Rutahizamu Biramahire Abeddy yerekeje mu ikipe nshya muri Tunisia

Yanditswe na Manzi Rema Jules
Kuya 15 Nzeri 2018 saa 11:44
Yasuwe :
0 0

Biramahire Abeddy wakiniraga Police FC yamaze kwerekeza mu ikipe ya CS Sfaxien, mu cyiciro cya mbere muri Tunisia aho yaguzwe agera kuri miliyoni 25 z’amafaranga y’u Rwanda.

Uyu mukinnyi uri mu bakiri bato batanga icyizere mu Rwanda, yari amaze imyaka ibiri akinira Police FC aho yigaragaje bimufasha no guhamagarwa mu ikipe y’igihugu y’abakiri bato ndetse n’inkuru yakinnye CHAN 2018.

Nk’uko Ruhagoyacu ari nayo yagize uruhare mu kumushakira ikipe yabitangaje, ku myaka 20 Biramahire yerekeje muri Tunisia, aho biteganyijwe ko ashobora gusinya amasezerano imyaka itatu muri CS Sfaxien yamutanzeho miliyoni 25 Frw.

Aganira n’iki kinyamakuru yagize ati “Byamaze kurangira byose ndagenda nshyira umukono ku masezerano ningera muri iki gihugu, byinshi byamaze gukorwa”.

Iyi kipe izwi ku kabyiniriro ka ‘Juventus y’Abarabu’ yashinzwe mu 1928 yitwa Club Tunisien yambara icyatsi n’umutuku iza guhindurirwa izina mu 1962 yitwa Club Sportif Sfaxien n’amabara yambara ahinduka umukara n’umweru.

Mu mateka yegukanye ibikombe umunani bya shampiyona y’icyiciro cya mbere ikaba igiheruka mu 2013, yegukanye ibikombe bine by’igihugu ikaba igiheruka mu 2009.

Ku mugabane wa afurika nabwo si agafu k’imvugwarimwe kuko n’ubwo itaregukana CAF Champions League, yageze ku mukino wa nyuma mu 2006 ikaba ifite ibikombe bine bya CAF Confederation Cup n’ibindi bitandukanye.

Si ikipe y’umupira w’amaguru gusa ifite kuko igira n’iya basketball, iya Volleyball, Rugby, guterura ibiremereye, iteramakofe n’iy’umukino njyarugamba wa Judo.

Biramahire abaye rutahizamu wa kabiri werekeje muri Tunisia nyuma ya Nshuti Innocent banari mu kigero kimwe ukinira Stade Tunisien ndetse ikaba ariyo iyoboye urutonde rwa shampiyona ku munsi wa kabiri n’amanota atandatu mu gihe CS Sfaxien ari iya gatatu n’amanota ane.

Biramahire asanze rutahizamu Nshuti Innocent (umuri inyuma) banari mu kigero kimwe cy'imyaka muri Tunisia we akaab akinira Stade Tunisien
Biramahire (ubanza iburyo mu bari imbere) ku myaka 20 yatangiye guhamagarwa mu ikipe y'igihugu nkuru (aha ni mu imikino ya CECAFA 2017)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza