Senateri Makuza na bagenzi be basubiriye ikipe y’abanyamakuru bayitsinda bibiri

Yanditswe na Jah d’eau Dukuze
Kuya 7 Ugushyingo 2016 saa 10:41
Yasuwe : XX
0

Ikipe ya Vision 2020 yiganjemo abayobozi b’igihugu, ni yo yegukanye igikombe cyo kwizihiza umunsi nyafurika w’itangazamakuru, nyuma yo gutsinda ikipe y’abanyamakuru b’imikino ibitego 2-0.

Uyu mukino waberaga kuri Stade Amahoro watangiranye imbaraga ku ruhande rw’ikipe ya Vision 2020 inafitemo bamwe mu bakinnyi bahoze bakina ruhago, nka Muvunyi Fils waciye muri Mukura VS na Bazil Bazibuze wahoze akinira muri APR FC.

Ikipe y’abanyamakuru b’imikino ariko, yaje kwinjira mu mukino kuva ku munota wa 20, ndetse igenda inabona amahirwe menshi yo gutsinda igitego itabyaje umusaruro.

Vision 2020 yavuye mu karuhuko ihindura ibintu

Igice cya kabiri cyatangiye n’ubundi abanyamakuru basatira gusa kurangiriza mu nshundura bikomeza kuba ingorabahazi. Ubwo aba bizeraga ko umukino bawufite mu ntoki ariko, ku munota wa 78, Bazir yaje guhabwa umupira ni ko kuwugeza kwa Mudaheranwa Kalisa Shani, wahise afungura amazamu.

AJSPOR yakoze impinduka zitandukanye ngo ibe yakwishyura iki gitego, yaje gutsindwa ikindi ku munota wa 82, na cyo cyatsinzwe na Shani nyuma yo guhererekanya na Bazir. Umukino waje kurangira ari ibyo bitego 2-0, Vision yongera kwegukana igikombe nkuko yari yabigenje umwaka ushize inyagira abanyamakuru 6-2.

Uretse igikombe cyahawe ikipe yabaye iya mbere, hanatanzwe n’ibindi bihembo bitandukanye byatangwaga n’Inama y’Igihugu y’Itangazamakuru, ifatanyije n’Ikigo cy’Igihugu cy’Imiyoborere, RGB. Umukinnyi witwaye neza ku ruhande rw’abanyamakuru yabaye Nishimiyimana Richard, mu gihe ku ruhande rwa Vision iki gihembo cyahawe Perezida wa Sena Makuza Bernard wakinnye iminota yose 90.

Uretse ibi kandi, ikipe ya Vision 2020 yatwaye igikombe yahanahawe sheki y’ibihumbi magana arindwi (700 000Frw), mu gihe AJSPOR yabaye iya kabiri, yanahawe sheki y’ibihumbi 400.

Ni umukino wateguwe n’Inama y’Igihugu y’Itangazamakuru, ifatanyije n’abandi bafatanyabikorwa batandukanye barimo Ikigo cy’Igihugu gishinzwe imiyoborere, RGB ndetse n’Ishyirahamwe ry’Abanyamakuru mu Rwanda (ARJ), mu rwego rwo gutegura inama ya munani y’umushyikirano ku itangazamakuru ihurirana n’umunsi nyafurika w’itangazamakuru tariki ya 7 Ugushyingo.

Abanymakuru 11 babanje mu kibuga
Vision 2020
Bamwe mu bakunzi b'imikino bari baje kwihera amaso uyu mukino kuri Stade Amahoro
AJSPOR yahawe sheki ya 400 000Frw
Vision 2020 ishyikirizwa igikombe
Machad yatowe nk'umukinnyi w'umukino ku ruhande rw'abanyamakuru
Makuza wakinnye iminota 90 yatowe nk'umukinnyi witwaye neza ku ruhande rwa Vision 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza