Kiyovu Sports yatangaje ko nta bwoba ifitiye Rayon Sports zigiye guhura

Yanditswe na Eric Tony Ukurikiyimfura
Kuya 1 Ukuboza 2019 saa 07:29
Yasuwe :
0 0

Umuyobozi wa Kiyovu Sports, Ntarindwa Théodore, avuga ko bishimiye kongera guhura na Rayon Sports bari mu bihe byiza ndetse ashimangira ko nta bwoba na buke ibiteye.

Kiyovu Sports izakira Rayon Sports mu mukino w’umunsi wa 11 wa Shampiyona uzakinwa kuri iki Cyumweru kuri Stade ya Kigali i Nyamirambo saa 18:00.

Mu kiganiro yagiranye n’itangazamakuru kuri uyu wa Gatanu, Umuyobozi wa Kiyovu Sports, Ntarindwa Théodore, yavuze ko ari umukino biteguye neza.

Ati’’ Twiteguye neza cyane, cyane ariko mu buryo bushoboka. Ikintu gikomeye kuri uyu munsi mukuru, muri uku gusoza umwaka ndetse n’Urwego rw’Umuvunyi rukaba rwaje tukaba turi kumwe, ndagira ngo mbabwire ko Perezida wa Kiyovu Sports azaba yicaye hagati, Umuvunyi yicaye ku ruhande na Perezida wa Rayon Sports ku rundi.’’

Ntarindwa yavuze ko nta kipe Kiyovu Sports itinya, yemeza ko mu gihe imisifurire yaba myiza, abafana bazaryoherwa n’umukino.

Ati’’ Ndagira ngo mbasobanurire, nta kipe n’imwe dutinya. Dusigaye dutinya abasifuzi. Twe nta kipe dutinya n’imwe, ikibazo dufite ni ugutinya abasifuzi ariko nkeka ko ubwo Urwego rw’Umuvunyi ruzaba ruhari, ikindi nkaba numva ko na Gasingwa [uyobora abasifuzi] yabahagurukiye, nkeka ko umupira uzaba mwiza kandi abo dutinya batazakora amakosa.’’

Kiyovu Sports izakira uyu mukino, iri ku mwanya wa gatanu n’amanota 19 izakira Rayon Sports iri ku mwanya wa gatatu n’amanota 21.

Kiyovu iheruka kunyagira Bugesera FC ibitego 5-2 mu gihe Rayon Sports yatsinze AS Muhanga ibitego 2-1 ku munsi wa 10 wa Shampiyona.

Kiyovu Sports izakina uyu mukino idafite Munezero Fiston mu gihe Rayon Sports izaba idafite Iranzi Jean Claude na Nshimiyimana Imran bose kubera amakarita bahawe.

Umuyobozi wa Kiyovu Sports izakiramo umukino, Ntarindwa Theodore yavuze ko nta bwoba bafitiye Rayon Sports barakina kuri iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza