Rayon Sports yatsinze AS Kigali mbere yo gutangira shampiyona

Yanditswe na Kanamugire Emmanuel
Kuya 8 Ukwakira 2016 saa 08:04
Yasuwe :
0 0

AS Kigali ni imwe mu makipe yagoye Rayon Sports umwaka ushize wa shampiyona dore ko itigeze iyitsinda na rimwe ariko kuri uyu wa Gatandatu kuri Stade Amahoro mu mukino wa gishuti, iyi kipe yatsinze ibitego bibiri ku busa byose bya rutahizamu Moussa Camara wahise anavunika bikomeye.

Mu mikino ibiri ya shampiyona umwaka ushize, Rayon Sports yari mu bihe byiza inyagira amakipe ibitego bine harimo na APR FC, yabashije gukura inota rimwe gusa kuri AS Kigali ya Nshimiyimana Eric.

Kuri uyu wa Gatandatu mu gihe hasigaye icyumweru kimwe kugira ngo iyi kipe y’i Nyanza ifungure shampiyona y’umwaka wa 2016-2017 yesurana na Police FC, yabanje kwipina na AS Kigali ibifashijwemo na rutahizamu mushya yazanye, umunya- Mali Moussa Camara iyitsinda ibitego 2-0.

Ku mutoza Masoudi, ngo iyi ni imyiteguro myiza ndetse no kwiyubakamo icyizere mu bakinnyi mbere yo gutangira umwaka mushya w’imikino kandi intego ari igikombe cya shampiyona no kuzatsinda imikino yose ishoboka byakunda bakarangiza badatsinzwe.

Ati “Hasigaye icyumweru kimwe dutangire shampiyona. Umukino nk’uyu uradufasha cyane, muri shampiyona iyo utangiye nabi usoza nabi ariko iyo utangiye utsinda n’amahirwe yo gutwara igikombe uba uyafite.”

Muri uyu mukino, Moussa Camara wari watsinze ibitego bibiri, ku munota wa 15 n’uwa 37 kuri penaliti yaje kuvunika igice cya mbere kigiye kurangira nyuma yo kugwa nabi ikirenge cy’akaguru k’iburyo karavunika.

Nyuma y’umukino umutoza Masoudi yaremye abakunzi ba Rayon Sports agatima avuga ko nubwo uyu musore yasohotse mu kibuga arira, imvune yagize idakomeye cyane ku buryo hari icyizere ko no ku mukino wo kuwa Gatanu ufungura shampiyona bakina na Police FC ashobora kuzagaragara mu kibuga.

Uyu mukino nubwo wari uwa gishuti, wari n’umwanya kuri Rayon Sports wo kumurika ku mugaragara umushinga mushya wo kubarura abafana hirya no hino mu gihugu bakoresheje kode *699# witezweho kuzafasha iyi kipe kuva mu bukoroni bw’ubukene bwakomeje kuyirangwamo mu myaka n’imyaka ishize.

Abakinnyi barimo Rwigema Yves, Mubumbyi Banabe na Nova Bayama bazamukiye muri Academy ya APR FC
Moussa Camara yavunitse amaze gutsinda ibitego bibiri
Uburyo bwo kwiyandikisha nk'umukunzi wa Rayon
Abafana bari bitabiriye uyu mukino wo kumurika umushinga wo kwiyandikisha kw'abakunzi ba Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza