Sugira Ernest yavuze ku mukobwa wamusabye kumutera inda

Yanditswe na Bukuru JC
Kuya 10 Gashyantare 2021 saa 09:14
Yasuwe :
0 0

Rutahizamu w’Ikipe y’Igihugu ‘Amavubi’ na Rayon Sports, Sugira Ernest, yabajijwe icyo atekereza ku mukobwa wamusabye kumutera inda kubera ibyishimo yatewe n’intsinzi yahesheje u Rwanda kuri Togo muri CHAN 2020 yabereye muri Cameroun.

Ku wa 26 Mutarama 2021, ni bwo Ikipe y’Igihugu yari muri Shampiyona Nyafurika y’abakina imbere mu bihugu byabo (CHAN 2020) yatsinze iya Togo ibitego 3-2, ibona itike yo kugera muri ¼.

Sugira Ernest yatsinze igitego cy’intsinzi ku ruhande rw’Amavubi mu gihe ibindi bitego byatsinzwe na Niyonzima Olivier ‘Seif’ na Tuyisenge Jacques byari byabonetse byishyura ibyatsinzwe n’abanya-Togo.

Gutsinda kw’Amavubi kwabonetse nyuma y’amezi asaga 15 Ikipe y’Igihugu itabona intsinzi mu marushanwa yose, byashimishije cyane Abanyarwanda batandukanye, biba akarusho mu Mujyi wa Kigali wari muri gahunda ya Guma mu Rugo icyo gihe, bamwe mu bawutuye bajya mu mihanda batitaye ku mabwiriza yo kwirinda COVID-19.

Benshi bagiye ku mbuga nkoranyambaga bagaragaza imbamutima zabo ku Ikipe y’Igihugu, ariko ubutumwa bwagarutsweho cyane ni ubw’umuhanzikazi Noëlla Izere wanditse kuri Twitter abwira Sugira Ernest ati “Basi uzantere inda.”

Mu kiganiro yagiranye na shene ya Youtube ya Rayon Sports, Sugira Ernest wari kumwe na Rugwiro Hervé bari kumwe muri CHAN 2020, yavuze ko atarabona umwanya uhagije wo kureba ubutumwa bwose yandikiwe n’Abanyarwanda bishimiye igitego yatsinze Togo.

Ati “Ntabwo ndabona umwanya uhagije wo kujya ku mbuga nkoranyambaga ngo ndebe gusa bimwe na bimwe inshuti zanjye zirabinyereka.”

Abwiwe ko hari n’uwamusabye umwana [kumutera inda], Sugira wabanje guseka ndetse akihanagura mu maso, yagize ati “Ntabwo mbizi.”

Kapiteni wa Rayon Sports, Rugwiro Hervé, yumvikana hagati aho abwira Sugira ati “Umwana ni umugisha.”

Umuvugizi wa Rayon Sports, Nkurunziza Jean Paul, baganiraga, yongeye kumubaza ati “Uramumwimye?”, Sugira asubiza ati “Oya, nta kintu ntangaje, mpisemo kwifata. Biriya ni ibyo ku mbuga nkoranyambaga ntabwo wabiha agaciro cyane, ngo ugire ikintu ubivugaho, ushobora gusanga ari undi wamwiyitiriye, akiyitirira ririya zina.”

Abwiwe ko uwabimusabye yabyemeye, Sugira yagize ati “Ubwo butumwa ntabwo nabubonye. Ubwo hari impamvu yabyanditse, ntabwo muzi amaso ku maso, ndakeka na we atarambona. Simbizi [niba tuzabonana].”

Sugira Ernest yavuze ko intego afite ari ugukomeza gushimisha Abanyarwanda nubwo hari igihe byanga. Ati “Buriya natwe ibyishimo tuba tubitegereje nk’abakinnyi kandi tugomba kubibaha cyane ko ari bo bigenewe, niba barabibonye bikabashimisha kuriya, ubutaha ndakeka ko bizikuba.”

“Niba umuntu yemera kurenga ku mategeko y’igihugu akajya hanze kubera ibyishimo, ni ikiba kikwereka ko babikumbuye.”

Ni ku nshuro ya kabiri Sugira Ernest yari yitabiriye irushanwa rya CHAN ndetse ubwo yarikinaga bwa mbere mu 2016, yabengutswe na AS Vita Club yo muri Repubulika Iharanira Demokarasi ya Congo, ayikinira umwaka umwe n’igice.

Kuri ubu, yifuzwa n’ikipe yo muri Jordanie ndetse yemeje ko hakiri ibiganiro hagati ye, APR FC yamutije muri Rayon Sports n’abamwifuza.

Sugira Ernest yavuze ko yifashe ubwo yari abajijwe niba azaha umwana umukobwa wamumusabye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .