Rayon Sports yasubijwe bus yayo nyuma y’amezi abiri ifatiriwe

Yanditswe na Eric Tony Ukurikiyimfura
Kuya 10 Kanama 2019 saa 10:01
Yasuwe :
0 0

Habura amasaha atageze kuri 48 ngo Rayon Sports yakire Al Hilal Omdurman mu mukino ubanza w’ijonjora rya mbere rya CAF Champions League, iyi kipe yamaze gusubizwa imodoka yayo yari yari imaze amezi abiri yarafatariwe na Akagara Motors.

Rayon Sports yari imaze icyo gihe gihe cyose igenda mu modoka isanzwe mu gihe hari ibiganiro byahuzaga impande zombi kugira ngo imodoka y’ikipe igaruke mu muhanda.

Rayon Sports yabanje kwishyura miliyoni 50 Frw muri miliyoni 100 Frw zaguzwe iyi modoka, aho andi mafaranga yagombaga gutangwa nyuma.

Mu kiganiro yagiranye na IGIHE mu mpera z’ukwezi gushize, Munyakazi Sadate uyobora Rayon Sports yavuze ko mu byatumye imodoka y’ikipe ifatirwa harimo inyemezabwishyu ya miliyoni 2.7 Frw bahawe n’Akagera Motors kari kakoze iyi modoka ubwo yaherukaga gupfa.

Uyu muyobozi yavuze ko Rayon Sports itemera kwishyura aya mafaranga kuko imodoka yari ikiri mu gihe cy’igeragezwa yemerewe ubwo yayiguraga.

Akagera Motors yishyuzaga kandi Rayon Sports ibirarane bya miliyoni 16 Frw itabashije kwishyura mu mezi ane aheruka, aho bari bumvikanye ko izajya itanga miliyoni enye ku kwezi.

Aganira n’abanyamakuru ku wa Kane, Munyakazi Sadate yemeje ko bitarenze amasha 24 iyi kipe izaba yamaze guhabwa imodoka yayo, igasubira mu muhanda.

Nyuma y’ibiganiro byahuje impande zombi kuri uyu wa Gatanu, Akagera Motors yemeye gusubiza Rayon Sports imodoka ndetse izayigendamo kuri iki Cyumweru igiye gukina na Al Hilal mu mukino wa CAF Champions League uzabera i Nyamirambo saa 15:00.

Umuvugizi wa Rayon Sports, Nkurunziza Jean Paul yabwiye IGIHE ko Rayon Sports yamaze gusubizwa imodoka yayo nyuma y’ubwuvikane bw’impande zombi.

Ati ”Dusimbura Komite yagiye, twasanze Bus y’ikipe itagihari. Habayeho kutumvikana, Akagera kayikoze ubwo yapfaga kasanze ikibazo ari icy’umushoferi utabishoboye twahaye akazi, baduca fagitire ya miliyoni 2.7 Frw. Ntabwo twabyumvise kuko yari muri garanti (guarantee).”

“Ejo twaraganiriye, baradusobanurira turabyumva, twishyura miliyoni 2.7 Frw. Hari n’amafaranga tuzajya dutanga buri kwezi. Abafana batuze imodoka irahari kandi Rayon Sports yiteguye kuyishyura, imvugo ni yo ngiro.”

Ubwo yerekanaga uko izakoresha ingengo y’imari y’amafaranga izinjiza mu mwaka w’imikino 2019/20, Rayon Sports yateganyije kwishyura miliyoni 32 Frw mu mafaranga yasigaye hagurwa iyi modoka.

Iyi modoka ifite agaciro ka miliyoni 100 z’amafaranga y’u Rwanda yakozwe n’uruganda rwa Beiqi Foton Motor Co Ltd ndetse ifite ubushobozi bwo gutwara abantu 52.

Yamuritswe ku itariki ya 28 Ugushyingo 2018, ishyikirizwa Rayon Sports ku mugaragaro tariki ya 1 Werurwe 2019.

Rayon Sports yasubijwe Bus yayo mbere yo kwakira Al-Hilal Club
Imodoka Rayon Sports yagiyemo ubwo yajyaga gukina na KCCA muri CECAFA Kagame Cup yabereye i Kigali mu kwezi gushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza