Rusheshangoga na Tuyisenge bitwaye neza, Zesco United ya Iranzi na Kasirye itahana ipfunwe

Yanditswe na Manzi Rema Jules
Kuya 11 Nzeri 2017 saa 09:08
Yasuwe :
0 0

Mu mpera z’icyumweru gishize, abakinnyi b’Abanyarwanda bakina mu bihugu bitandukanye bari mu kibuga bamwe barimo Rusheshangoga Michel na Tuyisenge Jacques bafasha amakipe yabo kwitwara neza mu gihe Iranzi Jean Claude we atagaragaye muri 18 bifashishijwe na Zesco United.

Uko iminsi itambuka niko abakinnyi b’Abanyarwanda bagirirwa icyizere n’amakipe yo hanze, ndetse bamwe bikabahira bakaba abami aho bakina nka Haruna Niyonzima muri Tanzania na Tuyisenge Jacques muri Kenya.

Muri izi mpera z’icyumweru benshi mu bagiye kugerageza amahirwe yabo hanze y’igihugu bari mu kibuga bafasha amakipe yabo, Tuyisenge Jacques wahoze akinira Police FC atsindira Gor Mahia ibitego bibiri muri 4-0 yatsinze Nzoia Sugar kuwa Gatandatu; undi Munyarwanda, Kagere Meddy atsinda icya gatatu naho icya nyuma cyinjizwa na Francis Kahata.

Gutsinda uyu mukino byafashije Gor Mahia gutera indi ntambwe igana ku kwegukana igikombe kuko imaze kurusha Sofapaka ya kabiri amanota atandatu mu gihe shampiyona igeze ku munsi wa 22 hasigaye imikino 12.

Uretse aba bitwaraga neza muri Kenya, muri Tanzania myugariro wo ku ruhande rw’iburyo wahoze akinira APR FC, Rusheshangoga Michel, yafashije Singida United gutsinda Mbao ibitego 2-1 bya Mudathir Yahya mu gihe Kayondo ari we wabonye kimwe rukumbi cya Mbao.

Muri iki gihugu kandi, Simba SC ya Kapiteni w’Amavubi, Haruna Niyonzima, ntiyahiriwe n’urugendo imbere ya AZAM FC kuko zanganyije 0-0 mu mukino utari woroshye ku mpande zombi.

Nyuma y’umunsi wa kabiri wa shampiyona muri iki gihugu, Mtibwa Sugar niyo ya mbere n’amanota atandatu kuko itaratakaza na rimwe, ikurikiwe na Simba SC ifite ane naho Singida United ya Rusheshangoga na Usengimana Danny ni iya karindwi n’amanota atatu.

Iranzi Jean Claude wahoze akinira APR FC ubu akaba ari muri Zambia mu ikipe ya Zesco United yasinyiye uyu mwaka, ntabwo akomeje guhirwa kuko no mu mukino iyi kipe yakinnye na mukeba, Zanaco atagaragaye no mu bakinnyi 18 umutoza yagiriye icyizere.

Nubwo Iranzi atari mu kibuga, rutahizamu wahoze akinira Rayon Sports, Davis Kasirye, yari mu bakinnyi 11 bitabajwe ku mukino warangiye batsinzwe na Zanaco ibitego 3-2.

Uyu ubaye umukino wa gatatu iyi kipe itabona amanota atatu muri shampiyona byatumye inatakaza umwanya wa mbere ubu ikaba iri ku wa kane n’amanota 46 nyuma y’imikino 25 irushwa amanota ane na Zanaco na Green Buffaloes za mbere mu gihe Power Dynamos ya gatatu ifite 47.

I Burayi, Shakhtyor Soligorsk ya rutahizamu Sibomana Patrick wahoze akinira APR FC yatsinze Krumkachy Minsk ibitego 2-0 gusa uyu Munyarwanda wayigiyemo uyu mwaka, ntabwo yagaragaye kubera ikibazo cy’imvune ikomeye yagize mu byumweru bitatu bishize n’ubu akaba akiri hanze.

Davis Kasirye (uhagaze ibumoso) yabanje mu kibuga n'ubwo ikipe ye yatsinzwe
Tuyisenge Jacques na Kagere Meddy bitwaye neza bafasha Gar Mahia kubona amanota atatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza