, Manjanjaro Suleiman, Omoviare Babuwa Samson, Niyibizi Vedaste na Twagirimana Innocent.

Rayon Sports: Mazimpaka André, Iragire Saidi, Rugwiro Hervé, Rutanga Eric, Irambona Eric, Commodore Olokwei, Nizeyimana Mirafa, Mugisha Gilbert, Iranzi Jean Claude, Michael Sarpong na Oumar Sidibé.

Gahunda y’umunsi wa gatanu wa Shampiyona

Ku wa Gatanu tariki ya 25 Ukwakira

  • Police FC 2-0 Heroes FC
  • SC Kiyovu 1-0 Gicumbi FC
  • Espoir FC 2-1 Musanze FC

Ku wa Gatandatu tariki ya 26 Ukwakira

  • AS Kigali 1-0 Marines FC
  • Mukura VS 2-1 Gasogi United
  • Bugesera FC 0-2 Etincelles FC
  • Sunrise FC 2-1 Rayon Sports FC

Ku Cyumweru tariki ya 27 Ukwakira

  • APR FC vs AS Muhanga (Stade de Kigali, 15h00)
Abakinnyi ba Sunrise FC babanje mu kibuga
11 babanjemo ku ruhande rwa Rayon Sports
Michael Sarpong atwara umupira Nzayisenga Jean d'Amour (Mayor)
Mugisha Gilbert yari yitezweho ibitego ku ruhande rwa Rayon Sports
Babuwa Samson ahanganiye umupira na Iragire Saidi
Uyu rutahizamu wa Sunrise FC ukomoka muri Nigeria, yagoye ubwugarizi bwa Rayon Sports
Manjanjaro Suleiman yacitse ba myugariro ba Rayon Sports nyuma yo gushyikira umupira watakajwe na Iranzi
Yahise aroba umunyezamu Mazimpaka André, icya mbere kiba kiranyoye
Manjanjaro ukomoka muri Uganda na Babuwa Samson, bishimira igitego cya mbere cya Sunrise FC
Byari ibyishimo ku bakinnyi ba Sunrise FC bari imbere y'abafana
Iragire Saidi asubizayo umutwe wari uhawe Niyibizi Vedaste
Babuwa Samson ahanganiye umupira na Kapiteni wa Rayon Sports, Rutanga Eric
Nizeyimana Mirafa agerageza kwambura umupira uyu rutahizamu wa Sunrise FC
Byarangiye uyu mukinnyi wo hagati wa Rayon Sports, atsindiye uyu mupira
Michael Sarpong atera umupira n'umutwe, gusa wahise ufatwa na kapiteni wa Sunrise FC, Uwambazimana Léon

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza