00:00:00 IGIHE NETWORK KN KINYARWANDA EN ENGLISH FR FRANCAIS

Ruremesha yongeye kugirwa umutoza wa Mukura VS

Yanditswe na Habimana Sadi
Kuya 16 Nyakanga 2021 saa 10:49
Yasuwe :
0 0

Ubuyobozi bw’ikipe ya Mukura VS bwatangaje abatoza bashya bayobowe na Ruremesha Emmanuel wahoze muri Gorilla FC.

Ku wa Kane tariki ya 15 Nyakanga 2021 nibwo Ubuyobozi bwa Mukura VS bwatangaje itsinda ry’abatoza bazatoza iyi kipe mu myaka ibiri iri imbere.

Umutoza Mukuru w’iyi kipe yagizwe Ruremesha Emmanuel wari umaze umwaka umwe muri Gorilla FC, Nshimiyimana Canisius azaba amwungirije cyo kimwe na Hakizimana Jean Baptiste uzaba ashinzwe kongerera imbaraga abakinnyi b’iyi kipe na Ndaruhutse Thèogene uzaba ari umutoza w‘abanyezamu.

Aganira na IGIHE, Ruremesha yavuze ko icyihutirwa ari ukubanza kubaka iyi kipe yatakaje abakinnyi benshi, akanagarura umwimerere wayo wo gukina umukino uryoheye ijisho.

Ati “Mukura birasaba kuyubaka kuko irabura abakinnyi benshi. Kuva mu izamu kugera imbere. Hanyuma ikindi ni ukugarura umwimerere w’imikinire ya Mukura VS.“

Uyu mutoza yakomeje avuga ko ari we wahawe uburenganzira bwo kwihitiramo abo bazafatanya, cyane ko Nshimiyimana Canisius yabaye umukinnyi we ubwo yari yatozaga iyi kipe.

Aje asimbura Umunya-Argentine, Rodolfo Zapata utaratanze umusaruro mwiza. Iyi Ikipe yaherukaga gutandukana kandi na Djilali Bahloul ufite inkomoko muri Algérie.

Ruremesha si mushya muri Mukura VS.

Yahoze ari myugariro w’iburyo kuva akiri muto. Gukina kwe byatewe no kuba yari umwana uturanye n’ikibuga cyo ku Mumena, bituma ajya mu ishuri ry’umupira ry’ikipe ya Panthère Noir. Mu 1989 avamo ajya muri Academy ya Rayon Sports FC yatozwaga na Gasigwa Nassor.

Uyu mutoza aherutse kubwira Imvaho Nshya ko muri Mukura ari iwabo, cyane ko nyuma ya Jenoside yakorewe Abatutsi mu 1994 yahise agaruka muri iyi kipe nk’umukinnyi. Yaje muri iyi kipe kuva mu 1995 kugeza mu 2002.

Ati “Muri Mukura baranyakiriye banshyira mu Ikipe. Ni ahantu ntazibagirwa nubwo tutatwaye ibikombe, ni ahantu h’ingenzi kuri njye.”

Muri Mukura bafashije Ruremesha kwinjira mu mwuga w’ubutoza.

Yatangiye gutoza mu 2003, aho yahawe inshingano zo gutoza abana ba Mukura akanabifatanya no gutoza ikipe y’iyahoze ari Kaminuza Nkuru y’u Rwanda (UNR FC).

Nyuma y’umwaka umwe, Ruremesha yagizwe umutoza mukuru wa Mukura VS yari iya nyuma ku rutonde rwa shampiyona n’inota rimwe mu mikino ine. Ku mukino yahuyemo na Kiyovu Sports yari ku mwanya wa mbere n’amanota 12 kuri 12 ayitsinda ibitego 3-0.

Nyuma y’imyaka ibiri Ruremesha yaje kwirukanwa ubwo iyi kipe yari ku mwanya wa 8 nyuma yo kubura abakinnyi 8 babanzamo.

Yagize ati “Kuva muri Mukura byarantunguye kuko numvaga ndi mu muryango, ni bya bindi by’ikipe yakureze abantu ntibakwemere. Si njye wari umaze kugira umusaruro mubi kurusha abandi. Hari ubwo ugera mu ikipe bikanga ariko ubuzima ni ko bugenda.“

Ruremesha yatoje amakipe arimo iyahoze ari Kibuye FC, Atraco FC, Gicumbi FC, Rayon Sports FC, Etincelles FC, Musanze FC, Gorilla FC na Kiyovu Sports aheruka kumaramo umwaka umwe gusa.

Ruremesha Emmanuel yasubiye aho yita mu rugo
Nshimiyimana Canisius azungiriza Ruremesha wamutoje akiri umukinnyi
Hakizimana Jean Baptiste wari umutoza wa Nyanza FC, azaba ashinzwe kongerera imbaraga abakinnyi
Rudolfo Zapata ntiyitwaye neza muri Mukura VS
Mukura VS yakunze gutozwa n'abanyamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .