Rayon Sports yasinyishije Tuyishimire ‘Congolais’ wakiniraga APR FC

Yanditswe na Ngabo Roben
Kuya 2 Ukwakira 2018 saa 10:17
Yasuwe :
0 0

Nyuma y’icyumweru kimwe atijwe muri Marines FC, akabyanga umukinnyi usatira aciye ku ruhande rw’ibumoso Tuyishimire Eric bita ‘Congolais’ wakiniraga APR FC birangiye yerekeje muri Rayon Sports.

Ku wa Kabiri tariki 28 Nzeri 2018 nibwo ubuyobozi bwa APR FC bwafashe umwanzuro wo gutiza muri Marines FC abakinnyi babiri bazamukiye mu ishuri ryayo ry’umupira w’amaguru; Nyirinkindi Saleh na Tuyishimire Eric bita Congolais.

Saleh we yemeye kujya muri iyi kipe y’ingabo zirwanira mu mazi ariko Congolais we ntiyemera kuva mu Mujyi wa Kigali ngo ajye gutangira ubuzima bushya mu Mujyi wa Rubavu.

Uyu mukinnyi w’imyaka 20 bivugwa ko yanze kujya muri Marines FC kuko yari yaratangiye ibiganiro na Rayon Sports yamwifuje kuva muri Kamena uyu mwaka.

Amakuru agara kuri IGIHE yemeza ko amakipe yombi yamaze kumvikana, APR FC yemera kurekura Tuyishimire none birangiye ku mugoroba wo kuri uyu wa Kabiri asinyiye Rayon Sports amasezerano y’imyaka ibiri kuko yemeye gukomeza kumuhemba ibihumbi 350 Frw yari asanzwe ahembwa muri APR FC.

Congolais biteganyijwe ko azatangira imyitozo kuri uyu wa Kane tariki 4 Ukwakira 2018 ubwo Rayon Sports, izaba isubukura imyitozo yitegura umwaka w’imikino mushya uzatangira mu mpera z’iki cyumweru utangijwe na umukino w’igikombe cya Super Cup 2018 kizahuza APR FC na Mukura VS.

Rayon Sports yongeye uyu mukinnyi uvuka i Gikondo mu karere ka Kicukiro ku bandi bakinnyi bashya yaguze muri iyi mpeshyi nka; Bukuru Jean Christopher, Iradukunda Eric Radu, Mudeyi Souleiman, Habimana Hussein Eto’o, na Michael Sarpong Balloteli.

Congolais yari amaze imyaka ibiri muri APR FC avuye mu ishuri ry'umupira w'amaguru ryayo
Tuyishimire Eric bita Congolais yasinyiye Rayon sports imyaka ibiri y'amasezerano
Ntabwo yakiniye APR FC imikino myinshi kubera impamvu zirimo no guhagarikwa kenshi ashinjwa imyitwarire mibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza