00:00:00 IGIHE NETWORK KN KINYARWANDA EN ENGLISH FR FRANCAIS

Rayon Sports yatangiye Shampiyona itsinda Mukura Victory Sports

Yanditswe na Eric Tony Ukurikiyimfura
Kuya 30 Ukwakira 2021 saa 05:51
Yasuwe :
0 0

Igitego cy’Umunya-Maroc Youssef Rharb mu minota ya mbere, cyafashije Rayon Sports gutsinda Mukura Victory Sports 1-0 mu mukino w’umunsi wa mbere wa Shampiyona y’umwaka w’imikino wa 2021/22 yatangiye kuri uyu wa Gatandatu.

Kimwe no ku bindi bibuga byabereyeho imikino kuri uyu wa Gatandatu, muri Stade ya Kigali hari abafana baringaniye, bongeye kwemererwa kwitabira amarushanwa y’imbere mu gihugu nyuma y’amezi 19 bitaba kubera icyorezo cya COVID-19.

Rayon Sports yafunguye amazamu hakiri kare, ku munota wa kane, ku gitego cyinjijwe na Youssef Rharb nyuma yo gucenga Kayumba Soter amaze guherezwa na Essomba Willy Onana wambuye umupira Vincent Adams.

Kayumba Soter yakiniye nabi Essomba Onana, Rayon Sports ihabwa umupira uteretse inyuma y’urubuga rw’amahina watewe na Muhire Kevin, ushyirwa muri koruneri n’umunyezamu Nicholas Sebwato.

Habamahoro Vincent yashatse gutanga umupira ku munyezamu Sebwato, ufatwa na Essomba Willy Onana wawuteye hejuru arawumurenza, ariko ku bw’amahirwe ya Mukura Victory Sports hagoboka Kayumba Soter wawushyize muri koruneri n’umutwe ugiye kugera mu izamu.

Habura iminota itanu ngo amakipe yombi ajye kuruhuka, Muhire Kevin yinjiranye umupira mu rubuga rw’amahina, ateye ishoti rikurwamo na Sebwato, umupira ujya muri koruneri.

Mukura Victory Sports yatangiye igice cya kabiri iri hejuru ndetse mu minota itanu gusa yashoboraga kwishyura binyuze mu buryo bubiri yabonye, aho ubwa mbere bwari umupira washyizwe muri koruneri na Hategekimana Bonheur na ho ubundi bukaba bwari umupira uteretse watewe na Mukoghotya Robert, usubizwa inyuma n’igiti cy’izamu.

Umukinnyi muto wa Rayon Sports, Rudasingwa Prince, yagowe no kubyaza umusaruro uburo yabonye muri uyu mukino burimo umupira yahawe na Youssef Rharb, aho kuwutera mu izamu arawufunga, birangira umucitse.

Nyarugabo Moïse yahushije uburyo bwabazwe ku mupira wasubijwe inyuma na Hategekimana Bonheur n’ikirenge, ugeze kuri Opoku William awutera n’umutwe, ariko ku bw’amahirwe make ya Mukura Victory Sports ujya ku ruhande.

Mu minota y’inyongera, Nishimwe Blaise wasimbuye Onana, yateye ishoti rikomeye ari muri metero nka 35, umupira ushyirwa muri koruneri n’umunyezamu Nicholas Sebwato.

Mu yindi mikino yabaye kuri uyu wa Gatandatu, Espoir FC yari yakiriye AS Kigali i Rusizi itsindwa ibitego 2-0 bya Abubakar Lawal na Shaban Hussein ’Tshabalala’. Marines FC yari yakiriye Gasogi United kuri Stade Umuganda, itsindwa igitego 1-0 cyinjijwe na Ndabarasa Trésor mu gihe Kiyovu Sports yatsinze Gorilla FC igitego 1-0.

Ku Cyumweru, tariki ya 31 Ukwakira 2021, nabwo hateganyijwe imikino ine irimo uzahuza Etincelles FC na Rutsiro FC kuri Stade Umuganda, Etoile de l’Est na Police FC i Ngoma, Musanze FC na Bugesera FC kuri Stade Ubworoherane ndetse na APR FC izakirira Gicumbi FC kuri Stade ya Kigali.

Abakinnyi babanje mu kibuga hagati ya Rayon Sports na Mukura VS

Rayon Sports : Hategekimana Bonheur, Nizigiyimana Karim Mackenzie, Ndizeye Samuel, Habimana Hussein, Niyigena Clément, Mujyanama Fidèle, Nsengiyumva Isaac, Muhire Kevin (c), Youssef Rharb, Essomba Willy Onana na Rudasingwa Prince.

Mukura Victory Sports: Nicholas Sebwato, Kubwimana Cédric, Muhoza Trésor, Ngirimana Alexis (c), Kayumba Soter, Habamahoro Vincent, Matore Jean Pipi, Murenzi Patrick, Mukoghotya Robert, Vincent Adams na Nyarugabo Moïse.

Abakinnyi ba Rayon Sports babanje mu kibuga
Youssef Rharb yafashije Rayon Sports gutangira neza muri Shampiyona nshya
Murenzi Patrick akura umupira kuri Essomba Willy Onana
Rayon Sports yanyuzagamo ikotsa igitutu ab'inyuma ba Mukura VS

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .