Sheikh Hamdan yageneye ubutumwa uzamusimbura ku bunyamabanga bwa Mukura VS

Yanditswe na Ishimwe Israel
Kuya 29 Nzeri 2016 saa 09:20
Yasuwe :
0 0

Sheikh Hamdan Habimana wari Umunyamabanga Mukuru wa Mukura VS, uherutse kwegura yasabye umuntu wese uzamusimbura kwitwararika mu gufata ibyemezo, kugisha inama kuva ku mukozi wo hasi kugera kuri Perezida, no gufata neza abakinnyi niba ashaka iterambere ry’ikipe.

Mu gitondo cyo kuwa Kabiri tariki 27 Nzeri nibwo Sheikh Hamdan yatangaje ko yeguye ku mirimo yari amazeho umwaka n’amezi abiri atorewe kubera impamvu ze bwite.

Nyuma y’amasaha make, Perezida w’ikipe, Nizeyimana Olivier, nawe yahise yegura nyuma yo kwakira ibaruwa irambuye yanditswe n’abakinnyi bamusaba kugarura umunyamabanga mu nshingano ze.

Mu kiganiro Sheikh Hamdan yagiranye na IGIHE yashimangiye ko adateganya kwisubiraho ku cyemezo yafashe cyo kwegura ahubwo agira inama uzatorwa kugira ngo amusimbure.

Yagize ati “Njye naragiye byararangiye. Gusa ntihagire utekereza ko mvuye muri Mukura kuko ni umuryango, icyo naretse ni ubuyobozi. Ndumva hagomba guterana inteko rusange idasanzwe kugira ngo batore unsimbura. Mukura ifite abantu b’abagabo benshi hazaboneka ubikora neza ndetse akaba yanandusha gusa ndasaba abazatora gushishoza bakareba umuntu w’inyangamugayo kandi wo muri Mukura koko.”

Yakomeje agira ati “Ku muntu uzatorwa nk’umunyamabanga, we namusaba kuzajya agisha inama kandi nta muntu asuzuguye kuva ku mukozi wo hasi muri Mukura kugera kuri Perezida bazaba bakorana. Ikiruta ibindi ni ukuba hafi y’abakinnyi bakumva ko uri umuvandimwe, iri ni ryo banga ryamfashije cyane.”

Sheikh Hamdan wari umaze gujkora impinduka mu buzima bwa Mukura VS mu gihe yari amaze, yayifashije kurangiza ku mwanya wa gatatu muri shampiyona y’umwaka ushize.

Ikindi gituma uyu mugabo afatwa nk’ishyiga ry’inyuma mu kwitwara neza kwa Mukura VS, ni uburyo yafataga abakinnyi neza, agerageza gukemura ibibazo bitandukanye cyane ibishingiye ku mishahara byari byaragiye biba agatereranzamba mu myaka yashize.

Uretse kuba yari umuyobozi utanga ubufasha muri byinshi, Sheikh Hamdan yaniyemeje kuzatanga miliyoni zirenga 15 mu ngengo y’imari ingana na miliyoni 157 ikipe izakoresha.

Nizeyimana Olivier wari Perezida (ibumoso) na Sheikh Habimana Hamdan (iburyo) beguriye umunsi umwe muri Mukura VS
Abakinnyi ba Mukura ntibishimiye ubwegure bw'uwari Umunyamabanga w'ikipe, Sheikh Habimana Hamdan
Sheikh Hamdan Habimana akimara kwegura, abakinnyi banditse basaba ko agaruka ku mirimo ye
Mukura VS yarangije ku mwanya wa gatatu muri shampiyona y'umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza