Kwamamaza

Sosiyete yagurishije Victor Wanyama i Burayi igiye kujyana n’Abanyarwanda batatu

Yanditswe kuya 3-10-2016 saa 21:16' na Manzi Rema Jules


Abakinnyi batatu b’Abanyarwanda barimo Kiza Twaha, Kanani Aboubacar ukinira Gicumbi FC na Uwimana Emmanuel uzwi nka Nsoro wakiniraga AS Kigali mu mwaka ushize akaza kwirukanwa, bagiye gufashwa na Sosiyete yo muri Kenya “Green Sports” yagurishije abakinnyi nka Victor Wanyama ukinira Tottenham Hotspur na Divock Origi wa Liverpool ku mugabane w’u Burayi.

Aba basore bigaragaje mu irushanwa ryari ryateguwe n’iyi Sosiyete muri Kanama bagafasha ikipe yari yaturutse i Rwamagana kwegukana igikombe cyahatanirwaga n’amakipe agera ku 160 ariko atarabigize umwuga.

Nyuma yo gushimwa no kwitwara neza, aba bakinnyi batoranyijwe mu bazashakirwa amakipe ku mugabane w’u Burayi.

Ibi byatangajwe n’Umukorerabushake utoza abana mu Karere ka Rwamagana, Kamanzi Haridi kuri iki Cyumweru mu muhango wo kwereka abagatuye n’ababyeyi b’abana bari bagiye muri Kenya igikombe n’ibihembo begukanye muri iryo rushanwa.

Kamanzi wari uyoboye iyi kipe muri iryo rushanwa yavuze ko uretse igikombe n’amafaranga begukanye hari n’abakinnyi batatu batoranyijwe kuzajyanwa ku mugabane w’u Burayi.

Ati “Muri Kenya byaratugoye kujyayo kuko byari ukwirwanaho nta bufasha ariko abana baritanze kugeza ku mukino wa nyuma twegukana igikombe dutsinze ikipe ya Green Sports. Twegukanye igikombe n’amashilingi ibihumbi 50, ariko ikiruta ibindi abakinnyi bitwaye neza ku buryo hari batatu batoranyijwe bazafashwa kujya ku mugabane w’u Burayi.”

Uyu mugabo ufitemo n’umwana we bwite mu batoranyijwe n’iyi Sosiyete witwa Kanani Aboubacar wamaze kwerekeza muri Gicumbi FC, yavuze ko azajyana na Uwimana Emmanuel uzwi nka Nsoro wirukanywe muri AS Kigali akerekeza muri Etincelles ndetse na Kiza Twaha wari Kapiteni w’iyi kipe akaba ari na we wenyine wari muri uyu muhango kuko abandi bari kwitegura shampiyona n’amakipe yabo.

Kamanzi yibukije ababyeyi ko bagomba guha abana amahirwe yo gukina umupira kuko ushobora guhindura ubuzima bwabo, anasaba ubuyobozi bwa Ferwafa, Akarere n’abikorera guhaguruka bagatera inkunga amashuri y’umupira kuko bakizitirwa n’amikoro make nyamara abana bagaragaza impano bakeneye ubufasha no kwitabwaho ari benshi.

Umuhango wo kumurika igikombe wabanjirijwe n’imikino yahuje Rwamagana Training Center na Rwamagana City mu batarengeje imyaka 15 n’abakuru, imikino yose yarangiye amakipe anganya ubusa ku busa.

Ubusanzwe Green Sports ikorana n’amakipe atandukanye ku mugabane w’u Burayi igashaka abakinnyi mu Karere ka Afurika y’i Burasirazuba n’Amajyepfo ikabajyanayo.

Aba bakinnyi yatoranyije uyu mwaka ntiharamenyekana amakipe bazajyamo n’amatariki bazagenderaho ariko mu kwezi gutaha abo mu Rwanda bazajya muri Kenya guhabwa gahunda n’ibisabwa muri urwo rugendo.

Bamwe mu bana bifitemo impano ariko nta bufasha bahabwa
Abana batarengeje imyaka 15 bagaragaje ko bafite ahazaza heza mu guconga ruhago
Rwamagana Training Center ishobora kuzagaragara mu cyiciro cya kabiri igihe Rwamagana City izaba igarutse mu cya mbere
Abakiri bato baracyazitiwe n'ikibazo cy'ibikorwaremezo birimo ibibuga byiza
Rwamagana City yamaze kumanuka mu cyiciro cya kabiri yanganyije na Rwamagana Training Center ubusa ku busa
Umugore wa Kamanzi utarumvaga ibyo umugabo we yarimo byo kwirirwa mu mipira, yamuhaye impano anamushimira ku kazi keza yakoze
Kamanzi Haridi utoza Rwamagana Training Center yasabye ubuyobozi kubatera inkunga kugira ngo bafashe abana benshi bafite inyota yo gukina ruhago
Rwamagana Training Center yegukanye igikombe n'ibihumbi 50 by'amashilingi ya Kenya
Kapiteni wa Rwamagana Training Center, Kiza Twaha uri mu bazajyanwa i Burayi yerekana igikombe bakuye muri Kenya

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved