Robertinho yishimiye abakinnyi bashya ba Rayon Sports, ahiga kuyigeza kure muri Champions League (Amafoto)

Yanditswe na Eric Tony Ukurikiyimfura
Kuya 26 Nyakanga 2019 saa 06:10
Yasuwe :
0 0

Umutoza wa Rayon Sports, umunya-Brésil Roberto Oliveira Gonçalves do Carmo uzwi nka Robertinho yakoresheje imyitozo ya mbere nyuma yo guhabwa amasezerano mashya y’umwaka umwe muri iyi kipe yahesheje shampiyona y’umwaka ushize.

Robertinho wasinye ku wa Gatatu ntabwo yakoresheje imyitozo yo kuri uyu wa Kane nimugoroba kuko yari atarahabwa imodoka yasabye ubuyobozi bw’ikipe.

Uyu mugabo w’imyaka 59 yakoresheje imyitozo yo mu gitondo kuri uyu wa Gatanu nyuma yo kuzanwa mu Nzove n’Umubitsi w’ikipe Cyiza Richard mu modoka ye.

Mu kiganiro yagiranye na IGIHE kuri uyu wa Gatanu, umuyobozi wa Rayon Sports, Munyakazi Sadate, yavuze ko nyuma y’ibiganiro bagiranye na Robertinho kuri uyu wa Kane, ikibazo cy’imodoka cyakemutse, akaba yatangiye akazi.

Mu myitozo yakoranye n’iyi kipe irimo abakinnyi 14 bashya barimo batanu bavuye muri APR FC na batatu bavuye hanze, Robertinho yagaragaye cyane aganira n’abakinnyi barimo kapiteni Rutanga Eric na Irambona Eric bayimazemo igihe ndetse bakaba bari mu bakinnyi bakuru.

Uyu mutoza wasabye ubuyobozi guhabwa uwongerera ingufu abakinnyi, aracyategereje kandi kubona utoza abanyezamu mu gihe yakoranye bwa mbere n’umutoza umwungirije, Kirasa Alain.

Perezida wa Rayon Sports, Munyakazi Sadate yabwiye IGIHE ko kugeza ubu bari mu biganiro n’abatoza bazavamo uwongerera ingufu abakinnyi n’uw’abanyezamu mu gihe kandi ikipe iri gushakirwa indi mikino ya gicuti ishobora gukina mbere y’uko ihura na Al-Hilal Club muri CAF Champions League.

Mu kiganiro yagiranye n’itangazamakuru, Robertinho yavuze ko yishimiye gukorana n’ikipe nshya irimo abakinnyi babaga bahanganye, avuga ko agiye kubakira ku bakinnyi bakomeye bari bayisanzwemo.

Ati” Ni umunsi wa mbere n’ikipe nshya dutegura umwaka mushya. Nishimiye kugaruka muri Rayon Sports kuko imeze nk’umuryango wanjye. Hari abakinnyi nka Eric, Rutanga, André, Radu na Sarpong bamenyereye kandi twari kumwe mu mwaka ushize, hari n’abandi beza twabaga duhanganye. Nizeye gufatanya n’abandi batoza tugatanga umusaruro mwiza.”

Abajijwe ku ntego afite mu mwaka utaha w’imikino by’umwihariko muri CAF Champions League, Robertinho yavuze ko afite intego zo gutsinda buri mukino, akageza iyi kipe kure hashoboka.

Ati” Intego dufite muri Champions League ni ukugera kure. Intego Rayon Sports ifite nanjye mfite ni ugutsinda buri mukino, indi ni ukugera kure hashoboka.”

Rayon Sports izabanza kwakira Al-Hilal Club yo muri Sudani mu mukino ubanza w’ijonjora ribanza uzabera i Kigali tariki ya 9 Kanama mu gihe uwo kwishyura uzabera muri Sudani nyuma y’ibyumweru bibiri.

Reba amashusho y’imyitozo ya Rayon Sports kuri uyu wa Kane

Robertinho yatangiye akazi nyuma yo gusinya umwaka umwe ku wa Gatatu
Robertinho aganira na Kirasa Alain wavuye muri Kiyovu Sports, aje kumwungiriza
Mwiseneza Djama, Kirasa Alain na Robertinho bategereje abandi batoza babiri bazakorana na bo
Irambona Eric umaze imyaka itandatu muri Rayon Sports aganira n'abatoza
Robertinho aganira na kapiteni mushya w'ikipe, Rutanga Eric
Michael Sarpong aseka ubwo yateranaga ubuse n'umutoza wungirije Kirasa Alain
Umunyezamu Kimenyi Yves ni umwe mu bakinnyi bashya Rayon Sports yaguze
Robertinho avuga ko yishimiye kugaruka muri Rayon Sports afata nk'umuryango we
Rayon Sports ikomeje kwitegura Al-Hilal Club muri CAF Champions League

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza