Rwatubyaye Abdul yabonye ikipe nshya yo muri Macedonia

Yanditswe na Eric Tony Ukurikiyimfura
Kuya 23 Mutarama 2021 saa 11:19
Yasuwe :
0 0

Myugariro wo hagati, Rwatubyaye Abdul, wakiniraga Colorado Springs Switchbacks muri Leta Zunze Ubumwe za Amerika, yerekeje muri FC Shkupi yo mu Cyiciro cya Mbere muri Macedonia i Burayi ku masezerano y’amezi atandatu.

Rwatubyaye yari amaze iminsi mu Rwanda nyuma yo kwitabira ubutumire bw’Amavubi ku mikino ibiri ya Cap-Vert yabaye mu Ugushyingo 2020.

Mu kiganiro yagiranye na B&B FM- Umwezi, uyu mukinnyi wari umaze imyaka ibiri muri Leta Zunze Ubumwe za Amerika, yemeje ko agiye gukinira FC Shkupi yo muri Macedonia.

Ati “Ni ikipe n’ubushize nari numvikanye na yo mbere yo kubona ikipe muri Amerika, namaze kubasanga aho bari muri Turikiya mu myitozo. Ndashaka kureba ko nakwinjira ku isoko ryo ku mugabane w’i Burayi, hari ibyo nemeranyijeho n’umuyobozi w’iyi kipe.”

Rwatubyaye Abdul yagiye muri Leta Zunze Ubumwe za Amerika ubwo yagurwaga na Sporting Kansas City ikina Shampiyona y’Icyiciro cya Mbere (Major League Soccer) muri Gashyantare 2019 avuye muri Rayon Sports.

Nyuma, iyi kipe yamuguranye na Benny Feilhaber wakinaga hagati muri Colorado Rapids, na yo imutiza muri Switchbacks yo mu Cyiciro cya Kabiri, akaba ari yo yakiniraga kugeza mu mwaka ushize w’imikino.

APR FC na AS Kigali zo mu Rwanda, ni andi makipe byavugwaga ko yifuza uyu mukinnyi.

FK Shkupi ni ikipe nshya yashinzwe mu 2012 nyuma yo kwihuza kw’amakipe ya Sloga na FC Albarsa. Mu mwaka ushize w’imikino, yabaye iya gatanu muri shampiyona ya Macedonia.

Rwatubyaye yakiniraga Colorado Springs Switchbacks yo muri Amerika
Rwatubyaye yemeje ko yamaze gusinyira FC Shkupi yo muri Macedonia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .