Sibomana Patrick yareze Yanga SC muri FIFA

Yanditswe na Eric Tony Ukurikiyimfura
Kuya 29 Werurwe 2021 saa 10:19
Yasuwe :
0 0

Rutahizamu wa Police FC n’Ikipe y’Igihugu ’Amavubi’, Sibomana Patrick, yamaze gutanga ikirego mu Ishyirahamwe ry’Umupira w’Amaguru ku Isi, FIFA, arega ikipe ya Yanga SC yahozemo ko itubahirije ibyo impande zombi zari zumvikanye mbere yo gutandukana.

Sibomana Patrick yatandukanye na Yanga SC muri Kanama 2020, nyuma yo gusezererwa ashinjwa umusaruro muke.

Kuba uyu mukinnyi yarirukanywe agifite amasezerano y’umwaka umwe kandi akaba yari aberewemo imishahara y’amezi atatu na Yanga SC, byatumye impande zombi zibanza kumvikana.

Sibomana wari wishyuwe ibihumbi 15$ gusa mu bihumbi 25$ yaguzwe avuye muri Mukura Victory Sports, yagombaga guhabwa ibihumbi 6$ mu mishahara y’amezi atatu.

Gusa, impande zombi zumvikanye ko hari amafaranga make y’imisoro azavaho, akishyurwa ibihumbi 14$ (ibihumbi 10$ yasigaye agurwa n’ibihumbi 4$ by’imishahara) bitarenze mu Ukwakira 2020.

Nyuma y’uko Yanga SC itubahirije ubwo bwumvikane mu mezi arindwi ashize ndetse Sibomana Patrick akagerageza kuyibutsa, ariko ntibihe agaciro, uyu mukinnyi w’Umunyarwanda yahisemo gutanga ikirego muri FIFA nk’uko abyemeza.

Ati “Ni byo, hashize ibyumweru bibiri ngitanze, nashatse abanyamategeko babimenyereye ni bo barimo kubikurikirana ariko ikirego cyo cyaragiye. Bambwiye ko hagati y’amezi atatu cyangwa ane kizaba cyacyemutse.”

Sibomana Patrick wamenyekanye akinira Isonga FC mu 2012, yerekeje muri APR FC mu 2013, ayikinira imyaka ine.

Umwaka w’imikino wa 2017/18, yawukinnye muri FC Shakhtyor Soligorsk yo muri Belarus mbere y’uko yerekeza muri Mukura Victory Sports yakiniye amezi atandatu mu 2019.

Mu mpeshyi y’uwo mwaka, ni bwo yaguzwe na Yanga SC ku bihumbi 25$ mu gihe cy’imyaka ibiri ariko batandukana nyuma y’umwaka umwe. Muri Nzeri 2020, yasinyiye Police FC umwaka umwe.

Sibomana Patrick yareze Yanga SC muri FIFA kuko itamwishyuye ibihumbi 14$ imugomba
Sibomana yakiniye Yanga SC umwaka umwe muri ibiri yari yarasinye
Muri Nzeri 2020, Sibomana Patrick yerekanywe nk'umukinnyi mushya wa Police FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .