00:00:00 IGIHE NETWORK KN KINYARWANDA EN ENGLISH FR FRANCAIS

StarTimes izerekana umukino w’ishiraniro uzahuza Atlético Madrid na FC Barcelone

Yanditswe na Bukuru JC
Kuya 1 Ukwakira 2021 saa 02:07
Yasuwe :
0 0

Shampiyona y’Icyiciro cya Mbere muri Espagne, La Liga, izakomeza mu mpera z’icyumweru aho umukino utegerejwe na benshi ari uzahuza Atlético Madrid na FC Barcelone ku wa Gatandatu.

Atlético Madrid yatwaye igikombe giheruka, izakira uyu mukino kuri Stade Wanda Metropolitano guhera saa Tatu z’ijoro.

Ikipe y’umutoza Diego Simeone iheruka gutsindwa igitego 1-0 na Deportivo Alaves mu mpera z’icyumweru gishize ndetse kuri ubu iri ku mwanya wa kane irushwa amanota atatu na Real Madrid ya mbere.

Ku rundi ruhande, FC Barcelone yatsinze Levante ibitego 3-0 mu mukino uheruka ibifashijwemo na Memphis Depay ndetse na Ansu Fati wari ukirutse imvune yarwaye iminsi 323.

Byasabye iminota 10 Fati ukomoka muri Guinea-Bissau gutsinda igitego cye mu mukino we wa mbere yambaye nimero 10 yahoze yambarwa na Lionel Messi muri FC Barcelone.

Kuri ubu, ntabwo umutoza wa FC Barcelone, Ronald Koeman, yorohewe nyuma y’uko inyagiwe na Benfica ibitego 3-0 ku wa Gatatu muri UEFA Champions League ndetse ikaba irushwa amanota atanu na Real Madrid muri La Liga.

Gusa, ntabwo Koeman azatoza umukino wo ku wa Gatandatu kuko azasiba umukino wa kabiri muri La Liga nyuma y’uko yahawe ikarita itukura ku mukino FC Barcelone yanganyijemo ubusa ku busa na Cadiz. Alfred Schreuder umwungirije ni we uzatoza.

Diego Simeone yizeye ko Antoine Griezmann uheruka gusubira muri Atlético Madrid nk’intizanyo ya FC Barcelone, ashobora kongera kugira ibihe byiza nk’ibyo yagiriye i Madrid mbere y’uko ahava.

Abakunzi b’umupira w’amaguru muri Afurika bazabasha kureba uyu mukino uri kuba mu mashusho meza ya HD kuri shene za StarTimes nk’ikigo kiyoboye mu ikoranabuhanga ryo gusakaza amashusho ya televiziyo muri Afurika.

Umukino wa Atlético Madrid na FC Barcelone utegerejwe na benshi mu mpera z'iki cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .