Sarpong yavuze uburyo APR FC idakomeye, iby’urukundo rwe, icyo yasaba Perezida Kagame n’inzozi afite

Yanditswe na Eric Tony Ukurikiyimfura, Ndayikunda Josué
Kuya 30 Ukwakira 2019 saa 09:56
Yasuwe :
0 0

Rutahizamu w’Umunya-Ghana ukinira Rayon Sports, Michael Sarpong, yavuze ko asanga APR FC idakomeye ku buryo yabatera ubwoba mu gihe yemeje ko imwe mu mikino amaze gukina neza atakwibagirwa kugeza uyu munsi harimo uwo Gikundiro yanganyijemo na Al-Hilal Club igitego 1-1- mu ijonjora rya mbere rya CAF Champions League.

Sarpong w’imyaka 23, ni rutahizamu wa Rayon Sports kuva muri Kanama 2018, akaba akomoka mu gace ka Mamprobi mu Murwa Mukuru wa Ghana, Accra.

Uyu mukinnyi akomoka kuri Joseph Sarpong na Charlotte Secchi, akaba ari imfura mu muryango w’abana batatu, we na bashiki be babiri bamukurikira.

Mbere y’uko aza muri Rayon Sport, Sarpong yakiniye amakipe arimo Gaddafi FC, Red Blue, Liberty Professionals na Dream FC ariyo yavuyemo aza mu ikipe y’ubururu n’umweru.

Mu kiganiro cyihariye yagiranye na IGIHE, Sarpong yavuze byinshi ku rugendo rwe mu mupira w’amaguru kugeza uyu munsi, iby’urukundo rwe yavuzweho hamwe n’abanyarwandakazi barimo Asinah n’umukobwa witwa Strawberry ndetse na bimwe mu bihe atakwibagirwa nk’umukinnyi.

Urugendo yanyuzemo akina umupira w’amaguru: Gukinira Amavubi birashoboka!

Uyu mukinnyi uri muri ba rutahizamu beza bakina muri Shampiyona y’u Rwanda, yabwiye Umunyamakuru wa IGIHE ko yatangiye gukina afite imyaka itanu gusa, aho yakinaga byo kwishimisha ubwo yabaga avuye ku ishuri.

Ubuhanga yagaragazaga bwatumye umwe mu batoza bo mu marushanwa y’abanyeshuri witwa Habib amugirira icyizere, amusaba kujya gukina mu ikipe yatozaga ndetse ni we wamuhaye inkweto n’imyenda mu gihe yari afite imyaka irindwi, yagiye muri Gaddafi FC atangirira mu ikipe y’abana batarengeje imyaka 10.

Michael Sarpong utaragiraga inkweto zabugenewe zo gukina, aho yifashishaga izo yiganaga, ngo ntiyarashyigikiwe n’umubyeyi we wamusabaga gushyira umutima ku masomo, akareka gukina, ariko ngo bemeranya ko narangiza amashuri yisumbuye azakomeza gukora ibyo akunda, ari byo gukina.

Ati "Mama wanjye ntiyashakaga ko nkina umupira, yarambwiraga ati “Michael! Ntukajye gukina umupira uvuye ku ishuri, jya ufata amakayi wige. Icyo gihe sinagiraga inkweto zo gukinisha umupira, nakoresha inkweto zo kwigana mu myitozo. Iyo natahaga nazaga nihisha, rimwe na rimwe Mama akampana ubundi akanyihorera.”

“Ntibyari byoroshye ariko narabivangaga. Kwiga ni urufunguzo, umwana wese ushaka kuba umukinnyi w’umupira w’amaguru agomba kubanza kwita ku ishuri. Narangije amashuri yisumbuye ndetse ntsinda n’ikizamini cya leta. Nari naragiranye amasezerano na Mama ko nintsinda ikizamini cya leta nkarangiza amashuri yisumbuye ntazongera gukomeza kwiga ahubwo nzakina umupira w’amaguru.”

Uyu mukinnyi avuga ko iyo ari mu kibuga ataba arajwe inshinga no gutsinda igitego, ahubwo icyo ashyira imbere ari umusaruro w’ikipe muri rusange.

Yavuze ko iyo abonye Amavubi y’u Rwanda akina na we yumva ko bishoboka yayakinira, ariko na none agitekereza no kuri Black Stars y’iwabo muri Ghana.

Ati "Mba numva ntameze neza ariko iyo Rayon Sports yatsinze njye nta gitego natsinze mba meze neza. Iyo dufite umukino nkatsinda igitego biba ari inyongera kuri njye. Sinzi niba ujya ubona isura yanjye iyo twatsinzwe, mba meze nk’uwabuze ubuzima.”

“Ndavugisha ukuri, gukinira ikipe y’igihugu Amavubi ni byiza. Njya mbareba bakina nkabona ni byiza, abafana, biba ari ibintu byiza ariko ubu sinzi icyo navuga, wenda mu gihe kizaza. Birashoboka cyane! Numva nshaka no kuzakinira igihugu cyanjye cya Ghana aho mfite umuryango n’inshuti zanjye zaba zindeba nkina muri Stade.”

Arashaka kuzibukwa mu bihanganye byakiniye Rayon Sports

Michael Sarpong avuga ko ashaka kuba umwe mu bakinnyi beza bakiniye Rayon Sports ku buryo abafana bayo bazajya bahora bamwibuka.

Ati” Icyo nshaka ni ugukomeza gutsindira Rayon Sports ibitego. Ndashaka ko abafana bazajya banambona mu nzozi zabo. Ndashaka kuzajya ngaragara ku byapa, amafoto yanjye ku modoka no ku nzu z’abantu.”

Habimana Hussein ngo ni we mukinnyi w’inshuti magara y’uyu munya-Ghana wemeza ko bagenzi be n’abatoza bamuzi nk’umuntu uhora yishimiye.

Hari imikino atakwibagirwa

Sarpong yabwiye IGIHE ko umukino yumva yakinnye neza ari uwo Rayon Sports yanganyijemo na Al-Hilal Club igitego 1-1 mu ijonjora rya mbere rya CAF Champions League mu gihe uwo yakinnye nabi ari uwo Rayon Sports yatsinzemo AS Muhanga ibitego 3-0 mu mwaka ushize w’imikino.

Uyu rutahizamu wa Rayon Sports yagiriye inama abakiri bato bashaka kuvamo abakinnyi ko bagomba kwigirira icyizere, gukora cyane ndetse ntibibagirwe gusenga.

Ati” Uburezi niyo nzira iganisha ku ntsinzi, ubundi ugakora imyitozo cyane. Niba ushaka kuba nkanjye ugomba kubanza kwiyizera, ushobora gukora n’ibirenze ibyo nakoze. Ikindi ni ukudahagarika gusenga, Imana iri hejuru ya byose.”

Thierry Henry ni we cyitegererezo cye mu gihe inzozi afite ari zo gukinira kuri Old Trafford

Uyu rutahizamu wa Rayon Sports wemeza ko yari kuba umunyabugeni iyo adakina, avuga ko umukinnyi afata nk’icyitegererezo ari Thierry Henry mu gihe ngo afite inzozi zo kuzakinira kuri Stade ya Manchester United, Old Tafford, nk’ikipe akunda umwambara wayo.

Asanga APR FC idakomeye ndetse ntiyashimishijwe n’igenda rya bamwe mu bakinnyi n’Umutoza Robertinho

Sarpong yabwiye IGIHE ko APR FC atari ikipe ikomeye ndetse ngo ubwo yajyaga guhura na yo bwa mbere muri Nzeri umwaka ushize, yabonaga ari ibintu bisanzwe ariko bagenzi be bari bagize ubwoba kimwe n’abafana.

Ati "Inshuro ya mbere nkina na APR FC hari mu mikino y’igikombe cy’Agaciro. Ntabwo nari nawuhaye agaciro gakomeye kuko yari inshuro yanjye ya mbere ariko abakinnyi dukinana bose bari bafite ubwoba ndeste n’abafana. Si mbona ko bigomba kuba intambara, ni umupira w’amaguru. Simbona APR FC nk’ikipe ikomeye, Rayon Sports nitwe kipe nziza mu Rwanda, nta yindi mbona.”

Uyu mukinnyi yavuze ko yababajwe no kubona bamwe mu bakinnyi beza bakinanaga bajya muri mukeba, APR FC, ariko ngo yashimishijwe n’uko Ubuyobozi bwa Rayon Sports hari abo bwaguze bakinaga muri APR FC.

Ati” Narababaye! Icyo gihe nari ndi muri Ghana menya ko Sefu, Djabel, Thierry na Ange bagiye muri APR ndavuga ngo ikipe yacu irarangiye, narababaye cyane. Ariko natwe ubu dufite Kimenyi, Hervé, Iranzi na Mirafa.”

Sarpong ngo yiteguye guhangana na Manzi Thierry mu mukino uzahuza Rayon Sports na APR FC mu Ukuboza nyuma y’uko bidakunze ko amakipe yombi ahurira mu irushanwa ry’Agaciro ryabaye mbere y’uko uyu mwaka w’imikino utangira.

Ati” Bizaba ari byiza, muzabibona. Nari nzi ko tuzahura mu mikino y’igikombe cy’Agaciro ntibyaba. Ndashaka guhura na APR FC, tuzahura mu Ukuboza, reka tuzarebe.”

Uyu mukinnyi yavuze ko atishimiye kubona Umunya-Brésil Robertinho wahesheje iyi kipe Shampiyona y’umwaka ushize w’imikino adakomezanya nayo, ariko avuga ko atabyivangamo kuko akazi ke ari ugukina.

Ati” Sinzi ukuntu wakwirukana umutoza waguhesheje igikombe akanatsinda imikino myinshi ukamwirukana nta n’impamvu, ntabwo ari byiza ku ikipe nka Rayon Sports. Gusa ako si akazi kanjye, akazi kanjye ni ugukina.”

Sarpong ushobora kuzashakana n’Umunyarwandakazi yagarutse ku rukundo rwe na Asinah ndetse na Strawberry

Agaruka ku bakobwa b’Abanyarwandakazi, Sarpong yavuze ko yabonye ari beza ndetse yemereye Umunyamakuru wa IGIHE ko hari undi mukobwa bari mu rukundo bashobora no gukorana ubukwe, ariko anyomoza amakuru avuga ko afite ubukwe mu minsi ya vuba.

Yavuze kandi no ku muhanzi Asinah n’umukobwa wamamaye ku mbuga nkoranyambaga nka Strawberry byigeze bivugwa ko bakundana, aho yihakanye yivuye inyuma uyu wa nyuma.

Ati” Nabonye abakobwa benshi b’Abanyarwanda, ni beza cyane. Sinzi aho bituruka, nta bukwe mfite ibyo n’ibinyoma. Hari uwo turi kuvugana, nibicamo muzabimenya. Ni iby’ingenzi mu buzima bwacu, umuhungu agomba kuba afite umukobwa bakundana."

Yakomeje agira ati "Nari ndi kumwe na Asinah mu minsi ishize ariko ubu ntitukiri kumwe. Strawberry ntabwo muzi, ni inde? Ashobora kuba yarashakaga gukoresha izina ryanjye kugira ngo amenyekane. Ntabwo nkuzi Strawberry, unyihanganire.”

Ngo abantu baramwitiranya

Iyo uganira n’uyu musore, ubona ko yirekura akakubwira buri kimwe ndetse na we yemeza ko ari umuntu mwiza, ushobora kumva buri wese mu gihe ngo hari abibeshya ko yirata.

Ati” Abantu bazi ko nirata. Hari umunyamakuru wanyoherereje amafoto yanjye kuri WhatsApp mwandikira mushimira. Yarambwiye ngo ntiyari azi ko namusubiza kuko ngo abantu bazi ko nirata. Ntabwo nirata, ugerageje kunyegera ubona ko ndi umuntu mwiza.”

Hari icyo yasaba Perezida Kagame bahuye

Michael Sarpoong yabwiye IGIHE ko akunda cyane Perezida Paul Kagame, aho yemeje ko aramutse agize amahirwe yo guhura na we byamushisha cyane ndetse ngo yanamusaba ku bwenge bwe akazabukoresha asoje gukina umupira w’amaguru.

Ati "Ningira amahirwe nkahura na Perezida Paul Kagame nzishima cyane, sinzi icyo navuga. Aratangaje, yahinduye u Rwanda ku buryo rusa neza n’u Burayi. Ibihugu byinshi by’i Burayi ntibibona ko aha haruta tumwe mu duce twinshi twabo.”

“Duhuye namubwira nti ‘Wampa ku bwenge bwawe kugira ngo nyuma y’umupira w’amaguru nzabukoreshe mu buzima bwange?”

Michael Sarpong watsinze ibitego 16 muri Shampiyona ishize, amaze gutsinda ibitego bibiri muri uyu mwaka w’imikino, ku mukino wahuje Rayon Sports na AS Kigali n’uwo yahuyemo na Bugesera FC.

Rutahizamu wa Rayon Sports, Michael Sarpong yavuze byinshi ku rugendo rwe mu mupira w'amaguru, urukundo yavuzwemo n'Abanyarwandakazi n'icyo yasaba Perezida Kagame baramutse bahuye
Umuhanzikazi Asinah yigeze gukundana na Sarpong, aho yitabiraga imikino ya Rayon Sports
Michael Sarpong ntiyashimishijwe n'igenda ry'Umutoza Robertinho
Uyu rutahizamu wa Rayon Sports asanga Robertinho ataragombaga kuva muri iyi kipe yafashije gutwara Shampiyona y'umwaka ushize w'imikino
Sarpong ukomoka muri Ghana ni umwe muri ba rutahizamu beza bari muri Shampiyona y'u Rwanda ndetse yemeza ko no gukinira Amavubi bishoboka
Uyu rutahizamu wa Rayon Sports ngo ategereje umukino uzabahuza na APR FC tariki ya 21 Ukuboza, aho we yemeza ko ari ikipe idakomeye

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza