Sunrise FC yahize gutsinda APR FC nk’uko iheruka kubigenza

Yanditswe na Eric Tony Ukurikiyimfura
Kuya 26 Ugushyingo 2019 saa 09:13
Yasuwe :
0 0

Intero ni imwe ku mutoza w’Umunya-Uganda, Moses Basena utoza Sunrise FC, kapiteni w’ikipe Uwambazimana Léon ‘Kawunga’ ndetse n’abafana bemeza ko APR FC ikwiye kuza yikandagira kuko uyu munsi ishobora kongera gutsindwa na Sunrise FC.

Iyi kipe yo mu Ntara y’Uburasirazuba iri ku mwanya wa gatandatu n’amanota 14, irakira APR FC ya mbere n’amanota 21 mu mukino w’umunsi wa 10 wa Shampiyona ubera kuri Stade ya Nyagatare saa 15:00.

Ubwo Sunrise FC yari imaze gutsinda Heroes FC ibitego 4-1 mu mpera z’icyumweru gishize, umutoza wayo, Umugande Moses Basena yavuze ko mu Rwanda nta kipe ikomeye ihari ku buryo asanga no gutsinda APR FC bishoboka.

Ati” Nta kipe hano mu Rwanda ikomeye, hari amakipe meza ariko nta kipe ikomeye mbona hano mu Rwanda. Ni byiza ko abakinnyi banjye bari gutsinda kandi ndizera ko bashobora no gutsinda ibitego birenze ibi.”

Aya magambo y’umutoza ntaho atandukaniye n’aya kapiteni w’iyi kipe, Uwambazimana Léon na we wavuze ko APR FC yakagombye kuza yikandagira.

Ati"Umuntu ahora abivuga buri munsi, iyo ukina n’ikipe irwanira igikombe, ni umukino uba ukomeye cyane. APR FC icyo nayibwira ni uko yaza yikandagira ntiyizere ko izaza gutoragura amanota atatu, uwiteguye neza ni we uzawutsinda."

Abafana ba Sunrise FC bafite bafite icyizere ko ikipe yabo yongera gutsinda APR FC nk’uko yabigenje mu mwaka ushize w’imikino ubwo yayitsindiraga n’ubundi i Nyagatare ibitego 3-2 mu mikino ibanza.

Ku ruhande rwa APR FC, Niyonzima Olivier ‘Sefu’ ukina mu kibuga hagati, yavuze ko icyo bakeneye ari amanota atatu muri uyu mukino.

Ati” Sunrise ni ikipe nziza irimo no kwitwara neza muri shampiyona, ariko twebwe ku ruhande rwacu turiteguye icyo dushaka ni amanota atatu ku munsi w’ejo.’’

Mu mikino 10 imaze guhuza amakipe yombi kuva Sunrise FC izamutse mu cyiciro cya mbere mu myaka ine ishize, APR FC yatsinzemo imikino umunani, iyi kipe yo mu Burasirazuba itsinda ibiri isigaye.

Imikino yombi Sunrise FC yatsinze ni yo yakiriye ku kibuga cyayo ku bitego 3-0 (mu 2015 ubwo APR FC yari yaramaze guhabwa igikombe cya Shampiyona) na 3-2 mu ntangiriro z’uyu mwaka.

Sunrise FC kuri ubu ikinira ku kibuga gishya cy’ubwatsi bw’ubukorano, nta mukino iratakaza mu yo imaze kwakira muri uyu mwaka w’imikino ndetse yahatsindiye amakipe atandukanye arimo na Rayon Sports.

Umunya-Nigeria Babuwa Samson n’Umugande Wangi Pius bombi bakinira Sunrise FC, ni bo bayoboye abamaze gutsinda ibitego byinshi kugeza ubu, aho bombi bafite ibitego birindwi mu mikino icyenda.

Sunrise FC ntiratsindirwa mu rugo mu mikino yose imaze kwakira muri uyu mwaka w'imikino
Moses Basena utoza Sunrise FC asanga mu Rwanda nta kipe ikomeye kurusha izindi ihari
Abafana ba Sunrise FC bafitiye icyizere ikipe yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza