Rayon Sports yemeye kwishyura indezo ya Manishimwe Djabel

Yanditswe na Eric Tony Ukurikiyimfura
Kuya 5 Ugushyingo 2019 saa 07:51
Yasuwe :
0 0

Ubuyobozi bwa Rayon Sports bwemeye gutangaza indezo ku mukinnyi wa APR FC, Manishimwe Djabel, nyuma y’uko ubwo yageraga muri iyi kipe mu 2014, byari binyuze mu buryo budakurikije amategeko.

Mu mpera za Nzeri nibwo Ubuyobozi bw’ikigo kizamura impano z’abana mu mupira w’amaguru mu Ntara y’Iburasirazuba ‘Gatsibo Academic Sport Center’, bwandikiye Ishyirahamwe ry’Umupira w’Amaguru mu Rwanda (FERWAFA) burisaba ko ritakwemerera Manishimwe Djabel gukina uyu mwaka w’imikino mu gihe ikirego yatanze mu myaka ine ishize kitarakemurwa.

Icyo kigo cyazamuye uyu mukinnyi cyavugaga ko kimaze hafi imyaka itanu cyaratanze ikirego muri FERWAFA, kirega Rayon Sports ko yagitwariye umukinnyi mu buryo budakurikije amategeko, ariko kugeza icyo gihe iki kibazo kikaba kitarakemuka.

Nk’uko bigaragara mu myanzuro y’Akanama nkemurampaka ka FERWAFA kahuje impande zirebwa n’iki kibazo tariki ya 1 Ugushyingo, IGIHE ifitiye kopi, Rayon Sports yemeye ko uburyo yabonyemo Manishimwe Djabel bwari budakurikije amategeko.

Ubwo aka kanama kayobowe na Munyankumburwa Jean Marie kateranaga mu cyumweru gishize, Umunyamabanga Mukuru wa Rayon Sports, Itangishaka King Bernard yavuze ko “Icyo kibazo bakizi nk’Ubuyobozi bwa Rayon Sports kandi ashingiye kubigaragara muri dosiye, bemera ko umukinnyi ari uw’iki kigo kandi biteguye gutanga indezo.”

Nyuma y’ibiganiro byo kumvikanisha impande zombi, Rayon Sports yemeye kwishyura ibihumbi 500 Frw by’indezo bitarenze uyu mwaka wa 2019.

Gatsibo Academic Sport Center na yo yemeye aya mafaranga ndetse inemera ko ihagaritse ibirego byose birebana n’iki kibazo kuko igifite uburenganzira ku ndezo yatangwa mu gihe Manishimwe Djabel yaba aguzwe n’ikipe yo hanze nk’uko amategeko ya FIFA abiteganya.

Manishimwe Djabel w’imyaka 21, ni umukinnyi wa APR FC nyuma y’uko Rayon Sports imugurishije muri Gor Mahia, n’iyi kipe y’ingabo ikavuga ko yumvikanye na K’Ogalo yo muri Kenya, muri Nyakanga uyu mwaka.

Rayon Sports yemeye gutanga indezo ya Manishimwe Djabel kuri ubu ukinira APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza