Stade yayo n’imishinga y’ubucuruzi: Icyerekezo 2030 cya Rayon Sports gishingiye ku bitekerezo 149

Yanditswe na Eric Tony Ukurikiyimfura
Kuya 15 Gashyantare 2021 saa 08:17
Yasuwe :
0 0

Ubuyobozi bwa Rayon Sports bwatangaje bimwe mu byifuzo byagaragajwe n’abanyamuryango bayo mu cyekerezo 2030 harimo kugira stade yayo yihariye, aho gukorera idakodesha n’imishinga y’ubucuruzi, ikareka kubaho bya nyakabyizi.

Nyuma yo gutorwa mu Ukwakira 2020, mu kwezi kwakurikiyeho Komite Nyobozi ya Rayon Sports yagiranye inama zitandukanye n’abanyamuryango bayo (Fan Club 47) barebera hamwe aho intege nke ziri muri uyu muryango n’ibyakorwa ngo utere imbere.

Kuri shene ya Youtube ya Rayon Sports, Umuyobozi w’Umuryango Rayon Sports, Uwayezu Jean Fidèle, yavuze ko kandi hagishijwe inama abahanga mu ngeri zitandukanye ndetse nyuma yaho hagashyirwaho ikipe isesengura ibitekerezo byatanzwe ku buryo mu byumweru bitatu biri imbere bizamurikirwa abanyamuryango.

Ibibazo byugarije Rayon Sports byatumye yiha icyerekezo

Umuyobozi wa Rayon Sports yavuze ko mu bitekerezo byatanzwe n’abanyamuryango bayo byagarutse cyane ku miyoborere, amategeko n’umutungo.

Ati “Batanze ibitekerezo 149, ibyo bitekerezo ya kipe y’abahanga twashyizeho yagiye ibishyira mu byiciro bishingiyeho kugira ngo tuzabashe kubikorera isesengura, tubishakire ibisubizo. Fan Clubs zatanze ibiterekezo 70 bishingiye ku buyobozi, ibitekerezo nka 40 byari bishingiye ku mikorere ya za Fan Clubs, ibitekerezo 24 byari bishingiye ku mupira w’amaguru ubwawo, 14 niba nibuka neza byari bishingiye ku mutungo, amategeko, ikoranabuhanga, ibyo nabyo babivuga gutyo. “

Yakomeje avuga ko ibi bitekerezo byatanzwe n’abanyamuryango byagaragaje izingiro ry’ibibazo n’intege nkeya bya Rayon Sports, bituma hatekerezwa uburyo yabaho ifite icyerekezo n’ibyo ishaka kugeraho.

Ati “Cyane cyane, intege nkeya z’umuryango wa Rayon Sports zari mu miyoborere, izindi ni imikorere ya Fan Club, n’izindi ziri mu mategeko, mu mikorere y’ikoranabuhanga.”

“Mu byo bahurizagaho harimo kuba umuryango umaze imyaka 55, kuba nta cyerekezo ufite ni ikibazo, ibaho nyakabyizi, ni byiza ko Rayon Sports igira icyerezo.”

“Bagaragaje ko nta bubiko bw’inyandiko, kutagira aho gukorera, kudakurikiza amategeko, akavuyo mu micungire y’umutungo no kuba nta mishinga ifatika ikipe igira yayibyarira umusaruro.”

Hurbert Sugira Hategekimana, inzobere mu bijyanye n’imiyoborere, yavuze ko uburyo Rayon Sports yayoborwagamo bitandukanye n’ubwo amakipe menshi ku Isi abamo burimo kugira nyirayo umwe, kugirwa n’urwego cyangwa ikigo, kugirwa n’abanyamigabane, kugirwamo imigabane n’abafana no kugirwa n’abafana gusa.

Ati “Umuntu yumvise uburyo Rayon Sports yabagaho anakurikije amahame y’imiyoborere, ahubwo aratangara kuko ntibyumvikana uburyo yakinaga ikanatsinda. “

“Rayon Sports yari ifite ikibazo gikomeye kuko uburyo imiyoborere yari yubatse ntabwo ari bwo. Ikibazo yari ifite si icy’abayiyoboraga mu by’ukuri, ahubwo n’uko yayoborwaga. Birashoboka ko hari n’andi makipe ameze gutyo.”

“Abafana ubwabo bagaragaje ko 47% by’ibibazo Rayon Sports ifite ari imiyoborere, imicungire ni 26% mu gihe ibyo mu kibuga ari 13% naho iby’amafaranga ni 9%.”

Yakomeje avuga ko uburyo Urwego rw’Igihugu rw’Imiyoborere (RGB) rwakemuyemo ibibazo bya Rayon Sports muri Nzeri 2020, byatanze umusingi wo kubakiraho mu miyoborere yayo.

Ati “Ikibazo kinini Rayon Sports yari ifite cyamaze gukemurwa kuko noneho ubu bamaze kubiha umurongo.”

“Urumva mbere Rayon Sports yari iy’abafana, ariko none ikamera nk’aho ari iya perezida. Uburyo Rayon Sports yayoborwagamo ntibwabagaho.”

“Rayon Sports nishaka gukomera izajye ikopera kuri Real Madrid na FC Barcelone kuko ni zo zibayeho kimwe na yo.”

Abanyamuryango ba Rayon Sports bifuje kubaka Stade

Uwayezu Jean Fidèle yavuze ko mu byo abanyamuryango bose ba Rayon Sports bahurijeho harimo ko “bifuza Rayon Sports itarangwamo amacakubiri, turifuza Rayon Sports izira umwiryane.”

“Bati turifuza Rayon Sports ikora kinyamwuga, itabaho uko bukeye, bakifuza ko Fan Club zigira ijambo. Bifuje kumenya abanyamuryango n’abakunzi ba Rayon Sports, bifuje gushyiraho umurongo w’itumanaho nk’uyu turi gukoresha, gushyiraho amategeko, bifuje Rayon Sports itsinda kandi ni ikintu utasubiza inyuma.”

“Barifuza Rayon Sports ifite académie, itubakiye ku bakinnyi b’abanyamahanga ahubwo izamura impano z’Abanyarwanda. Barifuza Rayon Sports ifite aho ikorera, ifite imiyoborere myiza, umukozi uzi iby’umupira w’amaguru, umuyobozi uzi gucunga umutungo, umuyobozi uzi gukora ubucuruzi.”

Yavuze ko ibi bitekerezo hari ababifashe nk’inzozi, ariko yemeza ko bizakorwa mu gihe cy’imyaka 10 kandi nta kabuza bizagerwaho.

Ati “Hari abantu bavuze ngo ibyo ni inzozi, ariko ni ibintu tuzakora mu myaka 10. N’iyo ugiye kubaka inzu hari ababibona nk’inzozi, hazagenda hakorwa ibyihutirwa, ariko n’ibindi ntawakubuza kubikoraho no kubitekerezaho.”

“Barifuza ko Rayon Sports yagira ibiro byayo bwite yiyubakiye, idakodesha, baranifuza ko igihe cyazagera ikagira stade yayo, ibyo ntiwavuga ngo iki cyifuzo tukireke ntigishoboka. Gishyire mu byifuzo kuko ni icyifuzo igihe cyazagera mukakigeraho. Birumvikana stade si umwaka umwe, ibiri, ine, cyangwa itanu, ariko mu 10 birashoboka.”

Komite ihari ubu izahera ku bihe byifuzo?

Uwayezu yavuze ko ibizakorwa mu myaka 10 bizemezwa n’abanyamuryango, ariko nka komite ihari ubu izahera ku bizaba bigaragara ko bishoboka kandi byihutirwa.

Ati “Nibamara kubyemeza, twe komite yatowe hari ibizaba bigaragara ko mu myaka ine twabikora, ni ibyo twakora. Hari n’ibyo twakora bikarangira mu myaka ine cyangwa itandatu, tukagenda tubaha raporo. Indi komite yatorwa izaza ikorere mu mu murongo abanyamuryango bashyizeho, uzajyaho nashaka kubavangira bazamukuraho kuko ibintu bizaba bisobanutse, komite izakora ibyo abanyamuryango bayemereye.”

Umuyobozi wa Rayon Sports yavuze ko mu byumweru bibiri cyangwa bitatu biri imbere bateganya guhamagaza abanyamuryango bakabereka uburyo ibyifuzo byabo byagabanyijwe mu byiciro bitandukanye, kugira ngo byemezwe mbere yo gutangira gushyirwa mu bikorwa.

Perezida wa Rayon Sports, Uwayezu Jean Fidèle, yavuze ko mu byifujwe n'abanyamuryango bayo mu cyerekezo 2030 harimo kubaka stade no kugira imishinga y'ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .