Kwamamaza

Rwigema Yves yatangiye imyitozo muri Rayon Sports n’inyogosho idasanzwe (Amafoto)

Yanditswe kuya 22-09-2016 saa 13:58' na Manzi Rema Jules


Myugariro wavuye muri APR FC ajya muri Rayon Sports, Rwigema Yves yakoze imyitozo ya mbere na bagenzi be ariko uburyo yahinduye umusatsi we biri mu byaryoheye abafana bari bishyuye kugira ngo binjire kuri Stade ya Mumena kureba uyu mukinnyi wavuye muri mukeba.

Nyuma y’umunsi umwe ashyize umukono ku masezerano y’imyaka ibiri, Yves Rwigema, wazamukiye muri APR FC akanayikinira yitabiriye imyitozo mu ikipe ye nshya yabaye mu gitondo cyo kuri uyu wa Kane, tariki ya 22 Nzeri 2016.

Ku myitozo yariho abafana batari bake binjiraga bishyuye amafaranga 500, uyu musore wahinduye inyogosho ndetse n’umusatsi akawutera irangi yabwiye IGIHE ko ubu aribwo yumva umutima we utuje kuko ageze aho yisanzuye kandi yizeye ko agiye kubona umwanya wo kwerekana icyo ashoboye.

Ati “Ubu ubuzima bwahindutse ndi umukinnyi wa Rayon Sports nta kibazo. Ubuzima bwo muri APR FC bwari bwiza ariko nashatse ubwiza kurushaho, aho umutima wanjye wishyimye kuko sinakunze kuba ahantu ntishimiye kubera impamvu ntashaka kuvuga.”

Rwigema yatangaje ko nta masezerano afitanye na APR FC nkuko bamwe bakomeje kubinuganuga.

Yagize ati “Nta masezerano nari mfite muri APR FC kuko nta hantu nigeze nsinya, ndi umukinnyi wa Rayon Sports niyo nasinyiye. Ndashaka kuyifasha kugera kure ndetse nanjye nkazamura urwego rwanjye.”

Rwigema yavuze ko kuba yahise ahindura inyogosho byatewe n’uko n’ubusanzwe yajyaga abyifuza ariko akabibuzwa no kuba muri APR FC bitemewe ariko akimara gusinyira Rayon Sports yabisabye abayobozi bamubwira ko nta kibazo kirimo kandi akaba yumva ntacyo bizamuhungabanyaho mu kibuga.

Rayon Sports ikomeje imyitozo n’abakinnyi bayo bose bakomeye uretse Moussa Camara utakoze uyu munsi ariko akaba yari ku kibuga akurikirana ibyo bagenzi be bakora.

Muri shampiyona y’umwaka utaha iteganyijwe gutangira tariki 14 Ukwakira, Rayon Sports ifite urugamba rukomeye kuko izatangira icakirana na Police FC kuri Stade ya Kigali i Nyamirambo mbere yo kwerekeza i Rusizi gusura Espoir FC tariki 22, aho izava igahita icakirana na AS Kigali mu mukino nawo utazaba woroshye.

Rwigema Yves ni myugariro wa kabiri, Rayon Sports yaguze muri APR FC nyuma yo gusinyisha Rwatubyaye waguzwe miliyoni eshanu z’amafaranga y’u Rwanda, ariko agahita abura n’ubu abayobozi bakaba batazi aho aherereye.

Abakinnyi ba Rayon Sports mu myitozo
Rwigema Yyves wicaye inyuma yakoze imyitozo ya mbere muri Rayon Sports
Rwigema Yves(ufite umusatsi w'umweru) wavuye muri APR FC, yagaragaye mu myitozo n'inyogosho idasanzwe
Rwigema Yves abika ibikoresho bye nyuma yo gukora imyitozo
Masoudi Djuma yakoresheje imyitozo mu byishimo bidasanzwe
Rutahizamu, Moussa Camara yagaragaye ku kibuga ariko nta myitozo yakoze
Perezida wa Rayon Sports, Gacinya Denis (wambaye ikote) aganira na Ndayishimiye Eric Bakame nyuma y'imyitozo

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved