Kwamamaza

Rwatubyaye Abdoul watorotse Rayon Sports agiye kugezwa mu nkiko

Yanditswe kuya 7-10-2016 saa 11:42' na Manzi Rema Jules


Kera kabaye, Ubuyobozi bwa Rayon Sports bwatangaje ko burambiwe kwihanganira myugariro Rwatubyaye Abdoul wayisinyiye amasezerano y’imyaka ibiri avuye muri APR FC ariko ikamuheruka icyo gihe.

Rwatubyaye yasinyiye Rayon Sports ahawe miliyoni eshanu ariko ntiyigeze agaragara yaba no mu myitozo y’iki kipe y’i Nyanza. Kuri ubu, biravugwa ko agiye kugezwa mu butabera kugira ngo asobanure iyi myitwarire.

Tariki ya 28 Nyakanga 2016 nibwo Rwatubyaye yasinye amasezerano avuye muri mukeba, APR FC yari amaze imyaka ibiri akinira ariko akaba yaranakuriye mu ishuri ryayo ry’umupira w’amaguru.

Nyuma yo gushyira umukono ku masezerano muri iyi kipe y’i Nyanza, uyu musore wari ukiri no muri gahunda yo gushaka ibyangombwa byo kwerekeza i Burayi mu ikipe ya FK Topvar Topoľčany mu cyiciro cya gatatu muri Slovakia, yahise aburirwa irengero amezi abaye abiri asaga.

Mu kiganiro n’abanyamakuru kuri uyu wa Kane, abayobozi ba Rayon Sports basobanura uko ikipe ihagaze n’uko yiteguye shampiyona y’umwaka utaha igomba gutangira tariki 14 Ukwakira ikina na Police FC kuri Stade ya Kigali i Nyamirambo, Perezida wayo Gacinya Denis yavuze ko ibyo gukomeza kwihanganira Rwatubyaye ufatwa nk’umukozi wataye akazi nta mpamvu atanze bigeze ku musozo hagiye kwitabazwa inkiko.

Ati “Umukinnyi witwa Rwatubyaye utaritabira akazi birumvikana ni umukozi wataye inshingano yiyemeje. Turashaka kumuhagurukira mu buryo bw’amategeko kuko hari ibyo twamutanzeho. Twamwihanganiye ukwezi kurenga, biba bikabije iyo umuntu atitabira akazi mu gihe kingana gutyo. Hari inzira zicibwamo iyo umuntu atubahirije amasezerano mwagiranye cyane cyane ku mirimo nk’iyi uba wanamutanzeho amafaranga yo kumugura ngo aze agukorere.”

Ni iki amategeko ya FIFA ateganya?

Amategeko y’Ishyirahamwe ry’Umupira w’Amaguru ku Isi, FIFA, agenga igura n’igurisha ry’abakinnyi bava mu ikipe bajya mu yindi mu bihugu bitandukanye, mu gika cyayo cya gatatu, ingingo ya cyenda igira iti “Abakinnyi banditse n’Ishyirahamwe runaka bemererwe kwiyandikisha mu kindi gihugu ari uko ishyirahamwe ry’umupira w’amaguru mu gihugu agiyemo rimaze kubona ibaruwa ivuye muryo mu gihugu yakinagamo imwemerera kugenda (International Transfer Certificate -ITC). ITC itangwa nta mananiza cyangwa igihe ntarengwa. Igihe uru rwandiko rumaze gutangwa, ishyirahamwe rirutanze rigomba kubimenyesha FIFA rikanayiha kopi.”

Rwatubyaye Abdoul bivugwa ko yerekeje muri Romania aho yabonye indi kipe, amakuru avuga ko muri APR FC bari baramaze kumuha ibaruwa imwemerera gusohoka kimwe na Iranzi Jean Claude, Emery Bayisenge na Kwizera Olivier bose bagombaga kujya hanze ndetse na Ferwafa ikaba yari yamaze kubiha umugisha.

Bagenzi be batangiye gukinira amakipe yabo uretse Kwizera Olivier wabuze ibyangombwa byo kujya muri Afurika y’Epfo, ubu akaba ari muri Bugesera FC na Rwatubyaye wakabaye akinira Rayon Sports.

Uretse kuba ikipe uyu mukinnyi yakifuza gukinira yakumvikana na Rayon Sports igasubizwa miliyoni eshanu bivugwa ko uyu mukinnyi yatanzweho, Rwatubaye ashobora guhagarikwa umwaka umwe kuko yaba asinyiye amakipe abiri mu mwaka umwe.

Rayon Sports kandi ikomeje gukurikirana myugariro Imanishimwe Emmanuel wayikiniraga akaza no kongera amasezerano y’imyaka ibiri, nyuma y’iminsi ibiri gusa agahita asinyira APR FC .

Imanishimwe bivugwa ko yahawe miliyoni umunani, Rayon Sports ivuga ko ari umukinnyi wayo, ibyo kuba yaragiye ahandi, ni ikibazo kizakemurwa na Ferwafa ariko bizeye ko azagaruka.

Perezida wa Rayon Sports Gacinya Denis (ibumoso) ari kumwe na Perezida w'umuryango wa Rayon Sports, Kimenyi Yves yemeje ko bagiye kurega Rwatubyaye
Rwatubyaye akimara gusinyira Rayon Sports yahise aburirwa irengero
Rayon Sports ifata Rwatubyaye (wambaye nimero 28) nk'umukozi watorotse akazi
Rwatubyaye asuhuzanya na Masoudi nyuma y'aho Rayon Sports yari imaze gutsinda APR FC ibitego bine ku busa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved